04/04/2020 11:32
728 x 90

11 məntəqədə səsvermənin ləğv edildiyi dairədə ümumi nəticələrə təsir ehtimalı - 60-cı...

img

Mərkəzi Seçki Komissiyasının (MSK) son iclasında fevralın 9-da Milli Məclisə keçirilən seçkilərlə əlaqədar 60 saylı Salyan-Neftçala seçki dairəsi ilə bağlı müraciətə baxılıb. İclasda bildirilib ki, müraciətdə həmin dairə üzrə namizədlər Aytən Qurbanova və Kamil Musəvi bir sıra seçki məntəqələrində seçki prosesinin pozulduğu iddia ediblər.

MSK üzvü Baxşeyis Əsgərov bildirib ki, araşdırmalar zamanı qeyd olunan pozuntu halları 4, 5, 8 və 13, 15, 23, 27, 32, 35, 37 və 39 saylı seçki məntəqələrində öz əksini tapıb. B.Əsgərov qeyd edib ki, həmin seçki məntəqələrində seçicilərin iradəsinə təsir edəcək hallar müşahidə olunub. O, həmin məntəqələrdə səsvermənin nəticələrinin ləğv olunmasını təklif edib. Təklif səsə qoyularaq qəbul olunub. Qeyd edək ki, həmin dairə üzrə lider namizəd Fəzail Ağamalıdır.

11 məntəqə, hər halda, az seçici sayı etmir. Bunun həmin dairənin ümumi nəticələrinə təsiri ola bilərmi?

  • İsmayıl Ağayev: “Salyanda elə məntəqələr var ki, onlarda bu ləğv baş versəydi, hansısa dəyişiklikdən danışmağa dəyərdi”

Ötən seçkilərdə sözügedən dairədən deputatlığa namizəd olan və bölgəni yaxşı tanıyan Beynəlxalq Diaspor Mərkəzinin sədri İsmayıl Ağayev “Bakı-Xəbər”ə açıqlamasında ilk öncə bizim qəzetə təşəkkürünü bildirdi: “Mən seçki ilə bağlı sizin TV formatında hazırladığınız  debatları izləyirəm. Çox təşəkkür edirəm ki, elə rəngarəng verilişlər təşkil edirsiniz. Bu məsələyə gəldikdə isə, Seçki Məcəlləsinin tələblərinə görə, məntəqələrin beşdə ikisində seçkinin nəticələri ləğv olunursa, həmin dairənin ümumi nəticələrinin ləğvi baş tutur. Burada cəmi 11 məntəqədə ləğv edilib. Sizin dediyiniz məntəqələrin sayının çoxluğuna baxmayın. Mən onları yaxşı tanıyıram. Elə kənd var ki, cəmi 150 nəfər səs verib. Onun nəticəsinin ləğvi ümumi nəticəyə elə bir ciddi təsir etməz. Salyanda elə məntəqələr var ki, onlarda bu ləğv baş versəydi, hansısa dəyişiklikdən danışmağa dəyərdi. Məsələn, Qarabağlar, Kərimbəyli, Xalacda olan məntəqələri nəzərdə tuturam. Belə olmayıbsa, həmin dairənin lider namizədi elə Fəzail müəllim də qalacaq.  Mən yalnız bu dairəni nəzərdə tutmuram. Ümumən prosesin tam şəffaf olması üçün nəticələri ləğv edilən məntəqələrin məsul şəxslərini cəzalandırmaq gərəkdir. Bir neçə məntəqənin nəticəsinin ləğv olunması heç də bütün seçkiyə olan münasibəti dəyişmir. 60 saylı dairədə ciddi mübarizə gedib. Biz bunu izləmişik. Ancaq nəticələrin dəyişəcəyinə inanmıram”.

Məhəmmədəli QƏRİBLİ

Son xəbərlər