"Putinlə Obama arasında ən qısa zamanda baş tutacaq görüşdə bu razılaşma tam elan olunacaq"
Rusiya prezidenti Vladimir Putin bəyan edib ki, ölkəsi ABŞ-la Suriyadakı vəziyyətə dair razılaşmanın əldə olunmasına yaxındır. Bu barədə Putin Çində olarkən "Bloomberg"ə müsahibəsində bildirib. "Biz tədricən düzgün istiqamətdə hərəkət edirik. Yaxın gələcəkdə razılığa gələcəyimizi və beynəlxalq birliyə razılaşmamızı təqdim edəcəyimizi istisna etmirəm", - deyə Putin qeyd edib.
Xatırladaq ki, Vladimir Putin və Barak Obama Çində keçirilən G20 sammiti çərçivəsində görüş zamanı Suriya böhranını müzakirə ediblər. Bu müzakirələrin davam etdirilməsinə dair razılıq əldə olunub.
Suriya məsələsində ABŞ-la Rusiyanın razılaşma əldə etməsi nə dərəcədə real görünür?
Politoloq Qabil Hüseynli qəzetimizə açıqlamasında bildirdi ki, Putinin dediyi variant tam mümkündür: "Suriyada vəziyyət tam dəyişib. Hesab edirəm ki, yaxın günlərdə biz bunun tam şahidi olacağıq. Dünyanın iki super gücü və Türkiyənin hazırda hədəfi birdir. Artıq dəqiq müəyyənləşib ki, Suriyada sülhün yaradılmasına başlıca mane olan İŞİD-dir. Türkiyə ilə ABŞ Rakka şəhərinə hücumla bağlı razılıq əldə ediblər. Rusiyanı da ABŞ həmin prosesdə iştiraka dəvət edib. Məndə olan məlumata görə, Rusiya bu məsələdə yaxından iştirak edəcək. Türkiyənin quru əməliyyatlarda Suriyanın ərazisində öz ordusu ilə iştirak etməsini tərəflər arasında əldə edilən razılaşmanın detalı kimi dəyərləndirə bilərik. Əks halda bu mümkün olmazdı. Hesab edirəm ki, Putinlə Obama arasında ən qısa zamanda baş tutacaq görüşdə bu razılaşma tam elan olunacaq".
Məhəmmədəli QƏRİBLİ
