Qəddar it döyüşləri, yeri gəlmişkən, Azərbaycanda neçə illərdir həyata keçirilməsi qanunla qadağan olunub. Əvvəllər bu qəddar mərc oyununun həvəskarları gizlənə bilirdilərsə, artıq indi öz hobbilərini sosial şəbəkələr və forumlarda açıq-aşkar bəyan edirlər.
Şayiələrə görə, bu, nəhəng gizli biznes təşkilatçılarına, eyni zamanda iştirakçılara da külli miqdarda gəlir gətirir. Məlumatlara görə, mərclərin ilkin ödənişi on min manatlarla edilir. Qeyd etdiyimiz kimi, əksər xarici ölkələrdə olduğu kimi, Azərbaycanda da it döyüşləri keçirmək qadağandır. Ancaq zaman-zaman bu qanlı yarışın keçirilməsi haqda sosial şəbəkədə məlumatların yayılmasının şahidi oluruq. Bu günlərdə belə döyüş Gölgöl rayonunda keçirilib.
DİN mətbuat xidmətinin Gəncə regional qrupunun baş inspektoru Eşqin Qasımovun media nümayəndələrinə verdiyi məlumatda qeyd olunur ki, Göygöldə qanunsuz it yarışlarının keçirilməsi ilə bağlı məsələ nəzarətə götürülüb: “Sosial şəbəkələrdə bu yarışların Gəncə şəhərində keçirilməsi qeyd olunsa da, bildirməliyəm ki, yarış Gəncə şəhərində deyil Göygöl rayonunda keçirilib. Məsələ ilə bağlı artıq araşdırmalara başlanılıb. Tezliklə araşdırmaların nəticəsindən asılı olaraq məsələyə hüquqi qiymət veriləcək”.
Fərid Mansurov: “Ölüm oyunları” adlandırılan bu qanlı döyüşə mərc olaraq çox böyük pullar qoyulur - məbləğ 10 min dollardan 70 min dollara kimi dəyişir”
Qanunla qadağan olunduğu halda bölgələrdə it döyüşlərinin keçirilməsi barədə fikir bildirən Azərbaycan Heyvanların Qorunması Cəmiyyətinin heyvan haqları üzrə inzibatçısı Fərid Mansurov “Bakı-Xəbər”ə açıqlamasında bildirdi ki, 2020-ci ilin yaz aylarında Daxili İşlər Nazirliyinin fəaliyyəti nəticəsində it döyüşü keçirənlər zərərsizləşdirildi: “Bu işlə məşğul olanlar araşdırılaraq məsuluyyətə cəlb olundu. Artıq il yarım idi ki, ölkədə it döyüşləri keçirilmirdi. Təəssüf ki, itlər arasında qanlı döyüşün keçirilməsi yenidən başlayıb. Göygöl rayonunda itlər arasında böyük miqyaslı döyüş keçirilib. Bu mərc oyununun keçirilməsində yerli aidiyyəti qurumların da xəbəri olub. Məlumtlara görə, it döyüşləri 2021-ci ilin yaz aylarından etibarən yenidən keçirilməyə başlayıb. Bu yarışın keçirilməsi həm heyvanlara qarşı zorakılıqdır, həm də cəmiyyətə pis nümunədir. Mərc oyunlarının keçirilməsi Azərbaycan cəmiyyəti üçün xoşagələn deyil. İtlər arasında keçirilən qanlı yarışların qarşısı alınmalıdır”.
F.Mansurov onu da əlavə etdi ki, “ölüm oyunları” adlandırılan bu qanlı döyüşə mərc olaraq çox böyük pullar qoyulur: “Bizdə olan videolar Azərbaycanda baş verənlər barəsindədir. Mərclərdə məbləğ 10 min dollardan 70 min dollara kimi dəyişir”.
Həmsöhbətimiz hesab edir ki, bu işlə məşğul olanlar böyük bir dəstədir. Bu dəstənin bir hissəsi Dağıstanda, digər bir hissəsi isə Rusiyadadır: “Ümid edirəm ki, aidiyyəti qurumlar bu məsələyə sərt reaksiya göstərib, qanunu pozan şəxslərlə bağlı müəyyən işlər görəcək”.
Azər Qarayev: “Azərbaycan MDB ölkələrindən ilk olaraq ev heyvanlarının müdafiəsi üzrə Avropa konvensiyasına qoşulsa da...”
Heyvanların Müdafiəsi Birliyinin prezidenti Azər Qarayev bizimlə söhbətində qeyd etdi ki, it döyüşləri ən çirkin və Azərbaycan xalqına məxsus olmayan döyüş növüdür: “Bu işlə məşğul olanlar itlərin işgəncəsindən zövq alaraq pul qazanırlar. Daxili İşlər Nazirliyi qanlı mərc oyununu nəzarətə götürüb”.
Birlik sədrinin sözlərinə görə, Azərbaycan MDB ölkələrindən ilk olaraq ev heyvanlarının müdafiəsi üzrə Avropa konvensiyasına qoşulub, lakin ölkəmizdə heyvanlarla qəddar münasibət hələ də davam edir.
Günel CƏLİLOVA
