Bu gün əksər ucqar ərazilərdə tibb məntəqələrinin vəziyyəti haqqında ürəkaçan sözlər demək olmur. Hətta bəzi ucqar kəndlərdə tibb məntəqələri ümumiyyətlə yoxdur. Kənardan daxma kimi görsənən köşklər əslində tibb mənqələridir. Belə bir tibb məntəqəsi Kürdəmir rayonunda mövcuddur.
Rayonun Şilyan və Qarasu kəndlərinin bir tibb məntəqəsi var. İki kəndin bir tibb məntəqəsi olmasına baxmayaraq, qəzalı vəziyyətdədir. Məlumat üçün bildirək ki, tibb məntəqəsi ötən əsrin sonlarında inşa olunsa da, bugünə kimi bir dəfə də olsun təmir olunmayıb. Sakinlər bildirir ki, bina qəzalı vəziyyətdə olduğu üçün hər an uça bilər. Kənd əhalisi onu da qeyd edir ki, həkimə müraciət etmək üçün çarəsizlikdən rayon mərkəzinə getməli olurlar. Sakinlərin dediyinə görə, məlum məsələ ilə bağlı əlaqədar təşkilatlara müraciət etsələr də, onların səsinə haray verən olmayıb.
Kürdəmir Rayon Mərkəzi Xəstəxanası - Əlabbas Abdulxalıqov: “Təxminən 10 mindən çox əhaliyə xidmət göstərən Şilyan və Qarasu kəndlərinin tibb məntəqəsi hazırda qəzalı vəziyyətdədir”
Məsələ ilə bağlı Kürdəmir Rayon Mərkəzi Xəstəxanasının hüquq məsləhətçisi Əlabbas Abdulxalıqov bildirdi ki, Şilyən kənd xəstəxanasının qəzalı vəziyyətdə olması ilə bağlı məlumatlıdırlar: “Təxminən 10 mindən çox əhaliyə xidmət göstərən Şilyan və Qarasu kəndlərinin tibb məntəqəsi hazırda qəzalı vəziyyətdədir. Məlum vəziyyətlə bağlı aidiyyəti orqanlara məlumat verilib. Veriləcək cavab əsasında tibb məntəqəsi ya əsaslı şəkildə təmir olunacaq, ya da yenidən tikiləcək”.
Pərvanə Mustafayeva: “Ucqar kəndlərdə olan tibb məntəqələrinin əksəriyyəti qəzalı vəziyyətdədir”
Həkim ekspert Pərvanə Mustafayeva bildirdi ki, səhiyyə sisteminin normal səviyyədə işləməsi üçün regionlarda da lazımı şərait yaradılmalıdır: “Ucqar kəndlərdə olan tibb məntəqələrinin əksəriyyəti qəzalı vəziyyətdədir. Həmin tibb məntəqələrində nə normal ambulator şərait var, nə də peşəkar kadrlar çalışır. Xəstənin müayinə və müalicəsi üçün lazım olan tibbi ləvazimatlar isə Sovet dönəmindən qalmış cihazlardır. Onların da əksəriyyəti işlək vəziyyətdə deyil”.
Günel CƏLİLOVA
