İŞİD İraq və beynəlxalq koalisiya qüvvələrinə qarşı Mosul şəhəri uğrunda gözlənilən döyüşdə kimyəvi silahdan istifadə edə bilər. Baki-xeber.com İngiltərənin “Times” qəzetinə istinadən xəbər verir ki, İŞİD artıq bu məqsədlə kimyəvi silah hazırlamağa başlayıb.
Onu da qeyd edək ki, terrorçuların bir neçə gün əvvəl İraqda yerləşən Amerika qoşunlarına qarşı kimyəvi raketdən istifadə etməsi ilə bağlı şübhələr var. Bununla bağlı açıqlama verən ABŞ hərbçisi deyir ki, raket Mosul yaxınlığında, Qayara-da yerləşən ABŞ qoşunlarının yaxınlığına atılan raket iprit tərkibli ola bilər.
Bir neçə ABŞ hərbçisinin evi olan əraziyə atılan raket nəticəsində xəsarət alan olmayıb. Bazada yerləşdirilən hərbçilər kimyəvi silahlardan qorunmaq üçün təchiz avadanlıqla olunublar.
Bu təsdiqlənərsə, İraqda yerləşən hərbi hissəyə ilk kimyəvi silahlı hücum sayıla bilər.
Bununla bağlı Pentaqonun məlumatında isə deyilir ki, sentyabrın 20-si, İraq vaxtı ilə günorta saatlarında, İraqda yerləşən hərbi bazanın qərbi qarışıq atəş hücumu altında qalıb: "İsitifadə olunan silahın qalıqlarından aparılan ilkin testin nəticələri ipritlə bağlı müsbət nəticə verib. Cihazlar, raket və ya minomyot qeyri-dəqiq və işlənməmiş olub".
Qeyd edilir ki, dezaktivasiyanın nəticələrinə görə, əməkdaşlardan heç birində ipritlə zəhərlənmə əlaməti olmayıb: "Bu hücum bizim ordakı missiyamıza heç bir halda təsir göstərməyib və biz ərazidə təhlükəsizlik məsələlərini dəyişməmişik".
Qeyd edək ki, İraq ordusu və beynəlxalq koalisiya qüvvələri İŞİD-in İraqdakı qalası hesab edilən Mosulu azad etmək üçün hərbi hazırlıqlarını davam etdirir. Hərbi səlahiyyətlilər və mütəxəssislərə görə, İŞİD də bu əməliyyatlara hazırlıqlar çərçivəsində kimyəvi silah toplayır.
Beynəlxalq koalisiya qüvvələrinin sözçüsü, amerikalı polkovnik Con Dorrian bildirir ki, İŞİD əvvəllər də kimyəvi silahdan istifadə edib: “İraq və Suriyada bir neçə döyüşdə istifadə etdiklərinə dair məlumatlar var".
Dorrian terrorçuların Mosulda hərbi əməliyyatlara qatılan qüvvələrə qarşı xardal qazı istifadə edəcəyi təhlükəsi olduğunu deyib: "Bu ehtimal var. İraq ordusunu buna hazırlamaq üçün təlimlər keçmişik”.
Regional Kürd və İraq rəhbərliklərinə məsləhətçilik edən ingiltərəli kimyəvi silah mütəxəssisi Hamiş də Breton-Gordon isə İraq ordusunun 17 min qaz maskası aldığını bildirib.
İngiltərə ordusunun kimyəvi, bioloji, radioaktiv və nüvə silahindan müdafiə qüvvələrinin keçmiş komandiri olmuş Breton-Gordon deyir ki, koalisiya qüvvələri son 18 aydır İŞİD-in kimyəvi silah proqramı ilə bağlı araşdırma aparır. Onun sözlərinə görə, İŞİD Mosulu əlində saxlamaq üçün hər şey edə bilər, bununla bağlı hazırlıq da görürlər.
Breton-Gordon İŞİD-in indiyə kimi təxminən 20 dəfə xlor və xardal qazından istifadə etdiyini, bu hücumlarda təxminən 15 nəfərin öldüyünü və yüzlərlə yaralı olduğunu bildirib.
O iddia edir ki, təşkilatın əlində 150 tona qədər kimyəvi silah ola bilər, ancaq terrorçuların əlindəki xardal qazının keyfiyyəti aşağı olduğunu da deyir.
Breton-Gordon İŞİD-in Əsəd rejiminin kimyəvi silah anbarlarını ələ keçirdiyi və əlində sinir qazı (sinir qazı və VX qazı) olduğuna dair xəbərlər olduğunu da söyləyir.
BMT-nin keçmiş kimyəvi silah mütəxəssisi Tim Trevan da İŞİD-in Mosul əməliyyatında böyük miqdarda xardal qazı istifadə edə biləcəyini deyir.
Moskva da İŞİD terrorçularının İraqda amerikalı və iraqlı əsgərlərə qarşı kimyəvi silahdan istifadə etməsini istisna etmir.
”Fikrimcə, bu həqiqətdir. İŞİD-çilər təkcə Suriyada deyil, İraqda da dəfələrlə kimyəvi silahdan istifadə ediblər. Bu, müəyyən edilmiş faktlardır. Bu, onu sübut edir ki, kimyəvi silah terrorçularına qarşı təkcə regional deyil, qlobal səviyyədə təcili tədbirlər görmək lazımdır", - deyə Rusiya Xarici İşlər Nazirliyinin departament rəhbəri Mixail Ulyanov bildirib.
İŞİD İraq və Suriyada uzun müddətdir nəzarətində olduğu ərazilərdə xam kimyəvi silahlar hazırlamaq və istifadə etməkdə şübhəli bilinir.
Xatırladaq ki, İraqın ikinci ən böyük şəhəri olan Mosul son iki il ərzində İŞİD-nin nəzarəti altındadır və onun geri alınması üçün döyüşlərin yaxın həftələrdə başlaması gözlənilir. Yerli döyüşçülərin hücuma hazırlaşmasına ABŞ qoşunları da kömək edir.
