Ölkəmizdə hər il yol infrastrukturunun möhkəmləndirilməsinə, yenidənqurulmasına büdcədən milyonlarla vəsait ayrılır. Çünki yol tikintisi birbaşa gəlir gətirən sahə olmasa da, dolayısı ilə iqtisadiyyatın inkişafına töhfə verir.
Məlumdur ki, ölkə başçısı İlham Əliyev mütəmadi olaraq yol təmiri, yenidən qurulması ilə bağlı sərəncamlar imzalayır. Nəticədə yollar yenidən təmir olunur. Yolların yenidən təmir olunması yol infrastrukturunun inkişafı baxımındn yaxşıdır. Elə bu səbəbdən də ölkəmiz yol infrastrukturunun keyfiyyətinə görə dünyanın ən qabaqcıl ölkələri sırasındadır. Ancaq yeni təmir olunan yolların qazılması yol infrastrukturunun keyfiyyətini aşağı salır. Yeni təmir olunan yolların yenidən qazılmasının dəfələrlə şahidi olmuşuq. Növbəti belə bir hadisə Nəsimi rayonu, Ceyhun Səlimov küçəsində qeydə alınıb. Qeyd edək ki, adıçəkilən yol yenicə təmir olunaraq rənglənib, indi isə yolun bir zolağında təmir işləri aparılır.
Maraqlıdır, yeni təmir olunmuş yollar niyə yenidən təmirə dayanır? Olmazmı ki, həmin yol təmir olunmamışdan öncə orada olan hər hansı bir problem öncədən araşdırılsın, sonra yol təmir olunsun?
Anar Nəcəfli: “Yolun altından keçən elektrik xəttində qəza baş verdiyi üçün küçənin yan yolunda hərəkət hissənin qazılması məcburiyyəti yaranıb”
Azərbaycan Avtomobil Yolları Dövlət Agentliyinin mətbuat katibi Anar Nəcəfli bildirib ki, Nəsimi rayonu, Ceyhun Səlimov küçəsində yolun altından keçən elektrik xəttində qəza baş verib: “Təəssüf ki, küçənin yan yolunda hərəkət hissənin qazılması məcburiyyəti yaranıb. Hazırda aidiyyəti qurum tərəfindən qəza aradan qaldırılıb”.
Mayis Əliyev: “Yol çəkilişləri zamanı işlər koordinasiyalı şəkildə aparılmır”
Sosial sahə üzrə ekspert Mayis Əliyev bildirdi ki, yol çəkilişləri zamanı işlər koordinasiyalı şəkildə aparılmır: “Yol təsərrüfatı ilə bağlı vəziyyət hələ də arzulanan səviyyədə deyil. Demək olar hər həftə cənab Prezident hansısa bir yolun təmiri, yaxud yeni yol çəkilməsi, bərbad yolların abadlaşdırılması haqda sərəncam imzalayır. Bu məsələlər fonunda həmin yolların 1 həftə, 1 ay, 5 ay sonra dağılması isə istər-istəməz narahatlıq doğurur. Hətta yola aidiyyəti olmayan insanlar belə bunu eşidəndə təəssüf hissi keçirirlər ki, necə ola bilər axı, yeni çəkilən yol belə qısa zamanda dağılır?”.
Günel CƏLİLOVA
