Baş Prokurorluq vətəndaşları aldadan turizm şirkətlərinə xəbərdarlıq edib. Qurumun yaydığı məlumatda qeyd olunur ki, son zamanlarda ölkə ərazisində turizm şirkətlərinin sayı olduqca artmaqdadır:
“Həmin şirkətlər müxtəlif marketinq üsullarından istifadə etməklə “isti təkliflər” təqdim edib özlərinə müştəriləri cəlb edir. Bir çox hallarda vətəndaşlar bu kimi təkliflərə aldanaraq kifayət qədər məlumat əldə etmədikləri, tanımadıqları turizm şirkətlərindən saxta “səyahət paketlərini” almağa tələsir və nəticədə dələduzluq əməllərinin qurbanlarına çevrilirlər. Səyahət etmək istəyən şəxslərə xarici ölkələrə tur aldıqları şirkətlərin etibarlılığına diqqət yetirmələrini və yalnız müvafiq rəsmi qeydiyyatdan keçmiş turizm şirkətlərinə ödəniş etmələrini tövsiyə edirik”.
“Fırıldaqçılıqla məşğul olan turizm şirkətləri xarici ölkələrə çox ucuz qiymətə tur təşkil etdiklərini deyirlər, ancaq...”
Saxta turizm şirkətləri ilə bağlı fikir bildirən turizm sahəsi üzrə ekspert Elçin Rüstəm bildirdi ki, bazarda özlərini turizm şirkəti kimi təqdim edən dələduzlar yetərincədir: “Onlar turistlərin etimadından istifadə edərək onları aldadırlar. Belə fırıldaqçılıqla məşğul olan turizm şirkətləri xarici ölkələrə çox ucuz qiymətə tur təşkil etdiklərini söyləyirlər. Maya dəyərindən aşağı təkliflər isə müştəriləri şirnikləndirir. Halbuki, onların otelləri belə olmur. Uçuşa bir həftə qalmış dələduzlar ofislərini və telefon nömrələrini bağlayaraq aradan çıxırlar. Belə dələduz şirkətlər avqust ayında daha da artır. Onlar iyun və iyul aylarında fəaliyyət göstərərək müştərilərin etimadını qazanırlar. Sərfəli qiymətə xarici ölkələrdə beşulduzlu otellərdə dincəlmək təklif edirlər. Müştəri bilet aldıqdan sonra isə öyrənir ki, bilet, bütün sənədlər saxtadır. Nə təyyarə bileti var, nə də ki, onların adına xaricdə oteldə yer bron edilib. Bu səbəbdən də vətəndaşlar tanımadıqları, araşdırmadıqları turizm şirkətindən səyahət tur paketi almasınlar”.
Günel CƏLİLOVA
