Akif Nağı: “...Ağır şəkildə cəzalandırılmalıdırlar”
Ağır müharibə cinayətləri törətməkdə təqsirləndirilən Ermənistan vətəndaşlarının cinayət işləri üzrə açıq məhkəmə prosesinin baxış iclasında təqsirləndirilən şəxslər, onların müdafiəçiləri, zərərçəkmiş şəxslərin bir qismi, onların hüquqi varisləri və nümayəndələri, həmçinin dövlət ittihamını müdafiə edən prokurorlar iştirak edib.
Zərərçəkmiş şəxslərin nümayəndəsi Şaiq Hüseynov çıxışında deyib ki, müdafiəçilərin mütləq əksəriyyətinin müdafiə nitqi formal mülahizələrə əsaslanıb: “Təkcə təkzibedilməz bir faktı qeyd etmək yetərlidir ki, iş üzrə təqsirləndirilən şəxslərin istisnasız olaraq hamısı tərksilah edilməklə saxlanıldığı zaman ya onların üzərində, ya da yaşayış yerində aparılmış axtarış zamanı müxtəlif növ silah və döyüş sursatı aşkar edilərək götürülüb”.
Ş.Hüseynov dövlət ittihamçılarının təklifi nəzərə alınmaqla, təqsirləndirilən şəxslərin barəsində ittiham hökmünün çıxarılmasını məhkəmədən xahiş edib.
Zərərçəkmişlərin digər nümayəndələri Aydın Hacıyev çıxışında təqsirləndirilən şəxslərə ədalətli cəza verilməsini məhkəmədən xahiş edib: “Təqsirləndirilən şəxslərə ədalətli cəza təyin etməklə, eyni zamanda, zərərçəkmiş şəxslərin hüquqları qismən də olsa bərpa edilmiş olar. Çünki onların konstitusion hüquqları, yaşamaq hüququ, təhlükəsizlik hüququ, mülkiyyət hüququ, mənzil hüququ, təhlükəsiz yaşamaq hüququ kimi hüquqları Ermənistan silahlı qüvvələrinin və təqsirləndirilən şəxslərin birbaşa fəaliyyətinin nəticəsi olaraq pozulub”.
Zərərçəkmişlərin digər nümayəndəsi Rauf Abdullayev çıxışında təqsirləndirilən şəxslərin layiqli cəzaya məhkum olunmalarını məhkəmədən xahiş edib.
Göründüyü kimi, məhkəmədə zərərçəkmiş şəxslər, eləcə də onların nümayəndələri separatçılara ən ağır cəzanın verilməsini məhkəmədən xahiş ediblər.
“Zərərçəkmişlər, zülmə məruz qalmışların haqlı mövqeyi, tələbi birmənalı olaraq nəzərə alınmalıdır”
Azad Vətən Partiyasının sədri Akif Nağı “Bakı-Xəbər”ə bildirdi ki, məhkəmə prosesi olduqca obyektiv gedib, zərərçəkənlər həm şahidlər, həm də zərərçəkən qismində dindirilib: “Çoxlarının bilmədiyi çox dəhşətli faktlar ortaya çıxıb. Dünya da bilməlidir ki, ermənilər bizə qarşı çox amansız cinayətlər törədiblər, vəhşiliklər ediblər. Həm ümumi şəkildə erməni vəhşiliyi barədə mənzərə yaranıb, həm də orada olan şəxslərin cinayət məsuliyyəti, törətdikləri cinayətlərlə bağlı şahidlər, zərərçəkmişlər ifadə verib. Ona görə də bu tam şəkildə ədalətli bir məhkəmədir. Ədalət məhkəməsidir. Kimin nə deməsindən aslı olmayaraq erməni separatçıları ağır şəkildə cəzalandırılmalıdır. Mətbuatda gedən məlumatlara görə, vəkilləri onlara bəraət verilməsi meylindədirlər. Bilmirəm, onlar dünya praktikasınamı əsaslanıb belə bir mövqe ortaya qoyurlar? Amma bəraətdən söhbət gedə bilməz. Onlar öz cinayətlərinin cəzasını almalıdırlar. Bu məsələdə siyasi konyunktura rol oynamamalıdır.
