Səhiyyənin xalqa xidmət etməsi hər zaman arzulanan olub. Səhiyyənin imkanları artdıqca, bunun ictimaiyyətə daha çox xeyri dəyir. Yeni xəstəxanaların inşası, köhnə xəstəxana binalarının əsaslı təmiri, yeni korpusların tikilib istifadəyə verilməsi yaxşı göstəricidir. Son dövrdə Azərbaycan səhiyyəsinin inkişaf yolu tutması dövlət tərəfindən aparılan uğurlu siyasətin nəticəsidir.
Səhiyyənin tərəqqiyə doğru addımlaması özünü bir neçə istiqamətdə göstərir. Onlardan biri də səhiyyə sisteminin yenidən qurulması, müasir tipli səhiyyə ocaqlarının inşa edilməsi, əsaslı təmiridir. Son illər Bakı ilə yanaşı, bölgələrdə də yeni səhiyyə ocaqları, tibb mərkəzləri inşa edilir.
Qeyd etdiyimiz kimi, son illər bölgələrdə çoxlu sayda yeni tibb ocağı tikilir, köhnələr isə əsaslı şəkildə təmir olunur. Analoji hal Sabirabad rayonunda da müşahidə olunur. Belə ki, adıçəkilən rayonda müasir tipli geniş profilli xəstəxana tikilib. Bəzi kənd xəstəxanaları yenidən qurulub. Həmçinin, Mərkəzi Xəstəxana müasir tipli tibbi avadanlıqlarla təchiz edilib. Ancaq buna baxmayaraq, rayonda yaşayan əhali müayinə və yaxud əməliyyat olunmaq üçün kütləvi şəkildə Bakıya axışır. Haqqında bəhs etdiyimiz bölgənin sakinlərinin müayinə və ya müalicə üçün başqa əraziyə üz tutmasının səbəbi orada həkim çatışmazlığıdır.
Məlumat üçün bildirək ki, Sabirabadda mövcud olan tibb ştatlarının 216-sı boşdur, yəni 72 həkim, 144 orta tibb işçisi çatışmır. Həkimlərin bir hissəsi isə təqaüdçüdür. Belə olan vəziyyətdə xəstəxanada çalışanların əksəriyyəti yaşlı kadrlardır. Onlar həkim çatışmazlığı yaşandığı üçün işdə saxlanır.
Maraqlıdır, gənc tibb işçiləri niyə bölgələrdə işləməyə maraq göstərmirlər?
Onu da qeyd edək ki, bir müddət öncə səhiyyə nazirinin müavini Rahim Əliyev mətbuata açıqlamasında regionlarda həkim çatışmazlığı probleminin olduğunu təsdiqləyib. O bildirib ki, regionlardakı həkim çatışmazlığı probleminin həlli üçün ötən il rezidenturanı bitirən həkimlərin 50 faizi təyinatla bölgələrə göndərilib: "Keçən il rezidentlərin 60 faizi regionlara göndərilib. Həkimlərin regionlarda işləməsi üçün əlimizdən gələni edirik. Bir müddət əvvəl stimullaşdırıcı tədbirlər gördük. Maaşdan əlavə onlara həvəsləndirici məbləğ verilirdi və evlə təmin olunurdular. Belə bir proqramın yenidən həyata keçirilməsini gözləyirik. Hələ ki, bu tədbirlər təsdiqlənməyib".
“Səhiyyə elə bir sistemə çevrilməlidir ki, regionlarda çalışan həkimlərlə iri şəhərlərdə çalışanlar arasında peşəkarlıq səviyyəsi fərqlənməsin”
Tibb elmləri doktoru, həkim-ekspert Adil Qeybulla bildirdi ki, sözügüdən problemin həlli üçün regionlarda işləyən həkimlərə xüsusi sosial müdafiə tədbirləri həyata keçirilməlidir: “Həkimlərimizin mütləq əksəriyyəti Bakıda və digər iri şəhərlərdə cəmləşib. Bu da ondan irəli gəlir ki, paytaxtda və bir neçə iri şəhərimizdə həyat səviyyəsi rayon yerlərinə nisbətən yüksəkdir. Kənd və rayon yerlərində isə həkimlər üçün şərait yetərincə deyil. Bu səbəbdən də regionlarda həkim çatışmazlığını aradan qaldırmaq üçün həkimlərlə bağlı xüsusi sosial müdafiə tədbirləri həyata keçirilməlidir. Belə olarsa, rayon yerlərində də işləmək istəyən həkimlərin sayı artacaq. Elə etmək lazımdır ki, həkimlər regionlarda işləməyə maraq göstərsinlər. Qeyd etdiyim kimi, rayonlarda çalışacaq həkimlərə güzəştli tədbirlər tətbiq edilməlidir. Həmçinin, səhiyyə elə bir sistemə çevrilməlidir ki, regionlarda çalışan həkimlərlə iri şəhərlərdə çalışanlar arasında peşəkarlıq səviyyəsi fərqlənməsin. Bunun üçün icbari tibbi sığorta normal tətbiq edilməli, həm də həkimlərə bərabər şərait yaradılmalıdır”.
Günel CƏLİLOVA
