Elşən Mustafayev: "Hətta türkdilli Orta Asiya ölkələrinin bir neçəsi "Gülən məktəbləri"ni bağlamaqdan imtina etdi"
Türkiyə prezidenti Rəcəb Tayyib Ərdoğan dünya ictimaiyyətini FETÖ ilə mübarizə aparmağa çağırıb. Ərdoğan BMT üzvlərinə ünvanlanan bu çağırışı təşkilatın Baş Assambleyasının iclasında çıxışı zamanı edib:
"Çevriliş cəhdi baş verən gecə 241 nəfər ölüb. Parlament, polis binalarına FETÖ-nün nəzarətində olan "F-16" qırıcıları tərəfindən zərbələr endirilib. Dinc sakinlərə atəş açıblar. Çevriliş cəhdinin qarşısı mərd vətəndaşlarımız tərəfindən alındı. Bu gün mən türk xalqının igidliyi hesabına sizin qarşınızda dururam. Bizim gələcəyimiz naminə mən BMT-nin bütün ölkələrini bu təşkilatla mübarizəyə çağırıram. Biz bunu bu gün etməsək, sabah artıq gec olacaq. BMT ölkələri məhz bu təşkilata görə təhlükə altındadır. FETÖ bir çox ölkənin bütün orqanlarına daxil ola bilib".
Ərdoğanın bu müraciəti nə dərəcədə perspektivli sayıla bilər?
Azərbaycan Milli İstiqlal Partiyasının sədr müavini Elşən Mustafayevin fikrincə, Ərdoğanın BMT-də etdiyi çıxışı tam perspektivsiz də adlandırmaq olmaz: "FETÖ doğrudan da dünyanın bir çox ölkəsində təşkilatlanmağı bacarıb. Ancaq heç də dünyanın bütün ölkələri Türkiyənin FETÖ ilə bağlı çağırışlarına "baş üstə" demədi. Hətta türkdilli Orta Asiya ölkələrinin bir neçəsi "Gülən məktəbləri"ni bağlamaqdan imtina etdi. Ancaq, göründüyü kimi, Türkiyə hökuməti uğursuz dövlət çevrilişindən sonra həmin təşkilatı sırf terrorçu elan etdi. Bunun üçün Türkiyənin əlində kifayət qədər əsaslar da mövcuddur. Ancaq bu iddiaları tam reallaşdırmaq böyük əziyyət, səy tələb edir. Hazırda ABŞ-da yaşayan Fətullah Gülənin Türkiyəyə təhvil verilməsi də reallaşmır. Deməli, hələ bu məsələyə ikili aspektdən yanaşan, kifayət qədər sübut, dəlil tələb edən ölkələr var. Buna görə BMT tribunası istənilən ölkə üçün həm də gözəl təbliğat ruporudur. Fikir verin, istənilən ölkə həmin tribunadan öz qlobal problemini səsləndirir. Ərdoğanın çıxışından belə başa düşülür ki, FETÖ-nü tam zərərsizləşdirmək Türkiyə üçün başlıca prioritetdir. Hesab edirəm ki, Ərdoğanın çağırışının effekti olacaq. Ən azından ölkələr bundan sonra həmin təşkilatla məsafə saxlayacaq, bəziləri isə birdəfəlik onlardan imtina edəcək. Türkiyədə ciddi fəsadlara səbəb olan çevriliş cəhdinin arxasında duran təşkilat doğrudan da təhlükəlidir".
Məhəmmədəli QƏRİBLİ
