Rövşən Abbasov:“Azərbaycan üçün risk isə yalnız hava axınları vasitəsilə mümkündür”
Rusiya və İran xarici işlər nazirləri Buşehr nüvə elektrik stansiyasına qarşı ehtiyatsız hücumlara son qoyulmasını tələb ediblər. Rusiya Xarici İşlər Nazirliyinin mətbuat xidmətinin məlumatına görə, aprelin 5-də Rusiya və İran xarici işlər nazirləri Sergey Lavrov və Abbas Əraqçi telefon danışığı zamanı Buşehr Atom Elektrik Stansiyasına edilən ehtiyatsız hücumlara son qoyulmasına çağırıblar. Bəyanata görə, söhbət İran tərəfinin təşəbbüsü ilə baş tutub.
Nazirlər, BMT Təhlükəsizlik Şurası da daxil olmaqla, böhranın həlli üçün siyasi və diplomatik səylərin irəliləməsi üçün qalan şansları sarsıda biləcək hərəkətlərdən çəkinməyə çağırdılar.
“Onlar, MAQATE-nin mühafizəsi altında olan Buşehr Atom Elektrik Stansiyası da daxil olmaqla, mülki, sənaye və enerji infrastrukturuna qarşı ehtiyatsız və qanunsuz hücumların dərhal dayandırılmasının vacibliyini vurğuladılar. Onlar işçilərinin həyatı və sağlamlığına təhdid yaratmağın və bütün region üçün radioaktiv fəlakət riskinin qəbuledilməz olduğunu vurğuladılar”-deyə rəsmi bəyanatda qeyd olunub.
İranın Buşehr Atom Elektrik Stansiyasına İsrail və ABŞ-ın zərbələri doğrudan da dağıdıcı təsir edərsə, yayılan nüvə şüasının, radiasiyanın Azərbaycana, ümumiyyətlə bölgəyə gəlib çatması, buralara da yayılması nə qədər ehtimal olunur? Bölgəni nə gözləyir? Ekoloji problemlər kəskinləşə bilərmi?
Mövzu ilə əlaqədar ətraf müht məsələəri üzrə ekspert Rövşən Abbasov baki-xeber.com-a bildirdi ki, bu hadisə baş verərsə bunun zərbəsi ilk növbədə İranın özünə dəyər: “Buşehr AES-də ciddi partlayış və ya radiasiya buraxılışı baş verərsə, ən böyük zərbə ilk növbədə İranın cənubuna və Fars körfəzi regionuna dəyər. Azərbaycan üçün risk isə yalnız hava axınları, yəni külək və atmosfer sirkulyasiyası vasitəsilə mümkündür və bu, tamamilə həmin andakı meteoroloji şəraitdən asılıdır. Əgər külək şimala doğru yönələr və xüsusilə yağıntı müşahidə olunarsa, radioaktiv hissəciklər müəyyən miqdarda Azərbaycana çata bilər. Belə bir halda təsirlər genişmiqyaslı dağıntıdan çox, torpaq, su ehtiyatları və kənd təsərrüfatı üzərində çirklənmə şəklində özünü göstərər. Sağlamlıq baxımından risklər də əsasən uzunmüddətli və aşağı və ya orta səviyyəli təsirlər kimi gözlənilir, ani və böyük fəlakət xarakteri daşımır”.
İradə SARIYEVA
