04/04/2020 11:44
728 x 90

Azərbaycanın dövlət başçısının Roma Papası ilə sıx görüşləri - dövlətimizin beynəlxalq imicindən doğan faktor...

img

Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyeva İtaliyaya səfər zamanı Vatikanda Sikstin Kapellası və Müqəddəs Pyotr Kilsəsi ilə tanış olublar.

Bildirilir ki, Heydər Əliyev Fondu tərəfindən hazırda Vatikanda bir neçə layihə həyata keçirilir. 2019-cu ilin fevral ayında Heydər Əliyev Fondu ilə Müqəddəs Pyotr Kilsəsi arasında imzalanmış müqaviləyə əsasən, Müqəddəs Pyotr Kilsəsinin Bazilikasındakı “Roma Papası I Leon ilə Hun imperatoru Atillanın görüşü” barelyefi və Vatikan Bazilikasındakı katakombalarda yerləşən “Tullius Zethus” məqbərəsi Heydər Əliyev Fondunun maliyyə dəstəyilə bərpa edilir və artıq işlər başa çatmaq üzrədir. Bu işlərin bu ilin may ayında başa çatması planlaşdırılır. 2019-cu ilin fevral ayında Heydər Əliyev Fondu ilə Müqəddəs Taxt-Tacın Arxeologiya Şurası arasında imzalanmış müqaviləyə əsasən, hazırda “Müqəddəs Komodiliya” katakombalarındakı mavzoleyin bərpası işləri aparılır və layihənin 2020-ci ildə başa çatması nəzərdə tutulur. 2016-cı ildə icrasına başlanan və 2018-ci ildə Azərbaycan Respublikasının Birinci vitse-prezidenti Mehriban Əliyeva və Müqəddəs Taxt-Tacın Mədəniyyət üzrə Pontifik Şurasının sədri Kardinal Canfranko Ravazinin iştirakı ilə açılışı olan “Müqəddəs San Sebastian kilsə-muzey kompleksində katakombaların bərpası” layihəsi çərçivəsində son tamamlama işləri yekunlaşıb.

Heydər Əliyev Fondu tərəfindən həyata keçirilən layihələr müqəddəs Taxt-Tacda çox yüksək qiymətləndirilir. Bu işlər Fondun ümumbəşəri dəyərlərə verdiyi töhfələri bütün dünyaya nümayiş etdirir. Bununla yanaşı, bu layihələr həm də ölkəmizin müxtəlif dinlərin abidələrinə və müqəddəs yerlərinə verdiyi önəmi göstərir. Bütün bunlar isə multikultural dəyərlərə sadiq və bu dəyərləri təşviq edən ölkə kimi Azərbaycanın dünyadakı mövqeyini və yerini, həmçinin, dinlərarası dialoqun qurulmasındakı rolunu möhkəmləndirir. Qeyd edək ki, Sikstin Kapellasının yerləşdiyi bina Vatikanda Renessans dövrü italyan incəsənətinin ən görkəmli abidələrindən biridir. 1481-1483-cü illərdə kapellanın divarlarına Musanın və İsanın həyatlarından səhnələr təsvir olunan freskalar çəkilib. XV əsrdə dünya şöhrətli italiyalı heykəltəraş Mikelancelo kapellanın tavanının və mehrab divarının rəsmlərini yaradıb. Bura həm də muzey kimi fəaliyyət göstərir.

Vatikandakı Müqəddəs Pyotr Kilsəsi italyan intibah memarlığının ən məşhur nümunələrindən və dünyanın ən böyük kilsələrindən biridir. Kilsədə ilk Roma Papası hesab edilən Müqəddəs Pyotr dəfn edilib. Bura həm də məşhur ziyarətgah və dini mərasimlər yeridir. Buna görə də erkən xristianlıq dövründən etibarən əksər Roma papaları burada dəfn olunub. Eyni zamanda,

Azərbaycan Respublikasının Birinci vitse-prezidenti Mehriban Əliyeva Vatikanda Papa Cəngavər Ordeninin ən ali dərəcəsinə - IX Piy Ordeninin Böyük Xaçına (Dama di Gran Croce dell’ordine Piano) layiq görülüb. Birinci vitse-prezident Mehriban Əliyeva bu ordenə mədəniyyətin, o cümlədən, Müqəddəs Taxt-Tac təsisatları ilə qarşılıqlı əlaqələrin inkişafına verdiyi töhfələrə görə layiq görülüb. Ordeni Mehriban xanım Əliyevaya Müqəddəs Taxt-Tacın dövlət katibi kardinal Pietro Parolin təqdim edib.

Göründüyü kimi, ölkəmizi təmsil edən ali nümayəndə heyəti Katolik Kilsə tərəfindən çox yüksək səviyədə qəbul edilib və onların əməyinə böyük diqqət göstərilib. Bu amilin Azərbaycanın beynəlxalq imici ilə hansı səviyyədə əlaqəsi var?

  • Tural İrfan: “Cənab Prezidentin apardığı siyasət nəticəsində ölkədəki tolerantlıq şəraitinin yüksək olması bu münasibətlərin təməlində dayanır”

İlahiyyatçı Tural İrfan “Bakı-Xəbər”ə bildirdi ki, cənab Prezident İlham Əliyevin və Birinci vitse-prezident Mehriban Əliyevanın Vatikanda səfərdə olması, Roma Papası ilə görüşləri hesab edirəm ki, həm dövlətimiz, həm də xalqımız üçün faydalı oldu: “Çünki Roma Papasının dünyadakı nüfuzu, xristian dünyasındakı rolu və təsiri məlumdur. H.Əliyev Fondunun prezidenti kimi Mehriban Əliyevanın kilsə və digər tarixi əhəmiyyətli abidələrin təmirində böyük rolu bu görüşlərin əhəmiyyətini artırır. Görüş əsnasında faydalı müzakirələrin Qarabağ məsələsinin həllinə də müsbət təsir edəcəyini istisna etmək olmaz. Azərbaycan müsəlman dövləti olmasına baxmayaraq, Roma Papası və Vatikan nəzdində bir çox xristian dövlətindən daha üstün hörmətə və diqqətə layiqdir. Şübhəsiz ki, cənab Prezidentin apardığı siyasət nəticəsində ölkədəki tolerantlıq şəraitinin yüksək olması bu münasibətlərin təməlində dayanır.

Roma Papasının Azərbaycana müsbət münasibəti, şübhəsiz ki, Ermənistan rəhbərliyində ciddi narahatlıq yaradır. Bu narahatlıq həm qısqanclıqdan, həm də Qarabağ məsələsində erməni kilsəsi ilə o qədər arası olmayan Roma Papasının münasibətindən doğur. Şübhəsiz ki, bu görüş tarixi əhəmiyyətinə görə həm xalqımız, həm də dövlətimiz üçün böyük fayda kəsb edəcək. Belə görüşlər və münasibətlər Azərbaycanın dünyada yüksələn nüfuzunu daha da artırır. Nüfuzun artması da dövlətin güclənməsi və Qarabağ kimi münaqişə, problemin həllində dəstəkçilərin təsirinin həlledici olmasına gətirib çıxaracaq”.

Məhəmmədəli QƏRİBLİ

Son xəbərlər