Psixotrop maddələr, narkotik vasitələr insanın “zövq almasının”, əziyyət çəkmədən öz xəyallarını, fantaziyalarını yaşamasının ən yüngül yoludur. Çox təəssüf ki, əksər hallarda insanların həmin maddə və vasitələrdən imtinası qeyri-mümkündür. İldə 2-3 növ yeni narkotik vasitə sintez olunur. Həmin vasitələrə qarşı mübarizə aparmağın ən səmərəli yolu antidotun kəşf edilməsidir. Bu da uzun müddət çəkə və o vaxta qədər yeni narkotik sintez oluna bilər.
Məlumatlara görə, ölkəmizə yeni gələn, gənclər arasında istifadəsi genişlənən və “patı” adlandırılan metamfetamin və amfetaminin çoxdan mövcud olan və psixostimulyatorlar qrupuna daxil olan narkotikdir.
Araşdırmalara görə, “patı” deyilən həmin narkotik vasitələr çox ağır və çox ciddi narkotiklərdir. Onlar qısa müddət ərzində insana qəhrəmanlıq hissi verir. Həmin narkotikləri qəbul edəndən sonra ilk başlarda təfəkkür, yaddaş, diqqət, intellekt sürətlənir, güclənir, qavrama qabiliyyəti qat-qat artır. Çox maraqlıdır ki, həmin narkotik vasitələr bəzi insanların hansısa sahə üzrə mövcud qabiliyyətlərini daha da artırır. “Patı”dan istifadə edənlər arasında zərif cinsin nümayəndələrinin sayı da kifayət qədərdir. Belə ki, qısa və asan yolla arıqlamaq istəyən qadınlar və qızlar belə qeyri-sağlam üsula əl atırlar.
Məlumatlara görə, son zamanlar arıqlamaq üçün adıçəkilən narkotikdən istifadə edənlərin sayı artıb
Fatimə Hacıbəyli: “Qadınlar “patı”dan daha çox arıqlamaq üçün istifadə edir, daha sonra onun aludəçisinə çevrilirlər”
“Vəfa” Sosial İctimai Birliyinin sədri Fatimə Hacıbəyli qeyd etdi ki, “patı” (metanfetamin) adlı maddə qadınlara arıqlamaq üçün təklif olunur və guya bu maddə onları arıqladır: “Bu maddə insanları asılı hala salır. Arıqladır, çünki iç orqanları məhv edir. Ən təhlükəli məqamlardan biri “patı” istifadəçilərinin günü-gündən cavanlaşması, onların arasında qadınların olmasıdır. “Patı” istifadə edənlərin yaş həddinə baxsaq görərik ki, onlar daha çox 25-35 yaş arası gənclərdir. Qadınlar “patı”dan daha çox arıqlamaq üçün istifadə edir, daha sonra onun aludəçisinə çevrilirlər. Metamfetamin insanı kəskin arıqladır, enerji parçalanmasını, metabolizmi sürətləndirir. Ona görə də, bunu istifadə edənlər tez arıqlayır. Sonra isə onun fiziki asılılığından çıxa bilmirlər. Hətta gəncləri dərs oxumaq, imtahana yaxşı hazırlaşmaq adı ilə də metamfetinə cəlb edənlər olur. Beyinin onu istifadə etdikdən sonra doğrudan da iş qabiliyyəti artır. Amma sonrakı fəsadları asılılıq yaradır”.
Aydan Əliyeva: “Bu maddəni qəbul edənlər ilk başda güclü çəki itirsələr də, sonradan dəhşətli vəziyyətə düşürlər”
Dietoloq Aydan Əliyeva bildirdi ki, məşhur insanlar, modellər, “Instagram”da çoxlu izləyicisi olan blogerlər zamanla müxtəlif dərmanlar, çaylar, arıqladıcı tabletləri nəinki aptekdən, hətta müxtəlif yollarla qara bazardan alıb, qəbul edərək, qısa müddərə arıqlayırlar: “Bu ənənə indi də davam edir və belə preparatların sonrakı fəsadları olduqca dəhşətlidir. Son zamanlar arıqlamaq üçün bəziləri daha da irəli gedərək, qadağan edilmiş narkotik tərkibli vasitələri sınayırlar. Bu dərmanların arıqladıcı təsiri barədə hardansa informasiya əldə edən gənc qızlar ilk başda güclü çəki itirsələr də, sonradan dəhşətli vəziyyətə düşürlər”.
Həmsöhbətimiz onu da əlavə etdi ki, ölkəmizdə əhalinin 60 faizi piylənmədən əziyyət çəkir: “Hətta mən təəssüf hissi ilə deyərdim ki, bu 60 faizin 30 faizini uşaqlar təşkil edir. Xanımların bir çoxu arıqlamaq üçün müxtəlif yollara əl atır. Bunun üçün akupunktura kimi müxtəlif vasitələrdən istifadə edirlər ki, bunlar çox yanlışdır. Arıqladıcı dərmanların içində narkotik tipli maddələr var. Bu vasitələri qəbul edən şəxslər qısa müddətdə arıqlayır. Ancaq sonra isə həmin arıqladıcı narkotik tərkibli dərmanlar insanlarda asılılıq yaradır. Bu vasitələr insanı özündən asılı vəziyyətə salır və müəyyən müddət sonra o dərmanların tərgidilməsi daha çox kökəlməyə səbəb olur. Bundan əlavə, maddələr mübadiləsi zəifləyir, xərçəngə meylli hüceyrələr aktivləşir, immunitet kəskin dərəcədə zəifləyir, insanda qanazlığı yaranır və gendə hər hansı bir xəstəlik varsa, onun üzə çıxmasına səbəb olur”.
Günel CƏLİLOVA
