Azərbaycanda sənədsiz evlərdə yaşayan insanlar illərdir ki, yaşadıqları ünvanın rəsmiləşdiriləcəyi günü gözləyir. Verilən vədlər, deyilən sözlər hələ də kağız üzərindədir. Belə demək mümkünsə, sənədsiz ev məsələsi düyünə düşmüş, çözülməsi mümkün olmayan problemə çevrilib.
Bu gün Bakı şəhəri ərazisində, təxminən, 500 minə yaxın sənədsiz evin olduğu bildirilir.
Qeyd edək ki, Bakıda qanunsuz tikilən evlərin sənədləşməsi ilə bağlı məsələ zaman-zaman gündəmə gəlir. Məsələni ciddi sosial problem kimi qiymətləndirən Prezident İlham Əliyev dəfələrlə bu barədə xüsusi göstərişlər verib və lazımi fərman imzalayıb. Lakin bütün bunlara baxmayaraq, problem elə problem olaraq qalır. Bəs görəsən, bu evlərin sənədləşməsi nə vaxt yekunlaşacaq?
“Sənədsiz evlərin sənədləşdirilməsinin bu ilin sonunadək başa çatdırılması inandırıcı görünmür”
Əmlak məsələləri üzrə ekspert Ramil Osmanlı bildirdi ki, sənədsiz evlərin sənədləşdirilməsinin bu ilin sonunadək başa çatdırılması inandırıcı görünmür. Ekspertin sözlərinə görə, bu iş Əmlak Məsələləri Dövlət Xidməti yanında Torpaqların Dövlət İdarəetməsinin Təşkili üzrə Dövlət Agentliyinə tapşırılsa da, bu məsələdə yerli icra orqanlarının fəaliyyətinə ciddi ehtiyac var: “Aidiyyəti qurumların bəhanəsi var ki, pandemiyadır. Bu proses, yəqin ki, növbəti ilin birinci yarısında yekunlaşar. Konsepsiya qəbul olunub ki, qanunsuz tikililər sənədləşdirilməlidir. Sənədsiz evlərlə bağlı məsələnin icrası Əmlak Məsələləri Dövlət Xidməti yanında Torpaqların Dövlət İdarəetməsinin Təşkili üzrə Dövlət Agentliyinə həvalə olunub. Amma görünən odur ki, pandemiya məsələsi əsas gətirilməklə bu iş ləngidilir. Bununla belə, məsələ ictimaiyyətin və mətbuatın diqqətindədir. Ona görə də inandırıcı deyil ki, hər hansı dövlət təşkilatı tərəfindən bunun icrası dayandırılacaq”.
Ekspertin sözlərinə görə, sənədsiz tikililərin inventarlaşdırılması işinə 2019-cu ilin mart ayından başlanıb. Oktyabr ayında isə Əmlak Məsələləri Dövlət Komitəsi ləğv olunub: “Həmin müddətədək Bakıda 163 mindən artıq, regionlarda 75 minə yaxın sənədsiz ev inventarlaşdırılıb. Ümumilikdə 240 minə yaxın fərdi yaşayış evi invertarlaşdırılıb. Yeni Agentlik yarandıqdan sonra pandemiya düşsə də, sərt karantin dövrü uzun çəkməyib. Ona görə də yaxşı olar rəqəmlər açıqlansın ki, aprel ayına qədər, həmçinin sərt karantinə qədər hansı işlər görülüb. Çünki sərt karantindən sonra da mərhələli şəkildə müəyyən işlər görmək olardı. İlkin hesablamalar göstərir ki, dövlət büdcəsi hər il buna görə 50 milyon vəsait itirir. Amma hesab edirəm, bu vəsait daha da böyük ola bilər. Büdcə bu evlər üzərində aparılan proseslərə görə bütün ödənişlərdən kənarda qalır”.
Günel CƏLİLOVA
