Sentyabrın 27-də Qarabağ cəbhəsində ermənilərin təxribatlarından sonra Azərbaycan Ordusunun işğal altındakı torpaqlarımızı azad etmək üçün başlatdığı Vətən müharibəsi davam edir. Hər keçən gün cəbhəyə yollanmaq üçün müraciət edənlərin sayı artmaqda, hərbi komissarlıqlar qarşısında sıxlıq yaranmaqdadır.
Bütün bunlar bir çox məsələlərlə yanaşı, həbsxanalardakı məhbuslarla bağlı bir məsələni də gündəmə gətirib. Dustaqlar arasında peşəkar zabit və hərbi mütəxəssislərin, eləcə də könüllü əsgər kimi döyüşlərdə iştirak etmək istəyənlərin çox olduğu bildirilir. Belə olan təqdirdə onlarla bağlı hansı hüquqi addımlar atıla bilər?
Fazil Mustafa: “Təcili bu işi gerçəkləşdirmək lazımdır”
Böyük Quruluş Partiyasının sədri, deputat Fazil Mustafa hesab edir ki, bu işi təcili surətdə gerçəkləşdirmək lazımdır: “Ümumiyyətlə, müəyyən dərəcədə kiçik, hansısa bir insidentə, dalaşmaya, xüsusilə ağır cinayət olmayan əməllərə görə həbsdə yatan xeyli sayda hərbçimiz, zabitlərimiz var. Hesab edirəm ki, onlara şans verilməlidir. Dövlət bu istiqamətdə addım atmalıdır. Onların əfv olunması və kim ki, könüllü olaraq döyüşə getmək istəyir, həmin şəxslərin proseslərə cəlb olunmaları yerində olardı. Bu, amnistiya yaxud da əfv formasında ola bilər. Amma təcili bu işi gerçəkləşdirmək lazımdır. Çünki onların təcrübəsinə ehtiyac var”.
Sahib Məmmədov: “Hazırda bu məqsədlə Penitensiar Xidmətin qapılarını açıb məhkumları kütləvi orduya göndərməyə hələlik ehtiyac yoxdur”
Ədliyyə Nazirliyi yanında İctimai Komitənin üzvü hüquq müdafiəçisi Sahib Məmmədov “Bakı-Xəbər”ə açıqlamasında bildirdi ki, belə praktikadan müxtəlif ölkələr istifadə edib: “Faşist Almaniyası ilə müharibə zamanı SSRİ-də xüsusi batalyonlar yaratmışdı və ona marşal Rokosovski rəhbərlik edirdi. Amma o zaman buna ehtiyac duyulurdu. Çünki insan resursları çatışmırdı. Azərbaycan ordusunda bu problem yoxdur. Qismən səfərbərlik elan olunub. Görürsünüz ki, insanlar kütləvi şəkildə orduya getmək istəyir. Onların içindən xüsusi təcrübəsi olanları seçir. Məsələn, artilleriya üzrə zabitləri və ya piyadaçıları. Belə müraciətləri edənləri alqışlamalıyıq. Həyatlarının bir dövründə cinayət əməli törədib, cəza alsalar da, onların bu jesti yüksək dəyərləndirilməlidir. Azərbaycan ordusunun belə zəruri ehtiyacı yoxdur ki, bu qüvvələrdən də istifadə etsin. Cəza çəkən insanların içərisində cəza müddətinin böyük hissəsini çəkənlərlə bağlı vaxtından əvvəl azadlığa buraxılma və ya əfv, amnistiya tətbiq edilə bilər. Qanunvericiliyin tələblərinə uyğun olaraq, belə addımlar mütəmadi atılır. Həmin adamlar gedib könüllü olaraq orduda qulluq etmək istədiklərini bəyan edə bilərlər. Onların içərisində peşəkar zabitlər də ola bilər. Hazırda bu məqsədlə Penitensiar Xidmətin qapılarını açıb məhkumları kütləvi orduya göndərməyə hələlik ehtiyac yoxdur”.
İstənilən halda belə niyyəti olan məhkumların addımını alqışlamaq lazımdır.
Məhəmmədəli QƏRİBLİ
