Ramil Hüseynov: "Ümumi olaraq məsələni Qafqazdakı münaqişələr kontekstində iştirakçıların diqqətinə çatdırdı"
Sakitlik, firavanlıq və gələcək nəsillərin təhlükəsizliyi bir çox hallarda bizim qəbul edəcəyimiz qərarlardan asılıdır. Bunu Türkiyə prezidenti Rəcəb Tayyib Ərdoğan BMT Baş Məclisinin 71-ci sessiyasındakı çıxışında deyib.
Onun sözlərinə görə, bu gün yüz minlərlə uşaq, qadın və qoca planetin münaqişəli zonalarında, o cümlədən Suriya və İraqda qurban olur. Bununla belə, ölümdən və zorakılıqdan qaçan qaçqınlar Avropa şəhərlərində alçaldılır və təhqir edilir. Bununla yanaşı, o, Dağlıq Qarabağdakı vəziyyətə eyham vurub: "Regionda bir çox terror təşkilatları fəaliyyət göstərir. Qafqazda münaqişələrin daha təhlükəli - isti mərhələyə keçməsi risqi qalmaqdadır. Problemlər, həmçinin, Yəməndə və Ukraynada da qalır. Eyni zamanda bir çox ölkələrin sakinləri aclıqdan, yoxsulluqdan və xəstəliklərdən əziyyət çəkir. Bu mənzərə bəşəriyyət üçün biabırçılıqdır".
Türkiyə dövlətinin başçısının sözlərinə görə, dünyadakı mövcud böhran və problemlərin əksəriyyətinin yüngül həll yolları var.
R.T.Ərdoğan BMT-də təhlükəsizliyin təminatına dair qərarların qəbulu sahəsində islahatların keçirilməsinin vacibliyini də qeyd edib: "BMT-də islahatların aparılmasının vaxtı çatıb. Bu baxımdan baş katib Pan Gi Mun tərəfindən bundan əvvəl irəli sürülən təşəbbüslər çox mühümdür. İlk növbədə təhlükəsizliyin qorunması sahəsində qərarların qəbulu sistemində islahatlar keçirilməlidir. BMT TŞ-nin beş daimi üzvü təklikdə bu cür qərarlar verə bilmir".
Bütün hallarda, Ərdoğanın Qafqazdakı münaqişə ocaqlarının risq dərəcəsinə toxunmasını ekspertlər necə şərh edir?
Məsələyə münasibət bildirən VİP-in sədr müavini Ramil Hüseynovun sözlərinə görə, Ərdoğanın BMT-dəki çıxışında bu məsələyə toxunması müsbət haldır: "Düzdür, Türkiyə prezidenti Dağlıq Qarabağ məsələsinə bu dəfə xüsusi yer ayırmadı. Ümumi olaraq məsələni Qafqazdakı münaqişələr kontekstində iştirakçıların diqqətinə çatdırdı. Çünki Türkiyə üçün bu gün həlli vacib olan məsələ Suriyada və İraqda vəziyyətin nizama salınmasıdır. Ona görə ki, sözügedən ölkələrdə baş verənlər Türkiyəyə bu və ya digər dərəcədə təsir göstərir. Son iki ildə Türkiyədə terror risqi bu səbəbdən artıb. Türkiyədə 3 milyondan çox qaçqın məskunlaşıb. Bir belə qaçqını saxlamaq böyük vəsait tələb edir. Avropa və digər dövlətlərin bu yöndə Türkiyəyə yardımı sözdən o tərəfə keçmir. Halbuki, Qərb zamanında Suriya ərazisində təhlükəsizlik zolağının yaradılmasına razılıq versəydi, vəziyyət bu dərəcədə kritik səviyyəyə gəlib çıxmazdı. Görünür, bütün bunlara görə BMT tribunasında Dağlıq Qarabağ məsələsinə xüsusi yer ayıra bilməyib. Ancaq, istənilən halda, bu məsələyə ümumi olaraq toxunması pis deyil. Bir şeyi də nəzərə almaq lazımdır ki, Türkiyə Dağlıq Qarabağ məsələsində nə mümkündürsə onu edir. Elə məsələlər var ki, Türkiyədən asılı deyil. Fikrimcə, bunu da nəzərə almalıyıq". Vidadi ORDAHALLI
