Faiq Balabəyli: “Rusiyada yaşayan miqrantlara, xüsusən də müsəlmanlara, azərbaycanlılara qarşı kobud münasibət sərgilənir”
Xəbər verildiyi kimi, Rusiya xüsusi təyinatlı polis dəstəsi (SOBR) Voronej vilayətində Azərbaycan diasporunun nümayəndələrinə qarşı əməliyyat keçirib. Məlumata görə, əməliyyat nəticəsində bir neçə diaspor üzvü saxlanılıb. Rusiya mediasının yazdığına görə, saxlanılan arasında Niyaz Zahidov adlı şəxs var.
Onun kriminal aləmin üzvü olduğu və Alekseyevski bazarına nəzarət etdiyi qeyd olunub. Zahidovun Rusiya Federasiyası pasportunun əlindən alındığı və qanunsuz miqrantların saxlanılma məntəqəsinə göndərildiyi bildirilib.
Qeyd etdiyimiz kimi, məlum şəxsin bazar avtoriteti olduğu iddia edilir. Ancaq onu da bildirək ki, bu hadisələr Azərbaycan diasporuna qarşı Rusiyada xoşagəlməz dalğanın yenidən qalxdığını hiss etdirir. Maraqlıdır, hazırda Rusiyada azərbaycanlılara qarşı nə baş verir?
“Azərbaycan diaspor üzvlərinə qarşı kobud rəftar düzgün deyil, onların hansı formada saxlanıldığını sosial mediada bilərəkdən yaymaq başqa niyyətlərdən xəbər verir”
Müstəqil.az-ın redaktoru, VHP-nın siyasi Şurasının üzvü Faiq Balabəyli “Bakı-Xəbər”ə şərhində bildirdi ki, uzun müddətdir Rusiyanın miqrantlara qarşı sərt hərəkətləri gündəmdədir. Bu münasibətlər zaman keçdikcə daha da sərtləşir: “Xatırladım ki, Rusiyada yaşayan miqrantlara, xüsusən də müsəlmanlara, azərbaycanlılara qarşı kobud münasibət sərgilənir. Məlumat üçün deyim ki, Rusiyada əmək bazarının geriləməsi ilə bağlı həyacan təbili belə çalınıb. Buna baxmayaraq, Rusiyada Azərbaycandan olan soydaşlarımızla sərt şəkildə davranılır. Azərbaycan diasporu, iş adamları Rusiyada digər millətlərlə müqayisədə özlərini daha qürurlu aparıb, həmin ölkənin qanunlarına tam şəkildə riayət etsələr də, onları qane etməyən bəzi məsələlər var. Bu da ondan irəli gəlir ki, Rusiya dövləti 2024-cu ildə Azərbaycan təyyarəsi vurulandan sonra baş verən hadisələr və siyasi davranışlar onları qane etməyib. Bunun fonunda Rusiyada yaşayan həmvətənlərimizə qarşı təzyiqlər artırdı. Təzyiqləri isə insanlara qarşı zor tətbiq etmək, həbs etməkdir. Zahidovun avtoritet olduğu üçün saxlandığı iddia edilir. Azərbaycan diaspor üzvlərinə qarşı kobud rəftar düzgün deyil. Onların hansı formada saxlanıldığını sosial mediada bilərəkdən yaymaq başqa niyyətlərdən xəbər verir”.
Günel CƏLİLOVA
