Qənirə Paşayeva: “Prezidentin insanların qəza ilə bağlı üzləşdiyi problemlərin qısa zamanda həlli ilə əlaqədar tapşırıqlarını bəzi qurumlar...”
Məlum olduğu kimi, iyulun 2-də və 3-də Mingəçevir İstilik Elektrik Stansiyasında baş vermiş qəza nəticəsində enerji sektorunda böhran yaranıb. Belə ki, elektrik enerjisinin verilməsində saatlarla fasilələr olub, çoxlu sayda insan metro tunellərində qatarlarda qalıb, sənaye müəssisələri dayanıb. İqtisadiyyata və vətəndaşlara böyük miqdarda ziyan dəyib. Qəzadan sonra məsələni araşdırmaq üçün Dövlət Komissiyası yaradılıb.
Prezident İlham Əliyev ölkənin enerji sistemindəki vəziyyətlə əlaqədar keçirilən müşavirədə bəzi məmurlara yönəlik sərt tənqidi fikirlər səsləndirib. O deyib ki, əhalinin buna görə çəkdiyi əziyyətə görə onlar utanmalıdırlar: “Mən bunu giriş sözümdə qeyd etdim. Təkcə 15 il ərzində 2500 meqavat gücündə elektrik stansiyaları yaradılıb. Biz indi xarici ölkələrə elektrik enerjisini ixrac edirik. Ona görə isti havalarla bağlı istehlakın artması qəzanın səbəbi ola bilməz. Qəzanın səbəblərini komissiya araşdıracaq. Qeyd etdiyim kimi, bu məqsədlə komissiya yaradılıb və siz sadəcə olaraq xalq qarşısında, ölkə qarşısında utanmalısınız. Bu isti havada insanlara bu qədər əziyyət vermisiniz. Metroda qalanlar, qocalar, uşaqlar, qadınlar, xəstələr, liftlərdə qalanlar. İqtisadiyyata nə qədər böyük ziyan vurmusunuz. Təkcə Neft Şirkətinin burada deyilən ziyanını hesablasaq, məlum olur ki, ölkəyə nə qədər böyük iqtisadi ziyan dəyib”.
Bütün bu deyilənlərin fonunda, Prezidentin səsləndirdiyi haqlı iradlardan məmurlar hansı nəticələr çıxaracaqlar?
Sözügedən məsələni dəyərləndirən millət vəkili Qənirə Paşayeva məmurların iradlardan nəticə çıxaracaqlarına ümid edir: “Prezident İlham Əliyevin ölkənin enerji sistemində vəziyyətlə əlaqədar keçirdiyi müşavirə, əslində, bütün qurumlara bir xəbərdarlıq idi. Cənab Prezidentin müşavirəsində başını aşağı salıb duran bəzi məmurlar dövlət başçısının sərt tənqid və xəbərdarlığından, inşallah, nəticə çıxaracaqlar. Dövlət başçısı xalqın məmurlara demək istədiklərinin hamısını ciddi narazılıq və sərt xəbərdarlıqla söyləyib. Cənab Prezident hər zaman söylədiyi “biz hamımız, məmurlar, millət vəkilləri xalqın xidmətçiləriyik” yanaşmasını bu müşavirədə də ortaya qoydu. Görünən budur ki, məsələ təkcə tənqidlə bitməyəcək, ölkənin enerji sistemində yaranan problemin səbəbkarları qanun qarşısında cavab verəcəklər. Cənab Prezident bunu çox ciddi məsələ kimi qeyd etdi və irəli sürülən səbəbləri əsaslı hesab etmədiyini açıq şəkildə bildirdi. “Azərenerji” rəhbərinin qəzanın səbəbləri ilə bağlı açıqlamasına isə ən gözəl cavabı cənab Prezident verdi. “Xalq və ölkə qarşısında utanmalısınız” dedi. “Xalqa nə qədər əziyyət verdiyinizdən utanmalısınız” dedi. Cənab Prezident vətəndaşlara təşəkkürünü xüsusi vurğuladı. Kritik zamanda öz işinin öhdəsindən peşəkarlıqla gələn qurumları da vurğuladı. Çox ciddi mesajlar vardı. Prezidentin insanların qəza ilə bağlı üzləşdiyi problemlərin qısa zamanda həlli ilə əlaqədar tapşırıqlarını bəzi qurumlar tezliklə həll etməlidirlər. Özəlliklə isti yay günlərində bəzi yerlərdə su təchizatı və elektrik enerjisi ilə bağlı yaranmış problemlər tez bir zamanda öz həllini tapmalıdır. Təşəkkürlər, cənab Prezident, hər zaman olduğu kimi, bu müşavirədə də xalqın mənafeyinin hər şeydən üstün olduğunu ortaya qoydunuz”.
Vidadi ORDAHALLI
