Oktyabrın 7-də Məhərrəm ayı başa çatdı. Məlumdur ki, Hicri təqviminin ilk iki ayında (Məhərrəm və Səfər ayları) Azərbaycanın əksər bölgələrində toy mərasimləri təxirə salındı.
Pandemiyadan sonra iki ay davam edən toy sezonu qiymətlərin olduqca yüksəlməsi ilə yadda qaldı. İstər şadlıq saraylarının menyu qiymətləri, istərsə də sənətçilərin toy sahibindən istədikləri məbləğ xeyli yüksəldi.
Məlumatlara görə, şadlıq sarayları adambaşına düşən qiyməti aşağısı 10 manat bahalaşdırıb. İyul ayında “1 adam”ın qiyməti 50-dən başlayırsıda, indi ilkin qiymət 60-70-dən başlayır. Bu hələ ortabab şadlıq saraylarıdı. “Bərkgedənlər”də qiymət birə-beş qalxıb.
Vüqar Bayramov: “Sahibkarların belə qiymət artımına getməsi arzuolunan deyil”
Millət vəkili Vüqar Bayramov bildirdi ki, sərt karantinlə bağlı tədbirlər yumşaldıldıqdan sonra ictimai iaşə və xidmət sektorunda, xüsusilə də şadlıq saraylarında qiymətlərin artmasını müşahidə edirik: “Sahibkarların belə qiymət artımına getməsi arzuolunan deyil. Sahibkarlar tərəfindən süni qiymət artımı zamanı monitorinqlərin aparılması və bazar qanunları çərçivəsində tənzimlənməsi mümkündür. Bu istiqamətdə süni şəkildə artırılan qiymətlərin optimallaşdırıması çox vacibdir”.
Fuad İbrahimov: “Qiymət yüksəlməsi israfçılıq ucbatından baş verir”
İqtisadçı Fuad İbrahimov bildirdi ki, araşdırmalar Azərbaycanda toy məclislərinin qiymət əmələgəlmə prosesində bahalaşmanın, qiymət “şişməsi”nin israfçılıq ucbatından baş verdiyini göstərir: “Qiymət yüksəlməsi israfçılıq ucbatından baş verir. Görün toy mərasimlərində nə qədər lüzumsuz proseslər var. Gəlin maşınının bəzədilməsi, toyda fişənglər, fotosessiya, foto-albom, şampan şəlaləsi, sayı bilinməyəcək qədər yeməklər, dondurma, qəhvə. Toyda masadakı o qədər yeməkdən sonra bir də üstündən tortla çay, sonra dondurma verilir, qəhvə verilir. Bu, sadəcə biabırçılıq və israfçılığın ən son həddidir. Çoxsaylı yemək növləri, içki növləri, masaların, foyenin bəzədilməsi və s. kimi məsələlərə sərf olunan xərclər ümumi toy məclislərinin baha olmasına gətirib çıxarır. Bu lazımsız məsrəflər aradan qalxsa, qiymətlər də aşağı olar. Bu gün bu bahalaşma səbətində verginin xüsusi çəkisi çox azdır. Yəni demək istəyirəm ki, şadlıq saraylarını vergidən tam azad etsələr də qiymətlərin ucuzlaşması baş verməyəcək. Ucuzlaşma toy məclislərinin (el şənliklərinin) strukturunun dəyişikliyi ilə əldə oluna bilər. Nəhayət, baş verənlərdən ibrət alıb lazımsız məsələləri aradan qaldırmalıyıq”.
“Şahənşah” şadlıq sarayı: “İyulun 1-dən toylara 150 nəfərdən artıq şəxs buraxılmadığından, qiymətlərdə də 5-10 manat artım oldu”
“Şahənşah” şadlıq sarayından bildirildi ki, pandemiyadan əvvəl restoranda üç növ menyu olub: “Menyudan asılı olaraq qiymətlər 40-50-60 manat arasında dəyişirdi. Operativ Qərargahın qərarına görə, iyulun 1-dən toylara 150 nəfərdən artıq şəxs buraxılmadığından qiymətlərdə də 5-10 manat artım oldu. Məhərrəmlikdən sonra isə restoranımızda toy sifarişləri çox azdır”.
Qeyd edək ki, Nazirlər Kabineti 2021-ci il iyulun 1-dən pandemiya şərtləri nəzərə alınmaqla şənlik mərasimlərinin (toy, nişan, ad günləri və s.) keçirilməsinə icazə verilməsi haqqında qərar verib. Qərara əsasən, şənlik mərasimləri 150 nəfərə qədər şəxsin iştirakı ilə təşkil oluna bilər. Yaşı 18-dən yuxarı olan bütün şəxslərin iştirakına isə yalnız hər kəsin COVID-19-a qarşı tam peyvənd olunması və ya COVID-19-dan sağalaraq immunitetə malik olması barədə təsdiqedici sənədi olduğu halda icazə verilir.
Günel CƏLİLOVA
