Əli Orucov: “Mehdiyev radikalların mövcudluğunda maraqlı olub”
Məlumata görə, Ramiz Mehdiyev Rusiya hakimiyyəti ilə radikal müxalifətin münasibətlərini tənzimləyir və aralarında etimad yaradır. Çünki Ramizin Moskvada qədimdən dərin kökləri var idi.
Radikallar isə Qərb strukturları qarşısında Ramizin imicini təmizləməklə məşğul olurdular. Ona görə ki, radikalların Qərbdə də keçmişdə himayəçiləri olub.
O baxımdan maraqlıdır, radikallarla Mehdiyevin arasında belə bir razılaşmanın olması ehtimal oluna bilərmi? Yəni onların arasında belə bir gizli sövdələşmə olub ki, onlar Qərbdə Ramizin imicini təmizləməklə məşğul olsunlar, Ramiz də bunun qarşılığında radikallarla Moskva arasında əlaqələr yaratmaq və Rusiya hakimiyyəti ilə münasibətləri tənzimləməklə məşğul olsun. Ümumən, belə bir razılaşma ola bilərdimi?
“O, radikallarla istənilən sövdələşməyə, onları qorumaq üçün istənilən çirkin vasitəyə əl ata bilər”
Sözügedən məsələni “Bakı-Xəbər”ə şərh edən AMİP funksioneri Əli Orucov, prinsipcə, belə bir sövdələşmənin ola biləcəyini istisna etmədi: “Əvvəla, Ramiz Mehdiyevdən hansı pislik, xəyanət desən gözləmək olar. Ona görə ki, Azərbaycanda bütün pisliklərin, neqativlərin başında Mehdiyev dayanıb. Partiyalar arasında nifaq yaradan, qarşıdurmalara səbəb olan Mehdiyev olub. Onun Azərbaycana pislikdən başqa zərrə qədər də olsun bir xeyri dəyməyib. Heç kəsə sirr deyil ki, Mehdiyev Rusiyaya bağlı bir fiqur olub. Azərbaycanda onun Rusiyaya bağlı olduğunu, deyərdim ki, bilməyən yoxdur. Zaman-zaman Mehdiyevin xaricdəki söyüş blogerləri ilə bağlılığı, onları maliyyələşdirdiyi barədə informasiyalar olub. Bir sıra şəxslər barəsində xaricə informasiyalar ötürdüyü barədə məlumatlar yayılıb və bunların kifayət qədər əsası olub. İndi, məlum olduğu kimi, Mehdiyev ev dustağıdır və barəsində geniş istintaq gedir. Hesab edirəm ki, istintaqın gedişi bir sıra gizli məqamları ortaya çıxaracaq və Mehdiyev şəbəkəsinin qolları aşkara çıxacaq. Məsələ ondadır ki, Rusiyanın dəstəyi ilə Mehdiyev 25 illik dövr ərzində ölkədə öz şəbəkəsini qurub. İndi onların bir çoxu üzdə Mehdiyevi söysələr də, əslində onlar maskalanıblar. Unutmaq olmaz ki, Mehdiyev radikalların mövcudluğunda maraqlı olub. Çünki lazım gələndə onlardan öz məqsədləri üçün istifadə edib. Dolayı yollarla rəy yaratmağa çalışıb ki, guya Mehdiyev olmasa ölkədə sabitlik pozular və s. Ona görə də Mehdiyev radikallarla istənilən sövdələşməyə, onları qorumaq üçün istənilən çirkin vasitəyə əl ata bilər. Mehdiyevin nəzarət altında olduğunu nəzərə alsaq, bu indi onun üçün o qədər də asan olmayacaq. Ancaq unutmaq olmaz ki, onun uzun illər formalaşdırdığı şəbəkə hələ tam ifşa olunmayıb. Güman edirəm ki, Mehdiyevlə bağlı aparılan istintaq bütün bunları ortaya çıxaracaq”.
Vidadi ORDAHALLI
