Fikrət Yusifov: “Zəngəzur dəhlizi açılana qədər digər marşrutlar işə düşə bilər”
Ermənistan xarici işlər nazirinin müavini Vaqan Kostanyan bildirib ki, İrəvanla Bakı arasında dəmir yolu əlaqəsinin bərpası ilə bağlı müzakirələr yalnız TRIPP (Zəngəzur dəhlizi) layihəsi ilə məhdudlaşmır.
Onun sözlərinə görə, nəqliyyat kommunikasiyalarının blokdan çıxarılması üzrə ümumi gündəlik çərçivəsində müəyyən məsləhətləşmələr aparılır və “TRIPP marşrutu” adlandırılan istiqamətlə yanaşı, digər dəmir yolu imkanları da nəzərdən keçirilir.
Maraqlıdır, Zəngəzur dəhlizi açılmadan Azərbaycan digər dəmir yolunun - Qazax-İcevan dəmir yolunun açılmasına razılıq verərmi? Yaxud da bu dəmir yolu Zəngəzur dəhlizindən əvvəl fəaliyyətə başlaya bilərmi?
“İqtisadi müstəvidə əlaqələr qurulduqca, bu, siyasi müstəvidə münasibətlərin normallaşmasına müsbət təsir edəcək”
Sözügedən məsələ ilə bağlı fikirlərini “Bakı-Xəbər”lə bölüşən sabiq maliyyə naziri, professor Fikrət Yusifov bununla bağlı bir sıra məqamlara toxundu: “Azərbaycanla Ermənistan arasında 30 ildən çox bir zaman kəsiyində yaranmış hərbi münaqişə, qarşıdurma və ərazilərimizin işğalı səbəbindən yaşanan hadisələr fonunda münasibətlərdə böyük bir uçurum yaranmışdı. Yəni iki dövlətin, xalqın nə vaxtsa yenidən barışmaq, bir araya gəlmək, sülh müqaviləsi imzalamaq şansları bu illər ərzində çox uzaq görünürdü. Ancaq bu ilin avqustunda Vaşinqtonda iki ölkə arasında sülh müqaviləsinin paraflanması praktiki olaraq bu buzların əriməsinə səbəb oldu. İki tərəf arasında etimad quruculuğu istiqamətində mühüm bir addım atıldı. İndi Azərbaycanla Ermənistan arasında sülh sazişinin imzalanması yaxınlaşır. Təbii ki, belə olan halda münasibətlərdə yaranan boşluqların zaman-zaman aradan qalxması vacib şərtlərdən biridir. O baxımdan hesab edirəm ki, Zəngəzur dəhlizi açılana qədər bəzi addımların atılmasında bir təbiilik var. Qazaxıstan taxılının ölkəmiz üzərindən Ermənistana daşınmasına Prezident İlham Əliyevin verdiyi razılıq bu yöndə atılan praktiki addımlardan biridir. Ermənistanın yanacağa olan tələbatının Azərbaycanın enerji resursları hesabına ödənilməsi ilə bağlı aparılan müzakirələr bunun davamıdır. Yəni bütün bunların hamısı iki ölkə münasibətlərində illər uzunu yaranan buzların əriməsinə, münasibətlərin normallaşmasına xidmət edən göstəricidir. Fikrimcə, bunlar baş verməlidir. Düzdür, münasibətlərin düzəlməsi asan olmayacaq. Ona görə ki, hər iki tərəfdən minlərlə insan həlak olub, onların yaxınları var və s. Ancaq iqtisadi müstəvidə əlaqələr qurulduqca, bu, siyasi müstəvidə münasibətlərin normallaşmasına müsbət təsir edəcək. Zəngəzur dəhlizi açılana qədər digər marşrutlar işə düşə bilər. Qazaxıstan taxılının Azərbaycan üzərindən daşınması bunun əlamətlərindən biridir. Ancaq bütün bunlar o demək deyil ki, Zəngəzur dəhlizi arxa plana keçir. Təbii ki, yox. Sadəcə, bu, müəyyən vaxt tələb etdiyindən digər alternativ yollar işə düşə bilər”.
Vidadi ORDAHALLI
