ABŞ və digər NATO ölkələrinin Qafqaza artan marağı və burada hərbi cəhətdən möhkəmlənmək niyyətləri, gözlənildiyi kimi, Rusiyanı əhəmiyyətli dərəcədə qıcıqlandırır. Bu fonda Moskva regionda hərbi üstünlüyü əldən vermək niyyətində olmadığını açıq bəyan edir. Amma Qərb ölkələri də geri çəkilmək istəmir. Əksinə, bu günlərdə Gürcüstanda olmuş NATO-nun baş katibi Yens Stoltenberq Gürcüstan hökumətinə alyansa üzvlük məqsədilə islahatları davam etdirməyi məsləhət görüb.
Baş katib alyansın bu prosesdə Gürcüstana kömək edəcəyini qeyd edib: "NATO Gürcüstanı Şimali Atlantika strukturlarına üzv olmaqda dəstəkləyir. Mən təkrar edirəm və qeyd edirəm ki, biz Gürcüstana islahatlar prosesində kömək etməliyik. Mənim Gürcüstana bir əsas tövsiyəm var - islahatları davam etdirmək". Bundan əlavə, məlumdur ki, NATO Parlament Assambleyasının (PA) növbəti yaz sessiyası 2017-ci ilin mayında Tiflisdə keçiriləcək. Yens Stoltenberq bildirib ki, NATO PA-nın yaz sessiyasının gələn ilin mayında Tiflisdə keçirilməsi barədə qərar Şimali Atlantika Alyansının Gürcüstana, eləcə də bütövlükdə Cənubi Qafqaz regionuna diqqətin nümunəsidir. Digər tərəfdən, rəsmi Tiflis ərazisində NATO üzvlüyünə qədər ABŞ hərbi bazalarını yerləşdirməyə hazır olduğunu bildirir. Gürcüstan parlamentinin spikeri, "Respublika" partiyasının üzvü David Usupaşvili Gürcüstanda Amerika hərbi bazasının yerləşdirilməsini vacib saydığını bildirir. O bunun ölkə üçün vacib olduğunu hesab edir: "Gürcüstan NATO-dakı üzvlüyü real olana qədər ABŞ-ın və ya NATO-nun digər üzvlərinin hərbi bazasının ölkədə yerləşdirilməsinin qayğısına qalmalıdır. Bu, ölkəmizin təhlükəsizliyi və müdafiəsi üçün çox vacibdir". Kreml isə, əvvəlki kimi, sərhədlərində NATO qüvvələrinin peyda olmasına qarşıdır. Bu səbəbdən Qafqazda Rusiya hərbi qüvvələrinin sayı yenidən artırılır. Belə bir vaxtda Rusiya Müdafiə Nazirliyi elan edib ki, Cənub və Qərb strateji istiqamətləri ölkə silahlı qüvvələri üçün ən mühümüdür. Rusiya Silahlı Qüvvələri Baş qərargahının rəisi, general-polkovnik Valeri Gerasimovun sözlərinə görə, xüsusən Cənub hərbi Dairəsi yeni hərbi texnikanın alınmasında əhəmiyyətli üstünlüyə malikdir. O vurğulayıb ki, Rusiya Müdafiə Nazirliyi ən yeni hərbi texnika və silah növləri ilə ilk növbədə Cənub və Qərb hərbi dairələrinin qoşunlarını təchiz edir. Bura həm Şimali Qafqazda dislokasiya olunmuş qoşunlar, həm Xəzər və Qara dəniz donanması, eləcə də Cənub dairəsinin məsuliyyət zonasında yerləşdirilmiş digər qoşun birləşmələri daxildir.
O da açıqlanıb ki, hazırda cənub-qərb istiqamətində Rusiya ordusunun yeni qoşun birləşməsi - 150-ci motoatacı diviziya formalaşdırılır. Diviziya Rostov vilayətindəki üç poliqonda yerləşdiriləcək. Gələcəkdə isə Rusiya cənub-qərb istiqamətində yeni ordu formalaşdırılacaq. TASS rəsmi dövlət xəbər agentliyinin hərbi eksperti, istefada olan polkovnik Viktor Litovkin qeyd edib ki, indiki narahat dünyada yeni ordunun yaradılması Rusiya üçün zəruridir: "Rusiyanın cənubu məxsusi regiondur. Dağıstanda və Şimali Qafqazda terrorçular meydana çıxır. Ukrayna da bu istiqamətdədir, habelə Dağlıq Qarabağ, Suriya və Türkiyə uzaqda deyil. Orada bu gün-sabah təhlükəli vəziyyət yarana bilər. Habelə Rumıniyada artıq ABŞ-ın raketdən müdafiə obyekti yerləşdirilib. Bütün bunları nəzarətdə saxlamaq, maraqlarımızı qorumaq lazımdır. Ona görə də cənub-qərbdə yeni ordunun formalaşdırılması regionda meydana çıxan yeni təhlükələrə və çağırışlara təbii cavabdır". Xatırladaq ki, Rusiya ilə Ermənistan birgə qoşun qruplaşması yaratmaq üzərində işləyir. Gözlənir ki, birgə qoşun qruplaşmasına Ermənistan ordusunun 4-cü ordu korpusu və Rusiyanın 102-ci bazası daxil olacaq. Lakin bu qoşun qruplaşmasının hansı məqsədlə yaradıldığı hələ açıqlanmır.
Daha bir maraqlı cəhət odur ki, son illər Rusiya ən yeni döyüş gəmilərini məhz Xəzər donanmasının sərəncamına verir və müntəzəm olaraq bu qapalı dənizdə, yaxud göldə müharibə məşqləri keçirir. Hərbi ekspert Viktor Muraxovski bildirir ki, döyüş əməliyyatlarının məşq edildiyi səhnələr Rusiya ordusunun NATO ölkələri ilə döyüşə hazırlaşdığını ehtimal etməyə əsas verir:"Birincisi, başa düşmək lazımdır ki, bu teatr NATO-nun məsuliyyət zonası ilə təmasdadır. Türkiyə NATO-nun üzvüdür, bir çox Qara dəniz ölkələri alyansın tərkibindədir. İndiki münasibətlərə baxmayaraq, hərbçilər mümkün hərbi potensialdan çıxış edirlər və müvafiq ölkələrin, həmin ittifaqın ümumi imkanlarını nəzərə alırlar".
Nahid SALAYEV
