Mübariz Göyüşlü: “Təqsirləndirilən şəxslər törətdikləri əməli təfsilatı ilə etiraf etməsələr də, faktlar göz qabağındadır”
Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəmə prosesi davam edir.
Məhkəmə zamanı vəkil Şaiq Hüseynov bildirib ki, həm ibtidai, həm də məhkəmə istintaqı zamanı təqsirləndirilən şəxslərin, demək olar hamısının törətdikləri əməldən səmimi peşmanlıq hissi keçirmədiyini nümayiş etdirmələri də nəzərə alınmalıdır.
Bu isə o deməkdir ki, cinayətkarlar öz əməllərini tam şəkildə etiraf etmək istəmir.
“…Peşman olduqlarını desələr də, baş verənlər sıradan cinayət hadisəsi deyil”
"Müasir İnkişaf" İctimai Birliyinin sədri, siyasi şərhçi Mübariz Göyüşlü “Bakı-Xəbər”ə açıqlamasında qeyd etdi ki, təqsirləndirilən şəxslər törətdikləri əməli təfsilatı ilə etiraf etməsələr də, faktlar göz qabağındadır: “Onların törətdiyi əməl qeyri-insanidir. Bu məsələyə artıq hüquqi-siyasi qiymət verilir. Məlumdur ki, Ermənistan bu məsələ ilə bağlı çox ciddi şəkildə Azərbaycana basqı etmək istəyir”.
Həmsöhbətimiz onu da əlavə etdi ki, məlum məhkəmə prosesində çoxsaylı cinayətlərin törədildiyi faktlarla sübut olunub: “Mən bir neçə dəfə həmin məhkəmə prosesində iştirak etmişəm, zərərçəkənlərin ifadələri insanı dəhşətə gətirir. Xocalı faciəsi və digər ərazilərin işğalı zamanı insanlıq əleyhinə cinayətlər törədilib. Onlar başqa bir dövlətin ərazisində separitizmlə məşğul olub, “dövlət” qurmuşdular. Təbii ki, bu cür əməlləri törədənlər cəzalandırılmalıdır. Arayik Harutyan ifadəsində deyib ki, Gəncəyə raket hücumuna göstəriş verib. Bu əməli etiraf edən şəxs necə cəzasız qala bilər? Təqsirləndirilən şəxslər sözdə peşman olduqlarını desələr də, baş verənlər sıradan cinayət hadisəsi deyil. Azərbaycana qarşı hərbi təcavüzü nəticəsində insanlıq əleyhinə cinayətlər, müharibə cinayətləri törədənlər qanunvericiliyin tələbinə uyğun olaraq sərt şəkildə cəzalandırılmalıdır”.
Günel CƏLİLOVA
