Fətullahçı terror təşkilatına (FETÖ) qarşı qardaş Türkiyə həm ölkə daxilində, həm də xaricində mübarizəsini genişləndirməkdədir. Bunun nəticəsidir ki, bu terror təşkilatına üzv olanların böyük əksəriyyəti artıq neytral vəziyyətə gətirilib. Amma problemin tam həllini tapdığını da hələ demək olmaz.
Hadisələrin inkişaf axarı isə göstərir ki, terror qruplaşmasının ilk olaraq Türkiyədəki özəyinin tam sıradan çıxarılması nəzərdə tutulur. Bundan başqa, paralel şəkildə xaricdə də Gülənin neytrallaşdırılması əsas diqqət mərkəzində yer alır. Ankara bu xüsusda bir sıra ölkələr, xüsusən də Azərbaycanla işbirliyindən böyük məmnunluq ifadə edir. Türkiyənin baş naziri Binəli Yıldırım bu xüsusda qeyd edib: "Fətullahçı terror təşkilatına ilk ən sərt reaksiya verən dost və qardaş Azərbaycan oldu. Bu ölkə indi təşkilatın bütün əlaqələrini bir-bir ortaya çıxarır, məktəblərini bağlayır". O, daha sonra bildirib: "Bizim bu sahədə Azərbaycanla çox gözəl iş birliyimiz var. Buna görə türk milləti adından Azərbaycan Prezidenti İlham Əliyevə təşəkkür edirik. Azərbaycanla Türkiyə bir millət, iki dövlətdir".
Hazırda Türkiyənin əsas maraq dairəsində olan məqamlardan biri də Fətullah Gülənin ekstradisiyasına nail olmaqdır. Türkiyə prezidenti Rəcəb Tayyib Ərdoğan "Reuters"ə müsahibəsində yenidən bu məsələyə toxunub: "ABŞ fəaliyyəti bütün dünyada qadağan edilmiş terrorçu Fətullah Güləni gizlətməməlidir". Onun sözlərinə görə, Vaşinqton "Hizmət" hərəkatının ideoloqu Gülənin Türkiyəyə verilməməsinə bəraət qazandıra bilməz. Ərdoğan qeyd edib ki, Türkiyə hakimiyyəti Güləni iyulun 15-də dövlət çevrilişinə cəhddə ittiham edir və ABŞ da bunu bilir:"ABŞ bizim NATO üzrə strateji müttəfiqimiz və tərəfdaşımızdırsa, Gülənə belə təşkilatın əsasını qoymağa icazə verməməlidir".
Türkiyənin Ədliyyə Nazirliyi də növbəti dəfə ABŞ-dan Fətullahçı terror təşkilatının başçısı Fətullah Gülənin həbs olunmasını tələb edib. Nazirlik bununla bağlı ABŞ hökumətinə rəsmi müraciət göndərib. Ədliyyə Nazirliyi müraciətində Gülənin iyulun 15-də dövlət çevirlişinə cəhdə rəhbərlik etdiyini bildirib. Türkiyənin xarici işlər naziri Mövlud Çavuşoğlu isə Gülənlə bağlı yeni dosyelər hazırlandığını diqqətə çatdırıb:"Dövlət çevrilişinə cəhdlə bağlı yeni dosye hazırlayırıq. Onu da ABŞ-a təqdim edəcəyik". XİN başçısı qeyd edib ki, rəsmi Ankara ABŞ-ın Fəthullah Güləni Türkiyəyə təhvil verilməsini istəyir: "ABŞ prezidenti Barak Obama, vitse-prezident Co Bayden və dövlət katibi Con Kerri də bizə Fətullah Gülənin təhvil verilməsini istədiklərini söyləyib. Bunun üçün bizdən sübut istədilər. Biz də həmin faktları onlara təqdim edirik. Dövlət çevrilişinə cəhdlə bağlı yeni dosye hazırlayırıq. Onu da ABŞ-a təqdim edəcəyik. Bu sahədə ABŞ-la əməkdaşlıq edirik, ancaq biz nəticə əldə etmək istəyirik. Ən yaxşı nəticə Fətullah Gülənin təhvil verilməsidir".
Qeyd edək ki, FETÖ-nün başçısı 1999-cu ildən ABŞ-ın Pensilvaniya ştatında yaşayır. ABŞ bu şəxsin ekstradisiyasını müxtəlif bəhanələrlə uzadır. Halbuki, onun böyük təhlükə olduğunu ABŞ-da da tək-tək deyənlər var. Məsələn, ABŞ Milli Təhlükəsizlik Şurasının üzvü, akademik Abraham Vagner bildirir ki, terrorçubaşı Fətullah Gülən tez bir zamanda ekstradisiya edilməlidir. O, Gülənin ABŞ-ın sabitliyi üçün təhlükə yaratdığını deyib: "ABŞ Güləni Türkiyəyə təhvil verib, bu bəladan xilas olmaq istəyir. Lakin ekstradisiya məsələsinin hüquqi proses olması ciddi problemdir. Bu adamı qorumanın ABŞ-a heç bir faydası yoxdur. 15 iyul qiyam cəhdi türk ordusunda kök salmış gülənçi zabitlərin işi idi. Amma bu olduqca pis hazırlanmış təxribat idi. Hədəf Ərdoğanı və təmsil etdiyi hökuməti devirmək idi". Akademik dünyanın bir çox ölkələrində fəaliyyət göstərən Gülən məktəblərinin bağlanmasının vacibliyini də qeyd edib. Avropa Birliyinin genişlənmə və qonşuluq siyasəti üzrə komissarı Yohannes Xan da eyni mövqeni bölüşür:"Avropa Birliyi olaraq, Fətullah Gülənin necə böyük bir təhlükə təşkil etdiyini anlaya bilmədik. Keçmişdə bir çox çevrilişlə qarşılaşan Türkiyə bu dəfə qiyam cəhdinin qarşısını almağı bacardı. Türkiyəyə səfərimdə bir çox rəsmi şəxslərlə görüşüm oldu. Türk xalqı hələ də şokdadır. Anlayışlı olmalıyıq. Türkiyənin siyasi və iqtisadi sabitliyi üçün çalışmalıyıq".
Tahir TAĞIYEV
