Suda boğulan saman çöpündən yapışır. Bu gün yaratdığı siyasi və iqtisadi böhran içində boğulan Ermənistanın Baş naziri Nikol Paşinyan vəziyyətdən çıxış yolu axtarır. Dövlət başına küçədən gələn və küçə əxlaqına sahib olan Paşinyanın avantürist çıxışları, eləcə də atdığı qeyri-məntiqi addımları Ermənistan cəmiyyətini, sözün həqiqi mənasında, uçurum qarşısına gətirib çıxarır.
Avqustun 5-də Xankəndidə keçirdiyi ümumerməni mitinqində qeyri-real açıqlamalarla çıxış edən və erməni xalqını böhrana sürükləyən fikirlər səsləndirən Paşinyan erməni xalqını “Qarabağ uğrunda birləşmə”yə çağırdı. Paşinyanın Dağlıq Qarabağ münaqişəsinin sülh yolu ilə tənzimlənməsinə birbaşa ağır zərbə olan çıxışları erməni cəmiyyətində də normal qarşılanmır. Xaricdə fəaliyyət göstərən erməni lobbisindən son zamanlar elə də ciddi dəstək ala bilməyən Paşinyanın əlavə kömək qaynaqları aradığı məlumdur. Avropada fəaliyyət göstərən erməni lobbisinin inamsızlığı ilə qarşılaşan Paşinyan indi də kömək üçün əlini ABŞ-da fəaliyyət göstərən erməni diasporuna uzadır.
Belə ki, Ermənistanın Baş naziri Nikol Paşinyan ABŞ-ın Los-Anceles şəhərinə səfərə hazırlaşır. Bu barədə məlumatı Paşinyan “Facebook”da təşkil etdiyi canlı yayım zamanı paylaşıb. Erməni KİV-in yaydığı məlumata görə, o, Los-Ancelesdə ermənilərlə görüşlər keçirməyi planlaşdırdığını bildirir. Paşinyan görüşün sentyabrın 22-si, saat 16:00-da baş tutacağını deyib.
Paşinyan ABŞ-da Xankəndidə müzakirə etdiyi məsələləri, o cümlədən, "miatsum" və s.-ni gündəmə gətirəcəyini açıqlayıb.
Paşinyanın Los-Ancelesə səfəri nə ilə bağlıdır? O, Los-Ancelesin erməni diasporundan istədiyi dəstəyi ala biləcəkmi?
Akif Nağı: “...ABŞ-a səfərinin əsas səbəbi özünün sərsəm “Dağlıq Qarabağ Ermənistanındır” planını reallaşdırmağa yönəlib”
Qarabağ Azadlıq Təşkilatının sədri Akif Nağı “Bakı-Xəbər”ə bildirdi ki, Paşinyanın Los-Anceles səfərinin əsas səbəbi Xankəndidə keçirdiyi erməni mitinqində səsləndirdiyi cəfəng fikirlərin, ideyaların həyata keçirilməsi üçün oradakı erməni lobbisindən dəstək almaqdır. “Təbii ki, Ermənistan Baş nazirinin bu cür səfərlərinin baş tutması Qarabağ münaqişəsinin taleyindən narahatlığı ilə əlaqədardır. Son günlər Dağlıq Qarabağın taleyi ilə bağlı Ermənistan rəhbərliyi çox aqressiv mövqe tutur. Paşinyanın özünün Xankəndidə keçirilən mitinqə gəlməsi və burada çıxışlar etməsinin özü böyük qanun pozuntusudur. Təəssüf ki, beynəlxalq qurumlar da bu məsələni susqunluqla qarşıladılar. Eyni zamanda da Paşinyan orada sərsəm "miatsum” ideyasını yenidən dirçəltdi, rəsmi qaydada dövlət rəhbəri səviyyəsində elan etdi ki, “Dağlıq Qarabağ Ermənistandır”. Bu günlərdə Paşinyanın bu cəfəng fikrini Ermənistanın Xarici İşlər Nazirliyi ört-basdır etmək məqsədilə bəyan etdi ki, Paşinyan elə deməyib və onun fikri kontekstdən çıxarılıb. Amma xarici işlər naziri Mnatsakanyan özü açıq şəkildə bəyan etdi ki, Dağlıq Qarabağ Ermənistanın ayrılmaz hissəsidir. Yəni bu gün Dağlıq Qarabağ məsələsi ilə bağlı Ermənistan rəhbərliyinin mövqeyi açıq şəkildə ortadadır. Ona görə də Ermənistan Baş nazirinin ABŞ-a səfərinin əsas səbəbi özünün sərsəm “Dağlıq Qarabağ Ermənistanındır” planını reallaşdırmağa yönəlib. Bu baxımdan, Paşinyanın Los-Ancelesə səfəri təsadüfi deyil. Bilirsiniz ki, burada çox böyük erməni lobbisi fəaliyyət göstərir, o ərazi ABŞ-da ermənilərin ən çox yaşadığı ərazilərdən biri sayılır. Yəqin ki, Paşinyan erməni lobbisinin iştirakı ilə bir mitinq keçirib Xankəndidə səsləndirdiyi cəfəng fikirləri orada da dilə gətirəcək. Paşinyanın Dağlıq Qarabağla bağlı planını həyata keçirmək üçün maliyyəyə də ehtiyacı var. O, Los-Ancelesdəki erməni lobbisindən maliyyə dəstəyi ummaqla yanaşı, eyni zamanda da Qarabağ məsələsi ilə bağlı erməni diasporunun birmənalı dəstəyini qazanmaq istəyir. O bu mənfur planını həyata keçirmək üçün Los-Ancelesdə fəaliyyət göstərən erməni lobbisindən hərtərəfli dəstək istəyir. Paşinyan bununla da dünyaya meydan oxuyur ki, onların Dağlıq Qarabağı və işğal altında saxladıqları digər ərazilərimizi qaytarmaq fikirləri yoxdur. O bununla da dünyada fəaliyyət göstərən erməni lobbisinin tam dəstəyini qazanmaq istəyir. Hesab edirəm ki, Los-Ancelesdə keçirilən görüşdə yalnız burada yaşayan ermənilər deyil, başqa ölkələrdən gələn ermənilər də iştirak edəcəklər. Ən azından, diaspor nümayəndələri dəvət ediləcək. Fikrimcə, Azərbaycan tərəfi Paşinyanın bu cəfəng ideyasının pozulması istiqamətində işlər görməli və bu barədə beynəlxalq qurumlara müraciət etməlidir”.
A.Nağı hesab edir ki, Paşinyanın bu cür görüşlər keçirməsinin və cəfəng planlar qurmasının, həmin planların həyata keçirilməsinin qarşısının alınması üçün beynəlxalq qurumlar hərəkətə keçməlidirlər.
İradə SARIYEVA
