Məlum olduğu kimi, Bakı İslam Universitetini bitirən məzunların diplomlarının tanınmaması böyük problem kimi uzun zamandır müzakirə edilir. 3000-3500 məzun diplomlarının rəsmən təsdiqlənməməsi səbəbindən nə iş tapa bilirlər, nə də gün-güzaranlarını təmin etmək üçün başqa bir imkana sahibdirlər.
Get-gedə 3500 məzunun etirazları böyüyür, onlar diplomlarının tanınmasına dəstək göstərmələri üçün dövlət qurumlarına, Milli Məclisə, tanınmış ictimaiyyət nümayəndələrinə, o cümlədən də mətbuata müraciətlər edirlər. Onu da qeyd edək ki, hüquq pozuntusu ilə üzləşən məzunların problemlərinin həllinə çalışan deputatlar, ictimai xadimlər də var, lakin hələ də bu bağlı qapıya açar salmaq müşkülə çevrilib.
“Bakı İslam Universitetini bitirən məzunların diplomlarının tanınmamasının səbəbi nə onu tanımayanlar, nə də məhkəmə tərəfindən izah oluna bilir
Bakı İslam Universitetinin sabiq müəllimi, tanınmış ilahiyyatçı Tural İrfan “Bakı-Xəbər”ə şərhində bildirdi ki, ləğv edilmiş Bakı İslam Universitetinin məzunları üzləşdikləri problemin illərdir həll edilməməsindən ciddi narahatlıq keçirirlər, heç yerdə onları işə götürmürlər, diplomlarının tanınmaması onlara çətinliklər yaradıb: “Məsələ belədir, indi ayılıblar ki, 1989-cu ildə təməli qoyulmuş Bakı İslam Universitetinin diplomlarında qüsurlar var. Mən uzun müddət orada müəllim işləmişəm. Bakı İslam Universiteti kifayət qədər savadlı, dövlətə yararlı məzunlar yetişdirib. Bunu xüsusi olaraq niyə əvvəldə vurğulayıram? Çünki bu günlərdə baş verən İran məsələsindən hamının xəbəri var, bu bizim üçün problemə çevrilib. Bu günlərdə başı çarşablı arvadların qəbiristanlıqlarda dövlət əleyhinə danışmasının səbəbi İranda təhsil alıb gəlmiş iranyönümlü şəxslərin bu gün məscidlərdə axundluq etməsidir. Bu gün məscidlərimizin 99 faizində yox, 100 faizində İranda oxumuş məzunlardır, yaxud İrandakı müşteyidə təqlid edən şəxslərdir. Ona görə də ölkədə bu cür hadisələr baş verir. Bakı İslam Universitetinin məzunlarının diplomlarını tanımamaqla, sanki onları ictimai mühitdən təcrid edirlər. Onlar iş tapıb işləyə bilmirlər, lap idarələrdə, başqa müəssisələrdə olsun, onları işə götürmürlər. Şərt o deyil ki, onlar dini mərkəzlərdə işləsinlər. Onsuz da QMİ onları dini mərkəzlərə yaxın qoymur, ancaq İran təhsilliləri yerləşdirirlər. Diplomları tanınsa, onlar heç olmasa başqa sahələrdə işləyərlər. Bakı İslam Universitetini bitirən məzunların diplomlarının tanınmamasının səbəbi isə nə onu tanımayanlar, nə də məhkəmə tərəfindən izah oluna bilir. Diplomun tanınmaması absurd bir məsələdir. Bir nəfərin diplomunu məhkəmə tanıyıb, ona hətta magistr diploma da verilib. Bu məsələ gülməli çıxır ki, bir adama diplom verəsən, sonra da “bu universitetin kökü yoxdur, bunun lisenziyası olmayıb” deyəsən. Sual olunur, bəs o bir nəfərə diplom necə verilir? Bu barədə məhkəməyə, Təhsil Nazirliyinə sual yaranır. Yəni burdan da görünür ki, hüquqi cəhətdən heç bir problem yoxdur. Universitetin lisenziyasının olmaması və sair bir bəhanədir. Sadəcə olaraq, hacı Allahşükür Paşazadə ilə hacı Sabir Həsənlinin “soyuq müharibəsi”nin nəticəsi məzunların başında çatladı. Yəqin xəbəriniz olar, onların arasında böyük intriqalar yaşanırdı. Orada guya hacı Sabirin Şeyxin yerinə keçmək məsələsi və sair vardı. Hətta Xırdalan tərəfdə Bakı İslam Universitetinə ayrılan ərazini Şeyxin mənimsəməsi məsələsi vardı. Hacı Sabir bu cür deyirdi. Sonra həmin ərazidə Qafqaz Universieti üçün bina tikildi. Onların bir-birindən “yuxarılara” şikayət etməsi bu cür nəticələndi və universitet ləğv olundu. Halbuki, Bakı İslam Universitetini Şeyxin özü təsis etmişdi, özü də bunu ləğv etdi. Universitet ləğv olundu və oranın məzunlarının diplomlarının tanınması ilə bağlı da heç bir müsbət addım atılmadı. Artıq bundan da görünür ki, hacı Sabirə qarşı bundan bir təzyiq vasitəsi kimi istifadə edirlər, məzunlar da hacı Sabirin üstünə düşür və baş verənlərə görə onu təqsirləndirirlər. Amma gərək dövlət qurumları bu məsələyə biganə yanaşmasınlar. Narazı kütlə yaratmaq əvəzinə problem həll edilməlidir”.
Məzunların müdafiəsi prosesinə millət vəkilləri Ceyhun Məmmədov da, Razi Nurullayev də, Fazil Mustafa və başqaları da qoşulub, bu məsələ parlamentdə səsləndirilib, baş nazirə bu barədə məruzə edilib, dövlət qurumlarına məktublar yazıldı: “Amma çox təəssüflər olsun ki, bu istiqamətdə heç bir irəliləyiş yoxdu. Təhsil Nazirliyi buna çox biganə yanaşır, sanki bu belə də olmalı imiş. 3000-3500 məzunu bu şəkildə bədbəxt etmək, işsiz-gücsüz qoymaq, onları dövlətdən narazı salmaq yolverilməzdir”.
Diplomları təsdiq edilməyən məzunların Bakı İslam Universitetinə qəbul olduqdan sonra böyük məbləğdə təhsil haqqı ödədiklərini deyən T.İrfanın sözlərinə görə, onlar 4 illik təhsil haqlarını başdan ödəyiblər, dünyanın heç yerində isə belə bir hal yoxdur. “Bu adamlar evinin əşyasını satıb, borca girib təhsil haqqı ödəyiblər, amma bu halla qarşılaşıblar. Çox yaxşı olardı ki, Bakı İslam Universitetinin məzunların diplomlarının tanınmaması məsələsini, bu sahədə olan problemləri Dövlət Təhlükəsizlik Xidməti araşdırsın. Çünki bu problemin məqsədli şəkildə yaradıldığı istisna deyil. Görün nə qədər adamı dövlətdən narazı salırlar, işsiz qalan adamlar isə müxtəlif dini cərəyanlara qoşulur və sair...Hesab edirəm ki, bu problem tez bir zamanda həll olunmalıdır”-deyə T.İrfan qeyd etdi.
İradə SARIYEVA
