Elşən Manafov: “Bu məsələdə kilsə müxalifətdə olan erməni millətçi siyasi partiyaları ilə işbirliyindədir”
Beynəlxalq Xristian Həmrəyliyi insan haqları təşkilatı “Artsax” nümayəndəliyində aparılan axtarışlarla bağlı bəyanat yayıb.
“CSI, Artsax Milli Assambleyasının insanların vətənlərinə qayıtmaq kimi beynəlxalq səviyyədə tanınmış hüququnu müzakirə etmək üçün çağırdığı iclasdan sonra 11 dekabrda İrəvanda “Artsax Respublikası”nın Daimi Nümayəndəliyinə polis basqını ilə bağlı dərin narahatlıq keçirir. Ermənistan hakimiyyətini dinc toplaşmaq hüququnu qorumağa və “Artsax” xalqının institutlarına siyasi təzyiq göstərmək üçün hüquq-mühafizə orqanlarından istifadə etməkdən çəkinməyə çağırırıq”, - təşkilatın bəyanatında deyilir.
Göründüyü kimi, Beynəlxalq Xristian Həmrəyliyi təşkilatı Qarabağdan könüllü köçüb getmiş ermənilərin məsələsini bitməyə qoymur və hər şeyi yenidən alovlandırırlar. Niyə? Nədir bunların məqsədi?
“Kilsə bu mövzunu gündəmdə saxlamaqla ondan korporativ maraqlar naminə yararlanmaq istəyir”
Sözügedən məsələyə aydınlıq gətirən politoloq Elşən Manafov “Bakı-Xəbər”ə açıqlamasında bununla bağlı bir sıra məqamlara toxundu: “Erməni Apostol Kilsəsi Beynəlxalq Xristian Həmrəyliyi təşkilatına daxil olan ən qədim dini konfessial təşkilatlardan biridir. Bu kilsə Roma imperiyası ilə, demək olar ki, eyni əsrdə xristian dinini dövlət dini səviyyəsinə qaldırdığını iddia edir və buna söykənərək ermənilərin xristianlığı ilk qəbul edən xalqlardan biri olması barədə tarixi gerçəkliklərdən uzaq bir fikrin Qərb ictimaiyyəti tərəfindən qəbul olunmasına nail olub. Burada qeyd etmək yerinə düşər ki, Qarabağ uğrunda erməni diasporasının maliyyə dəstəyi ilə başlanmış mübarizədə kilsə xristian həmrəyliyi ideyasından yararlanmağa çalışıb. Erməni millətçilərinin kilsə ilə bu sahədə iş birliyi informasiya müharibəsinin tərkib hissəsi olmaqla, tərəflərin siyasi mahiyyət kəsb edən korporativ maraqlarının realizə edilməsinə yönləndirilib. Kilsə və millətçilərin xristian həmrəyliyi müstəvisi üzərində qurduqları əməkdaşlıq Cənubi Qafqazda nüfuz dairəsi uğrunda mübarizədə tərəf olan Qərbdəki bəlli dairələrin də maraqlarına cavab verdiyindən, onlar Azərbaycanda, xüsusilə Qarabağda guya ermənilərə məxsus tarixi memarlıq, dini abidələrin vandalizmə məruz qalmaları barədə cəfəng fikirləri gündəmdə saxlamaqla ölkəmizdə qeyri-müsəlmanların dini, ideoloji, hətta etnik zəmində təqiblərə məruz qalmaları, insan hüquq və azadlıqlarının rəsmi Bakı tərəfindən kobud şəkildə pozulması ilə gerçəkliklərdən uzaq məsələlərdən Avropa institutlarında dövlətimizə qarşı təzyiq vasitəsi kimi istifadə etməyə çalışmışlar. Avropa Birliyinin, habelə ATƏT-in, onun Minsk Qrupunun da, Azərbaycanla bağlı siyasətində bu amillər həmişə izlənilib. Bəlli beynəlxalq təşkilatların rəsmi Bakı ilə münasibətlərində ikili standartlar məhz bunlarla əlaqədar olub. Nəzərə almaq lazımdır ki, Paşinyan iqtidarının Azərbaycanla münasibətlərin normallaşdırılması məqsədilə irəli sürdüyü və dəstəklədiyi "Real Ermənistan" konsepsiyası erməni Apostol Kilsəsinin mühafizəkar rəhbərliyi tərəfindən qəbul edilmir. Bu məsələdə kilsə müxalifətdə olan erməni millətçi siyasi partiyaları ilə iş birliyindədir. Ermənistanda parlament seçkiləri ərəfəsində etiraz elektoratının dəstəyini qazanmaq, üstəlik, Paşinyan tərəfdarları cərgəsində səslərin parçalanmasına nail olmaq məqsədilə kilsə Qarabağ erməniləri ilə bağlı mövzunu gündəmdə saxlamaqla ondan korporativ maraqlar naminə yararlanmaq istəyir”.
Vidadi ORDAHALLI
