Dünyanın bir sıra ölkələrində dövlət başçısı yanında təhlükəsizlik şuraları fəaliyyət göstərir. Sözügedən qurum çox mühüm və strateji orqan hesab edilir. Yeri gəlmişkən onu da qeyd edək ki, Ermənistanın Təhlükəsizlik Şurasının katibinin dəvətilə Rusiya Federasiyası Təhlükəsizlik Şurasının katibi Nikolay Patruşev bu ölkədə səfərdə olub.
20 iyun 2019-cu ildə Ramil Usubovun Azərbaycan Respublikasının Prezidenti yanında Təhlükəsizlik Şurasının katibi təyin edilməsi bu qurumun roluna verilən önəmin göstəricisidir. Qeyd edək ki, uzun müddət idi sözügedən qurumun katiblik postu boş idi. Ramil Usubov dövlətçilik sahəsində kifayət qədər təcrübəli və yetkin dövlət xadimidir. Belə bir postun ona həvalə edilməsi strateji baxımdan qurumun dövlət üçün mühüm əhəmiyyət kəsb etməsindən xəbər verir.
Onu da qeyd edək ki, Azərbaycan Respublikasının Prezidenti yanında Təhlükəsizlik Şurası 10 aprel 1997-ci ildə yaradılıb. Təhlükəsizlik Şurası Prezidentin yanında məşvərətçi orqandır. O, Azərbaycan Respublikası Konstitusiyasının 109-cu maddəsinin 27-ci bəndinə uyğun olaraq Prezident tərəfindən yaradılır. Təhlükəsizlik Şurası vətəndaşların hüquq və azadlıqlarının, Azərbaycan Respublikasının müstəqilliyinin və ərazi bütövlüyünün qorunması sahəsində Prezidentin öz Konstitusiya səlahiyyətlərini həyata keçirməsinə şərait yaradılmasını təmin edir.
Təhlükəsizlik Şurasına Vitse-prezident, Milli Məclisin sədri, Baş nazir, Prezident Administrasiyasının rəhbəri, dövlət müşavirləri, baş prokuror, xarici işlər naziri, müdafiə naziri, Dövlət Təhlükəsizliyi Xidmətinin rəisi, daxili işlər naziri daxildir.
Qurumun mühüm rola və strateji əhəmiyyətə malik olduğunu nəzərə alsaq, Prezident yanında Təhlükəsizlik Şurası katibliyinin aparatının yaradılması və fəaliyyətə başlaması çox faydalı ola bilər. Hələlik bu barədə rəsmi bir qərar olmasa da, cəmiyyətdə bununla bağlı müəyyən fikirlər, istəklər səslənir. Yəni qurumun aparatının yaradılması və fəaliyyətə başlaması daha çox fayda verə bilər və s.
Maraqlıdır, ekspertlər bunu necə dəyərləndirirlər?
Qabil Hüseynli: “Belə olsa, o zaman idarəçilik sistemi daha səmərəli və çevik işləyə bilər”
Məsələyə münasibət bildirən sabiq dövlət müşaviri, politoloq Qabil Hüseynlinin sözlərinə görə, dövlət idarəçiliyində effektivliyin daha da artırılması baxımından Prezident yanında Təhlükəsizlik Şurası katibliyinin aparatının yaradılmasına ehtiyac var: “Ramil Usubov təhlükəsizlik məsələlərində səriştəli bir şəxsdir. Hesab edirəm ki, sözügedən qurumun bəlli bir strukturlarının yaradılmasına ehtiyac var. Prezident yanında Təhlükəsizlik Şurası katibliyinin aparatı yaradılmalıdır. Mütəmadi olaraq bu qurumun iclaslarının keçirilməsi dövlətçilik və idarəçilik üçün səmərəli olar. Belə bir qərar olsa, o zaman bu qurumun daha effektiv işləməsinə kömək edə bilər. Nəticədə ortaya çıxan istənilən problemi tez həll etmək mümkün olacaq. Nəzərə almaq lazımdır ki, Prezident yanında Təhlükəsizlik Şurası katibliyi qurumlarüstü fəaliyyəti ilə məsələlərin çevik və dinamik həllinə töhfə verə bilər. Bunun üçün də təbii ki, qurumun aparatı yaradılmalı və fəaliyyətə başlamalıdır. Belə olsa, o zaman idarəçilik sistemi daha səmərəli və çevik işləyə bilər. Ona görə də hesab edirəm ki, indiki dövrdə buna ehtiyac var. Buna gedilsə, faydalı nəticələr əldə etmək mümkün olacaq”.
Vidadi ORDAHALLI
