Xəbər verildiyi kimi, Azərbaycanda 12-15 yaşı tamam olmuş yeniyetmələrə COVID-19 xəstəliyi əleyhinə mRNT Pfizer (“Comirnaty”) peyvəndi vurulacaq. Bu barədə Səhiyyə Nazirliyi məlumat yayıb.
Məumatda qeyd olunub ki, cari epidemioloji vəziyyəti, Avropa Dərman Agentliyi, Amerika Ərzaq və Dərman Administrasiyasının yeniyetmələrə mRNT Pfizer (“Comirnaty”) peyvəndinin vurulmasına rəsmi icazələrini nəzərə alaraq Səhiyyə Nazirliyinin Elmi-Tibbi Şurasının qəbul etidiyi qərara əsasən müvafiq tibbi göstərişlərə və hər iki valideynin razılığına əsasən 12-15 yaşı tamam olmuş yeniyetmələrə COVID-19 xəstəliyi əleyhinə mRNT Pfizer (“Comirnaty”) peyvəndi vurula bilər.
12-15 yaşlı yeniyetmələrin vaksinasiyası mərkəzləşdirilmiş şəkildə Bakı Sağlamlıq Mərkəzində aparılacaq.
Günay Rəsulova: “COVİD-19 virusundan qorunmaq üçün böyüklərlə yanaşı yeniyetmələr də vaksin olunmalıdır”
Yeniyetmələrə vaksin vurulması barədə fikir bildirən pediatr Günay Rəsulova qeyd etdi ki, COVİD -19 virusundan qorunmaq üçün böyüklərlə yanaşı yeniyetmələr də vaksin olunmalıdır: “Uşaqlarda da yan təsirlər ola bilər, amma bu qorxulu və ya təhlükəli deyil, xəstəliyin özü qədər ağır fəsadlara gətirib çıxartmır. Buna görə valideynlərə tövsiyə edirəm ki, narahat olub, uşağa peyvənd vurdurmaqdan imtina etməsinlər. Uşaqlarda peyvənddən sonra qızdırma və əzələ ağrıları ola bilər. Xəstəliyə aid yüngül şikayətlərin olması da labüddür. Bu, peyvəndə qarşı bədənin cavabıdır və təbii prosesdir. Bu cavabın olması bədəndə bir xəstəliyə qarşı antitellərin, qoruyuculuğun yaranmasının göstəricisidir. Qətiyyən təhlükəli deyil, adətən bir neçə gün ərzində o ağrılar da keçib gedir. Əlbəttə ki, əgər uşaqda peyvəndə qarşı hər hansı reaksiya, allergiya, yan təsirlər müşahidə olunarsa, bu zaman təcili müdaxilə edilməlidir”.
Vüqar Cavadzadə: “Vaksin vurdurulması yaşının 12-15 yaşa endirilməsini düzgün addım hesab edirəm”
Tibb elmləri doktoru, infeksionist Vüqar Cavadzadə bildirdi ki, tək mRNT Pfizer deyil, “Sinovac” vaksinini də 12-15 yaşlı uşaqlara vurmaq olar: “Məlumdur ki, virusun “Delta” ştammı yaranıb. “Delta” ştammı isə orta və aşağı yaşlı uşaqlarda xəstələnməyə səbəb olur. Hətta orta yaşlı uşaqlar arasında bu virusdan ölüm halları da artır. 10 yaşa qədər virus ciddi fəsad törətmir. Amma 10 yaşdan sonra ciddi fəsadlar törətməsi ehtimalı çoxdur. Bu mənada, vaksin vurdurulması yaşının 12-15 yaşa endirilməsini düzgün addım hesab edirəm”.
Günel CƏLİLOVA
