Qardaş Türkiyə ilə ABŞ arasında Fətullahçı terror təşkilatının lideri Fətullah Gülənlə bağlı qalmaqal səngiməmiş indi də səfir qalmaqalı yaranıb. Buna səbəb ABŞ-ın Türkiyədəki səfiri Con Bassın verdiyi açıqlamalardır. Səfirin açıqlamalarına türk rəsmilərindən kifayət qədər sərt reaksiya gəlib.
Hətta amerikalı diplomatın geri çağırılmasını istəyənlər də var. Özü də bütün bunlar Gülən olayının iki ölkə arasında münasibətləri əhəmiyyətli dərəcədə gərginləşdirdiyi bir dövrə təsadüf edir.
Yeri gəlmişkən qeyd edək ki, Türkiyə Fətullah Gülənin başqa ölkəyə qaçacağı ilə bağlı ABŞ-a xəbərdarlıq göndərib. Türkiyə Ədliyyə Nazirliyindən Fətullah Gülənin qaytarılması üçün ABŞ-a göndərilən tələbnamədə FETÖ liderinin 15 iyul hərbi çevriliş cəhdini təşkil etdiyi və prosesə rəhbərlik etdiyi üçün axtarışda olduğu qeyd edilərək, bu şəxsin qaçma ehtimalı yüksək qiymətləndirilib: "Onun Kanada, Cənubi Afrika kimi üçüncü bir ölkəyə qaçacağına dair kəşfiyyat məlumatlarımız var. Başqa bir ölkəyə qaçmadan təcili olaraq tutun". Xatırladaq ki, Türkiyənin xarici işlər naziri Mövlud Çavuşoğlu ölkəsinin ABŞ-da yaşayan Fətullah Gülənin müvəqqəti həbsini tələb etdiyini bildirmişdi: "Gülənin müvəqqəti həbs tələbini səbəbləri ilə birlikdə ABŞ-a göndərmişik. ABŞ Fətullah Gülənin dərhal həbsini təmin etməli, onun oradan Türkiyəyə mesajlar verməsinə mane olmalıdır. Daha sonra isə onun Türkiyəyə ekstradisiya edilməsini və bu xain terrorçunun Türkiyənin mühakiməsinə təslim edilməsini istəyirik". O, ABŞ-ın əlindəki terrorçuları təslim etməli olduğunu söyləyib: "Bu xain terrorçunun Türkiyənin mühakiməsinə təslim edilməsini istəyirik. Bunun üçün nə lazımdırsa, edirik. Ölkədən qaçanların bir qismini gətirmişik. Digərlərinin isə yerini müəyyən etmişik. Yunanıstandakı prosesi də yaxından izləyirik". Türkiyənin belə tələblər səsləndirdiyi bir vaxtda isə, yuxarıda qeyd olunduğu kimi, indi də iki ölkə arasında səfir qalmaqalı yaranır. Belə ki, bu günlərdə Türkiyədə PKK-ya dəstək verən 28 bələdiyyə başçısı, seçki yolu ilə seçilmələrinə baxmayaraq, postlarından uzaqlaşdırılıb. Onların yerinə yeni sədrlər təyin olunub. Ankaranın bu addımı ABŞ-ın narahatlığına səbəb olub. Amerikanın Ankaradakı səfiri isə bir qədər də irəli gedərək, məsələyə sərt münasibət bildirib. Səfir Amerikanın Türkiyə hökumətinin 28 yerli özünüidarəetmə orqanının rəhbərinin PKK və FETO ilə əlaqəli olduğuna görə vəzifəsindən uzaqlaşdırılması qərarından narahat olduğunu bildirib. Mövlud Çavuşoğlu ABŞ səfirliyinin bəyanatını şərh edərkən bu mövqeyinin yolverilməz olduğunu diqqətə çatdırıb: "ABŞ-ın Ankaradakı səfiri Türkiyənin qubernatoru deyil, o öz səlahiyyətlərini diplomatik münasibətlər haqqında Vyana konvensiyasına uyğun şəkildə icra etməlidir".Daxili işlər naziri Süleyman Soylu isə səfirin geri çağrılmasının daha doğru addım olduğunu bildirib.
Belə bir vaxtda, türk mediasının araşdırmalarına görə, səfir Con Bass Artvin bölgəsinə gizli səfər edib. Yayılan məlumata görə, C.Bass Artvin bölgəsinə gizli səfər edərək, oradakı xalqı təxribata çəkib. Qeyd olunur ki, C.Bass ilk olaraq Artvinin Savaşat qəsəbəsinə gedib və Meydancık kəndini ziyarət edib. Kənddə su elektrik stansiyası (SES) ilə bağlı bölgə xalqı ilə gizli görüşlər keçirib. Daha sonra Artvinin digər qəsəbəsi olan Yusufelinə gedib. Orada da SES-in inşası ilə bağlı görüşlər keçirib. Onun Artvində üçüncü ziyarəti isə şəhərin mərkəzində olub. Mərkəzdəki Atilla Vadisini ziyarət edərək bölgə xalqı ilə SES-lərin inşası ilə bağlı görüşlər keçirən ABŞ səfiri vətəndaşları təxribata cəlb etməyə çalışıb.
Qeyd edək ki, bu bölgədə SES-lərin inşasına camaat ciddi etiraz edir. Hətta bundan öncə bölgə əhalisi kütləvi aksiyalar da keçirmişdi. Görünür, ABŞ səfiri bölgə əhalisini ayağa qaldırmaq üçün məhz SES məsələsini qabardaraq, planlarını onun üzərində həyata keçirmək niyyətindədir. Səfirin səfərində diqqət çəkən məqamlardan biri də onun diplomatik yox, mülki nömrəli avtomobildə olması olub. Bütün bunlar isə Türkiyə hökuməti tərəfindən qəbuledilməz sayılır və səfir daxili işlərə müdaxilədə ittiham edilir. Məsələ Çavuşoğlu ilə ABŞ dövlət katibi Con Kerri arasında telefon danışığı zamanı da müzakirə olunub. Amma ABŞ-ın səfirlə bağlı hansı addımlar atacağı hələ bəlli deyil.
Nahid SALAYEV
