Ölkəmizin əsas strateji müttəfiqi olan Türkiyənin təhlükəsizliyinə bu gün əsas təhdidin Suriya ərazisindən gəldiyi sirr deyil. Suriyada həm İŞİD, həm də radikal kürd yaraqlıları təhlükəsizlik baxımından qardaş ölkəyə problem yaratmaqda davam edir. Bunu önləmək üçün Türkiyə artıq müəyyən müddətdir ki, Suriyada hərbi əməliyyatlar həyata keçirir.
Son məlumatlar isə bu qənaətə gəlməyə əsas verir ki, Türkiyə Suriyadan gələn təhdidi birdəfəlik aradan qaldırmaq istəyir.
Bu fonda bəlli olub ki, Türkiyə Silahlı Qüvvələri Suriyada strateji mövqeyə malik olan Əl-Bab şəhərini İŞİD terror təşkilatından azad etmək üçün müxtəlif planlar üzərində dayanır. Türkiyə mediasının yazdığına görə, bu planlardan biri də Türkiyə Quru Qüvvələrinə bağlı piyada bölüklərinin Suriyaya girməsidir. Masada olan digər planlar isə xüsusi təyinatlılar, tank qoşunları və aviasiyanın əməliyyatda iştirakı ilə bağlıdır.
Xatırladaq ki, BMT Baş Assambleyasının 71-ci sessiyasında iştirak etmək üçün ABŞ-a səfər edən Türkiyə prezidenti Rəcəb Tayyib Ərdoğan hava limanında Əl-Bab əməliyyatında piyada qoşunların iştirak edə biləcəyinə dair planların olduğunu bildirib. Adı açıqlanmayan türkiyəli bir səlahiyyətli də Əl-Bab əməliyyatında piyada qoşunlarının iştirakının vacib olduğunu vurğulayıb. O da vurğulanır ki, Türkiyə Əl-Bab şəhəri ilə bağlı "B planı" hazırlayıb. Azad Suriya Ordusu şəhəri azad edə bilməyəcəyi halda "B planı" işə salınacaq. Məlumata görə, Azad Suriya Ordusunun bölgədə hazırda 1800 döyüşçüsü var. İŞİD-in isə 4 min döyüşçüsü Əl-Babı qorumaq üçün hazır vəziyyətdədir. Türkiyə mediasının hərbi mənbələrdən əldə etdiyi məlumatlara görə, Suriyadakı əməliyyatlar üçün 41 min hərbçi Türkiyə-Suriya sərhədində hazır vəziyyətdə gözləyir. Sərhəd bölgəsində zirehli texnikanın cəmlənməsi davam edir. Əməliyyatların əsas məqsədini isə Türkiyənin xarici işlər naziri Mövlud Çavuşoğlu açıqlayıb. O qeyd edib ki, Ankara Suriyanın şimalında yerləşən Menbiç və Əl-Bab şəhərlərini "İslam dövləti" terror qruplaşmasının döyüşçülərindən təmizləmək və orada təhlükəsizlik zonası yaratmaq fikrindədir: "Biz həmişə vurğulayırıq: yerüstü əməliyyat olmadan bu qanlı terror qruplaşmasının öhdəsindən gələ bilmərik. Bizim hədəfimiz Menbiç və Əl-Babı terrorçularından təmizləmək və sonra orada təhlükəsizlik zonasını yaratmaqdır". Çavuşoğlu əlavə edib ki, gələcəkdə Suriya Rakkası və iraq Mosulu kimi əhəmiyyətli şəhərləri də İŞİD terrorçularından azad etmək lazımdır.
Beləliklə, aydın görünür ki, Türikyə Suriyada əsas söz sahiblərindən birinə çevrilir. Bu fonda diqqət çəkən məqam odur ki, Rusiyanın Hərbi-Kosmik Qüvvələri (HKQ) Suriyada fəallığını artırıb. Müdafiə Nazirliyindəki mənbə "İzvestiya" nəşrinə bu xüsusda bildirib: "Terrorçuların yeni başlayan hücumlarını dəf edən Suriya qoşunlarına dəstək göstərilməsi zərurəti ilə əlaqədar HKQ tərəfindən həyata keçirilən döyüş uçuşlarının sayı sutkada 50-yə çatdırılıb". Federasiya Şurasının Müdafiə komitəsinin sədr müavini Frants Klintseviç "İzvestiya"ya bildirib ki, terrorçuların hücuma keçməsi ilə əlaqədar olaraq Rusiya HKQ-nin təyyarələri üçün yeni hədəflər ortaya çıxıb: "Suriyada atəşkəs rejimi pozuldu, yaraqlılar hücuma keçdilər və bu şəraitdə Suriya kəşfiyyatından daha çox məlumatlar daxil olmağa başladı, müvafiq olaraq HKQ üçün çoxlu sayda yeni hədəflər yarandı və o da quru qoşunlarına dəstək göstərmək üçün uçuşların sayını artırmaq məcburiyyətində qaldı". Bundan başqa bəlli olub ki, Rusiya göyərtəsində təyyarə daşıyan "Admiral Kuznetsov" nəhəng hərbi gəmisini Aralıq dənizinə göndərəcək. Rusiyanın müdafiə naziri Sergey Şoyqunun sözlərinə görə, hazırda Rusiyanın Aralıq dənizində 6 hərbi və 4 köməkçi gəmisi üzür.
Sergey Şoyqu deyib ki, Rusiya Aralıq dənizində hərbi gücünü artırmağı düşünür: "Bunun üçün də biz "Admiral Kuznetsov" gəmisini Aralıq dənizinə göndərəcəyik. Bu gəmi bizə Suriyada terrorçulara qarşı mübarizə üçün də yardım göstərəcək".
Qeyd edək ki, Qərb mediası Rusiyanın bu addımı Suriyada Bəşər Əsədi qorumaq üçün atdığını iddia edir. Xatırladaq ki, keçmiş SSRİ-də nəhəng hərbi gəmi hesab olunan "Admiral Kuznetsov" 1991-ci ildə modernləşdirilərək Rusiya hərbi donanmasının arsenalına verilib. Hətta SSRİ dövründə bu gəmi "əsrin nəhəngi" adlandırılıb. Bütün bunlar isə onu göstərir ki, Suriyada əsas güc Türkiyə və Rusiya olacaq. Bu həm də Yaxın Şərqdə bu dövlətlərin nüfuzunu sürətlə artırır.
Nahid SALAYEV