Azərbaycan rəhbərliyi dəfələrlə Ermənistan rəhbərliyinə deyib ki, biz sülh müqaviləsinin imzalanmasında, normal qonşuluq münasibətlərində maraqlıyıq. Amma bu o demək deyil ki, Ermənistan hakimiyyətinin, Ermənistan ordusunun, ermənilərin, xaricdən gətirilən Ermənistan vətəndaşları olmayanların xalqımıza, dövlətimizə qarşı törətdikləri cinayətləri unutmalıyıq. Azərbaycan rəhbərliyi bunu dəfələrlə bəyan edib.
Ona görə də bu istiqamətdə proseslər davam etməlidir, faktlar ortaya qoyulmalıdır və ermənilərin heç biri cəzadan yayına bilməməlidir”.
A.Nağının fikrincə, burada müəyyən motivlər ola, böyük dövlətlər təsir etmək cəhdlərində, xahişlərdə buluna bilərlər, amma onlar qətiyyən nəzərə alınmamalıdır. A.Nağının sözlərinə görə, ermənilər bu cür vəziyyətlərdə qapı-qapı düşüb özlərinə dəstək axtarırlar, Ermənistan rəhbərliyi, kilsə, ayrı-ayrı ictimaiyyət nümayəndələri də həmçinin. A.Nağının qeyd etdiyinə görə, erməni kilsəsi, erməni müxalifəti, eləcə də Paşinyan hakimiyyətinin nümayəndələri xarici səfərlərdə, tədbirlərdə, görüşlərdə əllərinə bir fürsət düşən kimi böyük dövlətlərin, beynəlxalq qurumların rəhbərlərindən, deputatlardan xahiş edirlər Bakıda mühakimə olunan separatçılarla bağlı Azərbaycan dövlətinə təsir etsinlər. “Ermənistanın daxilində bu siyasi bir alətə çevrilib. Ona görə də həm Ermənistan hakimiyyəti, həm də müxalifət Azərbaycanda üzərlərində ədalət məhkəməsi qurulan hərbi canilərlə əlaqədar manipulyasiya etməyə, yanlış ictimai rəy yaratmağa çalışırlar. Ermənistanın içində sanki bir yarış gedir ki, kim separatçıları daha çox müdafiə edir, onların mövqeyindən daha çox çıxış edir. Onların qohumları ilə görüşürlər, emosional vəziyyətlərindən istifadə etməyə çalışırlar. Bunlar hamısı detallardır, ciddi məsələ deyil. Azərbaycan dövlətinin mövqeyi var. İkincisi də, bu məhkəmədir və məhkəmənin qərarına heç kim təsir edə bilməz. Onlar cəzalarını almalıdır, Azərbaycan ərazisində cəzalarını çəkməlidirlər.
Azərbaycan məhkəməsi heç vaxt onları cinayət məsuliyyətindən azad etməməlidir. Müstəsna hal kimi Azərbaycan Prezidentinin əfv etmə səlahiyyəti var. Onlar da elə ağır cinayətlər törədiblər ki, Azərbaycan Prezidentinin əfv etmə kateqoriyasına düşə bilməzlər...”
A.Nağının sözlərinə görə, zərərçəkmişlərin məhkəmədən xahişi tam haqlıdır və onların cinayətləri heç bir halda bağışlana bilməz. “Zərərçəkmişlər, zülmə məruz qalmışların haqlı mövqeyi, tələbi birmənalı olaraq nəzərə alınmalıdır. Hesab edirəm ki, zərərçəkmişlər tamamilə haqlıdır, onlar tam şəkildə öz cəzalarını çəkməlidir. Bu yalnız zərərçəkmişlərin deyil, bütövlükdə Azərbaycan cəmiyyətinin tələbidir, sosial sifarişdir”-deyə A.Nağı bildirdi.
İradə SARIYEVA
