“Ümumerməni oyunları” oyunu Ermənistanın regional təcridini bir az da qatılaşdırdı - üç ölkə…
Sədrəddin Soltan: “İranın hazırkı vəziyyəti Azərbaycanla münasibətləri pozmamağı diktə edir”
Ermənistan silahlı qüvvələrinin işğalı altında olan Azərbaycan torpaqlarında ermənilərin həyata keçirdiyi qanunsuz əməllərin sayı bitib-tükənmir. Düşmən ölkə bütün beynəlxalq konvensiyaların şərtlərini, eləcə də beynəlxalq idman təşkilatlarının tələblərini pozaraq Azərbaycanın tarixi torpaqlarında müxtəlif idman yarışları, turnirlər, futbol çempionatları keçirir. Ermənistan sayca 7-ci olan ümumerməni yay oyunlarını Dağlıq Qarabağda, Xankəndidə keçirməklə növbəti dəfə qanunsuzluğa yol verib.
Xaricdəki erməni lobbisinin saxtakar təbliğatına uyaraq bir sıra Avropa dövlətlərinin, eləcə də ABŞ-ın idmançıları ümumerməni oyunlarına qatılsalar da, Türkiyə, Gürcüstan və İran rəsmi olaraq öz idmançılarının sözügedən oyunlarda iştirakına qadağa qoyub. Bu da onu göstərir ki, hər üç dövlət regionda sülhün, sabitliyin qənimi olan Ermənistanın Dağlıq Qarabağda keçirdiyi ümumerməni yay oyunlarını boykot edib. Heç şübhəsiz ki, bu da Gürcüstan, Türkiyə və İranın Ermənistanı bu məsələdə meydanda tək qoyması anlamına gəlir. Fakt budur ki, Ermənistan bölgədə təklənib və adıçəkilən dövlətlər ona bu yarışda heç bir dəstək vermir. Məlumdur ki, həm Türkiyənin, həm Gürcüstanın, həm də İranın yarışı boykot etməsinin səbəbi birbaşa oyunların işğal altında olan Azərbaycan torpaqlarında keçirilməsi ilə bağlıdır. Bu dövlətlər rəsmi şəkildə bəyan ediblər ki, oyunlar Ermənistanın işğal altında saxladığı Azərbaycan torpağında keçirildiyi üçün ora öz idmançılarını buraxmayıblar.
Siyasi şərhçilər qeyd edirlər ki, üç dövlətin ümumerməni oyunlarını boykot etməsi artıq bölgə dövlətlərinin Ermənistanın işğalçılıq siyasətinə qarşı çıxması anlamına gəlir. Ekspertlər bildirirlər ki, İran, Türkiyə və Gürcüstanın belə bir addım atması konkret olaraq Ermənistanın bölgədə təkləndiyini göstərir.
- “Türkiyənin Xankəndidə keçirilən tədbirə də yanaşmasının dəyişməməsi məntiqlidir”
Orta Doğu Araşdırmalar Mərkəzinin rəhbəri Sədrəddin Soltan “Bakı-Xəbər”ə bildirdi ki, üç dövlətin Ermənistanın qanunsuz olaraq Dağlıq Qarabağda, Xankəndidə keçirdiyi ümumerməni yay oyunlarını boykot etməsi çox müsbət haldır. “Türkiyənin Ermənistana münasibəti bəllidir. Bu baxımdan Türkiyənin Xankəndidə keçirilən tədbirə də yanaşmasının dəyişməməsi məntiqlidir. Gürcüstan isə ərazi bütövlüyü pozulan, işğala məruz qalan bir ölkədir. Rəsmi Tiflis işğal altında olan Gürcüstan torpaqlarında keçirilmiş idman yarışları və başqa tədbirləri həmişə pisləyib, bunu suveren hüququnun pozulması kimi qiymətləndirib. Ona görə də Gürcüstanın bu addımı daha çox öz vəziyyətinin göstəricisidir. İran əvvəllər ermənilərin bu tədbirinə evsahibliyi edib. Həmişə də Güney Azərbaycan türkləri və rəsmi Bakı tərəfindən qınanılıb. İranın hazırkı vəziyyəti Azərbaycanla münasibətləri pozmamağı diktə edir. Odur ki, rəsmi Tehran ermənilərin qanunsuz bir tədbirinə görə özünə əlavə problem yaşatmaq istəmir. Bundan başqa, işğal altında olan Xankəndidə keçirilən tədbirdə İran və Gürcüstandan olan ermənilərin birmənalı şəkildə iştirak etmədiyinə də heç təminat verə bilməz. Odur ki, İran və Gürcüstan bu tədbirə qatılmamaqla Azərbaycana minnət edə bilməz. Ancaq onların atdığı addım Azərbaycanın məsələyə münasibətinə uyğun olduğu üçün alqışlana bilər” - deyə S.Soltan vurğuladı.
İradə SARIYEVA
