Arzuxan Əlizadə: “Bütün bunlar Rusiyanın iqtisadi vasitələrdən bir siyasi təzyiq aləti kimi istifadə etdiyini göstərir”
Ermənistanın Avropa İttifaqı (Aİ) ilə yaxınlaşması ilə bağlı müzakirələr Rusiya ilə ticarət dövriyyəsinin kəskin azalmasına səbəb olub. Bu barədə Rusiyanın baş nazirinin müavini Aleksey Overçuk məlumat verib.
Overçuk bildirib ki, ilkin hesablamalara əsasən, iki ölkə arasında ticarət dövriyyəsi təxminən 5,1 milyard dollar azalıb. Onun sözlərinə görə, Ermənistanın Aİ-yə mümkün üzvlüyü ilə bağlı müzakirələr fonunda rusiyalı iş adamları erməni tərəfdaşlarla əməkdaşlıqda daha ehtiyatlı davranmağa başlayıblar. Rusiya rəsmisi qeyd edib ki, Moskva hələ 2024-cü ilin sentyabrında İrəvanı bu istiqamətdə mümkün risklər barədə xəbərdar edib. Nəticədə, 2024-cü ildə 11,5 milyard dollar təşkil edən qarşılıqlı ticarət dövriyyəsi 2025-ci ilin ilk aylarının yekunlarına görə təxminən 6,4 milyard dollara düşüb.
Sözügedən məsələ ilə bağlı fikirlərini baki-xeber.com-la bölüşən AMİP sədri, millət vəkili Arzuxan Əlizadə hesab edir ki, bütün bunlar Rusiyanın iqtisadi vasitələrdən bir siyasi təzyiq aləti kimi istifadə etdiyini göstərir: “Əvvəla, nəzərə almaq lazımdır ki, Rusiya üçün müttəfiq anlayışı yoxdur. Rusiya ilə o dövlət müttəfiqlik edə bilər ki, həmin dövlət onlardan güclü olsun. Yoxsa belə də kiçik dövlətlərlə əməkdaşlıqda Rusiya onlarla vassal kimi davranır. Budur Rusiyanın dövlət siyasətinin mahiyyəti. Əvvəl Qarabağ kartı var idi və Moskva bundan istifadə edərək həm Azərbaycana, həm də Ermənistana təzyiq göstərirdi. İndi bu, neçə ildir ortadan qaldırıldığı üçün Ermənistana iqtisadi təzyiq göstərilir. Özü də seçkilərin yaxınlaşdığı bir dövrdə. Ermənistanın Aİ ilə yaxınlaşma siyasəti artıq iqtisadi göstəricilərdə mənfi dinamika yaradıb. Çünki 2024-cü ilin martında Ermənistan parlamenti Aİ-yə üzvlük prosesinin başlanması ilə bağlı qanun layihəsini müzakirəyə çıxarıb. Bu da Rusiyanı narahat edir. Bəli, bir il ərzində Rusiya ilə Ermənistan arasında ticarət dövriyyəsi 5 milyarddan çox azalıb. Ancaq biz onu da nəzərə almalıyıq ki, Ermənistan kimi kiçik ölkənin 2024-cü ildə Rusiya ilə ticarət dövriyyəsinin 11,5 milyard dollar təşkil etməsi heç də real iqtisadi əsaslara söykənmirdi. Belə böyük rəqəm Ermənistanın Rusiyanın iqtisadi sanksiyalardan yayınmasında vacib rol oynamasından irəli gəlirdi. Bunu da həm Ermənistanda, həm də Rusiyada yaxşı bilirlər. Bu isə iki ölkə arasında ticarət əlaqələrinin süni olaraq şişdiyini göstərir. Qərb də Ermənistana təzyiq göstərməməkdən ötrü bunu görməzdən gəldi. İndi Rusiya digər ölkələrin hesabına sanksiyalardan yayına bildiyi üçün istəmir ki, Paşinyan hökuməti bundan dividentlər əldə etsin. Çünki bundan əldə edilən gəlirlər Paşinyan hakimiyyətinin aktivinə yazılırdı. Üstəlik, Ermənistanın Avroittifaqla yaxınlaşma kursu götürməsi Rusiyanın açıq təhdidlərə keçməsinə səbəb olub. Onlardan biri də iqtisadi təzyiq rıçaqlarının işə salınmasıdır”.
Vidadi ORDAHALLI
