Arzuxan Əlizadə: "Ölkədə bir sıra təsisatlar olsa da, reallıqda onlar formal xarakter daşıyır"
Rusiya və Azərbaycan çoxəsrlik birgə tarixə, sıx mədəni-humanitar, siyasi və iqtisadi əlaqələrə malik iki yaxın qonşu dövlətlərdir. Azərbaycan iki ölkə arasında ticari-iqtisadi, siyasi əlaqələrin daha da sıxlaşmasında maraqlı tərəf kimi çıxış edir. Rusiyaya qarşı Qərb tərəfindən sərt sanksiyalar tətbiq edildiyi dövrdə belə Azərbaycan xoş qonşuluq, ənənəvi tərəfdaşlıq münasibətlərini pozmayıb və sanksiyaları pisləyib.
Rusiya, eyni zamanda, müstəqil Azərbaycan dövlətinin ən böyük problemi olan Dağlıq Qarabağ münaqişəsinin həlli üzrə yaradılmış ATƏT-in Minsk Qrupunun həmsədridir. Minsk Qrupunun həmsədri kimi münaqişənin nizamlanmasında həlledici söz sahibi olmağa çalışır. Bu günlərdə Rusiyanın növbəti dəfə Ermənistana qiyməti milyardlarla dollar ölçülən ən müasir operativ-taktiki silahlar bağışlaması bəlli olub. Ermənistan Azərbaycan ərazilərini işğal etmiş və hərbi xunta tərəfindən idarə olunan militarist dövlətdir. Azərbaycan da Rusiyadan müasir silahlar alır. Ancaq məsələ ondadır ki, Azərbaycan Ermənistandan fərqli olaraq havayı silah almır. Sonuncu dəfə Ermənistana ötürülən silahların dəyəri işğalçı dövlətin büdcəsindən dəfələrlə böyükdür. Rusiya iqtisadi sanksiyalardan əziyyət çəkdiyi, ruslar "kəmər sıxma siyasəti"nə razılaşdığı bir zamanda belə bir addımın atılması başadüşülən deyil. Belə bir məntiq hasil olur ki, Rusiya Azərbaycana silah satışından əldə etdiyi qazancı eyni silahları Ermənistana havayı ötürməklə əvəzləyir. İstənilən halda, Ermənistana münasibətdə bu cür addımın atılması Rusiya vergi ödəyicilərinin hüquqlarının pozulması deməkdir. Çünki sözügedən müasir silahlar Rusiya vergi ödəyicilərinin büdcəyə etdiyi ödəmələr hesabına ərsəyə gəlir. Belə olan halda, vergi ödəyicilərinin buna etiraz etməsi üçün nə edilməlidir? Məsələyə münasibət bildirən AMİP-in baş katibi Arzuxan Əlizadənin sözlərinə görə, əslində belə bir addımın atılması Rusiya vergi ödəyicilərinin hüquqlarının kobud formada pozulması deməkdir: "Belə ki, milyonlarla dəyəri olan silah Ermənistana peşkəş edilib. Əslində burada yeni bir şey yoxdur. Ermənistanın var olma səbəbi əzəldən Rusiya olub. Rusiyanın himayəsi sayəsində bizim tarixi torpaqlarımızda Ermənistan adlı dövlət qurulub və ondan sonra da məlum fəlakətlər baş verib. 1997-ci ildə Rusiya Ermənistana 1 milyard dollar dəyərində silah hədiyyə etdi. Prinsipcə, Rusiyadakı vrgi ödəyiciləri Ermənistana edilən bu "jestə" öz etirazını bildirməlidir. Ona görə ki, böhran içində olan Rusiyanın pula ehtiyacı var. Ancaq onlar ya bunu etmir, ya da indiki şəraitdə edə bilməz. Çünki Rusiyada Vladimir Putinin qurduğu rejim avtoritar əsaslara söykənir. Ölkədə bir sıra təsisatlar olsa da, reallıqda onlar formal xarakter daşıyır. Bu həmin Rusiyadır ki, dünyanın gözü qarşısında Ukraynanın ərazi bütövlüyünü ilhaq etdi, Krımı özünə birləşdirdi. Halbuki, 20 ildən çoxdur keçmiş SSRİ dağılıb. Aralıq, keçid dönəmi deyildi ki, buna hansısa don geydirsinlər. Ona görə də hazırkı situasiyada Rusiya ictimaiyyətinin, vergi ödəyicilərinin buna etiraz etməsi real görünmür. Təbii ki, buna öz etirazını bildirsəydilər, yaxşı olardı. Ancaq Putinin idarəçiliyi dövrdə bunu edəcəkləri qeyri-real görünür".
Vidadi ORDAHALLI
