Avqustun 6-sı, saat 21:00-da Azərbaycanın işğal altındakı Xankəndi şəhərində 7-ci ümumerməni oyunlarının planlaşdırılmış açılışı başlayıb. Erməni KİV-inin yaydığı məlumata görə, dünyanın müxtəlif ölkələrinin 145 şəhərindən 5 minə yaxın idmançının qatıldığı açılışda komandaların paradı 1,5 saat davam edib. Ən çox nümayəndə heyəti həmsədr ölkələrdən – Rusiya (368) və ABŞ-dan (308) gəlib. Yarışlarda 17 idman növü üzrə 105 medal dəsti oynanılacaq.
Qeyd edək ki, bundan əvvəlki ümumerməni oyunları Ermənistanda keçirilib. Ancaq bu il özlərində cəsarət tapan ermənilər həmin yarışı işğal altında saxladıqları torpaqlarda keçirirlər. Maraqlıdır ki, bəzi ölkələr yarışın məhz Azərbaycanın işğal altında olan ərazilərində keçirilməsini əsas gətirərək, orada iştirakdan imtina ediblər. Ancaq diqqət etdikdə görürük ki, nədənsə, yarışa ən çox idmançı göndərən ölkələr ABŞ və Rusiyadır. Bizə ona görə təəccüblü gəlir ki, həmin ölkələr guya münaqişənin sülh yolu ilə həllinə yardım edir və üzərlərində rəsmi vasitəçilik öhdəliyi var. Onda isə həmsədrlərin bu siyasətini necə anlamaq olar?
Elşən Mustafayev: “Bu addım onların ikiüzlüyünü göstərir”
Politoloq Elşən Mustafayev “Bakı-Xəbər”ə bildirdi ki, bu məsələyə hansı aspektdən yanaşsaq, qanunsuzluq var: “Əvvəla ümumerməni oyunları adlanan yarışın Azərbaycanının ərazisində keçirilməsi qanunsuzdur. Çünki ümumerməni oyunlarını Azərbaycan ərazisi ilə heç nə bağlamır. İkinci bir tərəfdən, bununla ermənilər qanunsuzluq edib separatçı rejimin təbliğatını qururlar. Onlara elə bu amil kifayət edir. Bilirsiniz ki, istənilən şəxs, hansı sənətin yiyəsi olmasından asılı olmayaraq, Dağlıq Qarabağa səfər edərkən, mütləq mənada, Azərbaycanın rəsmi icazəsini almalıdır. Əks halda, bu addım sərhədləri qanunsuz keçmə cinayəti sayılır. Bununla bağlı Azərbaycanın indiyə kimi atdığı sərt addımlar var. Bir çox elm, sənəd adamı bu prosedura riayət etmədiyi üçün adı bizim XİN-in tərtib etdiyi “qara siyahı”ya düşüb. Hətta bu cür əməlinə görə Lapşin adlı bloger xaricdə həbs edilərək Azərbaycana gətirildi. Bizim dövlətin qanunlarına uyğun şəkildə mühakimə edildi. Yəqin ki, həmin oyunlara dəvət alanlar bu proseduru əzbər bilirlər. Amma görürsünüz ki, riayət etmirlər. Adını qoya bilərlər ki, idmanla siyasəti qatmaq lazım deyil. Yanlış yanaşmadır. Çünki burada söhbət adi idman oyunundan getmir. Məhz separatçılığı təbliğ etdikləri oyunlardan gedir. Həmin yarışda iştirak edən ölkələrin idmançıları Azərbaycanın qanunlarını kobud surətdə pozub, sərhədimizi qanunsuz keçməklə cinayət əməli törədiblər. Maraqlısı isə budur ki, ən çox qanunu pozanlar elə həmsədr ölkələrdir. Görürsünüz ki, onlar yarışda daha çox idmançı ilə təmsil olunurlar. Bu addım onların ikiüzlüyünü göstərir. Sübut olunur ki, onlar üzərlərinə düşən missiyanı yerinə yetirmək əvəzinə, separatizmə açıq dəstək vermiş olurlar. Azərbaycan rəsmi qaydada buna etiraz etməlidir. Əsasən də həmsədrlərin diqqətinə bu qanunsuzluq çatdırılmalıdır. Hətta yeri gəlsə, həmin idmançıalrın hamısının adını “qara siyahı”ya salmalıyıq. Bu artıq biabırçılığın son həddidir. Necə ola bilir ki, həmsədr olmayan ölkələr yarışda iştirakdan imtina edir, ancaq həmsədr ölkələr sevinə-sevinə ora gedirlər? Belə addımlar onların neytrallıq imicinə ciddi zərbə vurur və silinməz iz buraxır”.
Məhəmmədəli QƏRİBLİ
