Ermənistan Azərbaycanın dövlət rəhbərlərinin İtaliyaya reallaşan səfərinə və orada yüksək səviyyədə qəbul olunmasına olduqca sərt və narahatedici tonda reaksiya verib.
Onların mətbuatında belə münasibətə görə İtaliyanı sərt qınayırlar. Hətta qeyd edilir ki, İtaliya Azərbaycanla olan kontaktları ilə xristian və demokratik dəyərlərini təbii qaz əldə etmək marağına dəyişib. Bu xüsusda erməni mediası öz ölkələrinin səhv xarici siyasət kursunu da tənqid edib. Hətta böyük bir təəccüblə İtaliyada 2020-ci ilin Azərbaycan mədəniyyəti ili kimi qeyd olunmasına da eyham edilir. Xüsusilə də Mehriban xanım Əliyevaya Vatikanın göstərdiyi böyük dəstəyə açıq qibtə edildiyi göz qabağındadır.
Hərbi və digər iqtisadi sahədə əldə edilən razılaşmalara görə də narahatlıq ifadə olunur. Ermənistanın bu dərəcədə aşırı qısqanclığını nə ilə izah edə bilərik?
Mübariz Əhmədoğlu: “Paşinyanı heç Vatikanın həndəvərinə buraxmadılar”
Politoloq Mübariz Əhmədoğlu “Bakı-Xəbər”ə açıqlamasında bildirdi ki, bunun bir necə fundamental və sonradan yaranan səbəbləri var: “Ermənistan birmənalı olaraq istəmir ki, Azərbaycanın beynəlxalq əlaqələri güclənsin. Xüsusilə də xristian dünyası ilə bizim əlaqələrimizin möhkəmlənməsi onları ciddi narahat edir. Digər bir səbəb isə qarşılıqlı müqayisədən doğur. Məsələn, Ermənistanla müqayisədə bizim həm Avropa, həm də digər xristian ölkələri ilə münasibətlərimiz daha yüksək səviyyədədir. Ötən ilin sonlarında Paşinyanın da İtaliyaya səfəri reallaşdı. İndi müqayisə edin bu səfərləri. Paşinyanın işi orada o oldu ki, ölkəsi üçün biznesmenlərdən investisiya dilənsin. Ona da nail ola bilmədi, yalnız qarşılıqlı vədlər verildi. İlham Əliyevi isə İtaliyanın ən nüfuzlu firmaları görüşə dəvət etdi və ondan Azərbaycanda fəaliyyət üçün şəraitin yaradılmasını istədilər. Ermənistanda bu fərqləri aydın sezirlər. Çünki indi informasiya bir anda hamıya çatır. Hazırda Azərbaycanla İtaliyanın arasında 6 milyardlıq mal dövriyyəsi var. Ölkələrimiz arasında olan dövriyyənin 5,5 milyardı Azərbaycandan İtaliyaya ixrac olunan neftin payına düşür. TAP işə düşəndən sonra iki ölkə arasındakı dövriyyə daha 2 milyard artıb, olacaq 8 milyard. Azərbaycan bütün bu parametrlərə görə Ermənistanı arxada qoyur. Həm də keyfiyyət baxımından üstün mənzərə yarada bilir. Əlaqələrimiz həm də humanitar və mədəniyyət sahəsində inkişafdadır. Bunun nəticəsidir ki, həmin ölkədə 2020-ci il “Azərbaycan mədəniyyəti ili” elan edilib. Vatikana olan qısqanclıq da təbiidir. Çünki müsəlman ölkəsi olan Azərbaycana xristian sayılan Ermənistandan daha böyük diqqət var. Bütün bunlara kölgə salmaq üçün erməni mediası belə fəallıq ortaya qoyur. Paşinyanı heç Vatikanın həndəvərinə buraxmadılar. Bu səbəbdən də gedib Vatikanı sərt tənqid etdi. Azərbaycanın apardığı siyasət gedib xristian dünyasının ürəyinə çatıb. Ermənistan bacarırsa, bizimlə ayaqlaşsın. Paxıllıq etməklə iş bitmir”.
Məhəmmədəli QƏRİBLİ
