Vətənimizin bütövlüyü uğurunda mübarizə aparan şanlı Azərbaycan Ordusunun şücaətindən ruhlanan on minlərlə həmvətənimiz könüllü olaraq ordumuzla birlikdə döyüşlərə qatılmaq üçün müraciət edirlər. Torpağın işğaldan azal olunması istiqamətində gedən döyüşlərdə şəhid olan igidlərimiz də var.
Şəhid ailələrinə yardım etmək məqsədilə müxtəlif istiqamətdə kampaniyalar keçirilir. Bu məqsədlə sosial şəbəkədə səhifə də yaradılıb. "Şəhid ailələrinə yardım" adlı Facebook səhifəsində bir gün ərzində 56 min dollara yaxın ianə yığılıb. Hədəf isə 200 min dollardır. Məlumata görə, kampaniyaya dünyanın dörd bir yanından dəstək göstərilir.
Facebook, Instagram və digər sosial şəbəkə vasitələrində eyni kampaniya davam etdirilir. Bəzi şəxslər şəhid ailələrinin adından istifadə etməklə məşğuldur. Belə ki, həmin şəxslər sosial şəbəkə istifadəçilərinə şəhid ailəsinə yardım etmək adı ilə bank hesab nömrəsi göndərirlər. Məlumdur ki, hazırda insanlar bu kimi məsələlərə həssaslıqla yanaşdığı üçün “şəhid ailəsinə yardım” ifadəsini eşidən kimi dərhal qeyd edilən hesab nömrəsinə müəyyən məbləğdə vəsait köçürürlər. Ancaq araşdırmalar zamanı məlum olur ki, əksər hallarda şəhid ailəsinə yardım məqsədilə toplanan vəsait heç şəhid ailəsinə verilmir. Şəhid ailəsinin adından istifadə edib, özləri üçün toplayırlarmış.
“İanə toplayan öz şəxsiyyəti barədə kifayət qədər məlumat ortaya qoymursa, pulları hansı əsasla, hansı ərazidə, hansı miqdarda paylacağı barəsində izahat vermirsə, bu cür elanlara əsla reaksiya verilməsin”
Beynəlxalq hüquq üzrə professor Fərhad Mehdiyev bildirdi ki, vətəndaşlar əmin olmadıqları, tanımadıqları halda heç bir şəxsin hesabına əsgərlər üçün pul göndərməsin. Çünki bəzi şəxslər hazırki vəziyyətdən istifadə edib dələduzluq etməyə çalışa bilər. Vətandaşlar belə məsələlərdə diqqətli olmalıdır: “Düzdür, qanunla vətəndaşlar belə hallarda müxtəlif yardımlar toplaya bilər. Yəni burada hər hansı bir hüquq pozuntusu yoxdur. Lakin ianə toplayan öz şəxsiyyəti barədə kifayət qədər məlumat ortaya qoymursa, pulları hansı əsasla, hansı ərazidə, hansı miqdarda paylayacağı barədə izahat vermirsə, bu cür elanlara əsla reaksiya verilməsin. Çünki bu yardımı toplayanlar arasında dələduzlar da ola bilər. İanələr ancaq etibarından şübhə edilməyən şəxslərə, qurumlara verilməlidir. İnsanlarımız vətənpərvərlik hisslərindən birilərinin sui-istifadə etməsinə imkan verməməlidir”.
F.Mehdiyev onu da əlavə etdi ki, bu formada dələduzluq edən şəxslər Cinayət Məcələsinin 179-cu maddəsi ilə cəzalanmalıdır.
Cəmilə QARAYEVA
