Elşad Həsənov: “PKK üzvləri arasında Türkiyəyə qarşı terror cinayətlərində əli olmayan adamları aşkarlamaq çox çətindir”
PKK-nın Türkiyə daxilindəki ünsürlərinin, eləcə də bölgədəki silahlı və qanunsuz birləşmələrin, xüsusən İraq və Suriyadakı silahlı və qanunsuz birləşmələrin dağıdılması və tərksilahın davam etdirilməsi üçün "terrorsuz Türkiyə" prosesi başladılıb.
Məsələ burasındadır ki, hazırda Türkiyədə “terrorsuz Türkiyə” prosesinin həyata keçirilməsi yolunda bir sıra çətinliklər meydana çıxıb. Onlardan biri də PKK terror təşkilatının üzvlərinin içərisində əli qana batmamış, cinayət törətməmiş şəxslərin müəyyən edilməsi və əfv olunması ilə bağlıdır.
Əlbəttə, bunu demək asandı, amma onların cinayət törətmədiyi necə müəyyənləşdirilə bilər? Nəzərə alsaq ki, onlar uzun illər dağlarda döyüşüb vuruşmuş adamlardır. Proseslər fonunda əhali arasında da ciddi narahatlıq var və ictimaiyyətdən də səslər eşidilir ki, seçimin dəqiq aparılacağına necə təminat verilə bilər? Yəni necə təminat verilə bilər ki, əli qana bulaşmış cinayətkarlar qaçıb gizlənə bilməyəcək, yaxud özlərini təmizə çıxaranmayacaqlar? Bu proses necə həyata keçiriləcək? Əli qana batmamış PKK terrorçularının doğrudan da müəyyənləşdirilməsi üçün etibarlı bir mexanizm varmı ki, onu tətbiq etməklə doğrudan da cinayətlərdə əli olmayan adamlar müəyyən olunsun? Ümumiyyətlə sual yaranır, bu adamlar PPK üzvü olublarsa və dağlarda yaşayıblarsa, necə ola bilər ki, onlardan kiminsə əli cinayətə batmasın? İctimaiyyətin suallarından biri məhz budur. Orada cinayət törətməmiş adam necə qala bilərdi? Bir insan ki, gecə-gündüz dağlarda döyüşür, gecələr kəndlərə basqın edir, terror törədir, belə insanların cinayətə bulaşmaması necə müəyyən edilə bilər ki? Cinayətdə əlləri olmayan adamları PKK-da niyə saxlayırdılar?
“...İstintaqın çox ağır və böyük səyləri nəticəsində üzə çıxa bilər...”
Siyasi ekspert Elşad Həsənov “Bakı-Xəbər”ə bildirdi ki, PKK terror təşkilatıdır və bir çox Avropa ölkələri, ABŞ onu terror təşkilatı kimi tanıyıb. Bu terror təşkilatının vaxtilə Sovet dönəmində Kommunist Partiyası, SSRİ “KQB”si tərəfindən yaradıldığını deyən E.Həsənovun sözlərinə görə, məqsəd də NATO dövləti olan Türkiyəni içindən parçalamaq idi. PKK-ya silah-sursat baxımından SSRİ-nin dəstək verdiyini qeyd edən siyasi ekspertin bildirdiyinə görə, 40 ildən artıq bir müddət ərzində PKK-nın həyata keçirdiyi terror aktları nəticəsində Türkiyədə 40 mindən artıq insan öldürülüb. “Nəhayət Türkiyə prezidenti Rəcəb Tayyib Ərdoğanın apardığı siyasət nəticəsində PKK-nın həbsdə olan rəhbəri Abdullah Ocalan silahı yerə qoymaq və dağlardan enmək istədiklərini bildirdi. “Terrorsuz Türkiyə”nin amalının sülh, əminamanlıq, barış olması doğrudan da bu dövlətin inkişafı deməkdir. Amma PKK üzvləri arasında müəyyən şəxslərin məsuliyyətə cəlb edilməməsi, onların əfvinə fərman verilməsi məsələsi Türkiyə ictimaiyyətini düşündürür, onlarda müəyyən suallar yaradır. Türkiyəyə qarşı əllərində silah dağlarda vuruşmuş adamların içində ola bilər ki, əli qana batmamış adamlar var. Ancaq hesab edirəm ki, PKK-nın tərkibində Türkiyəyə qarşı terror cinayətlərində iştirak etməyən adamların sayı çox az ola bilər. Onların müəyyən edilməsi çox çətindir. Çünki əlinə silah götürüb dağlara çıxan, hökumətə qarşı çıxan adam artıq cinayətkardır, o cinayət törədib. Bu baxımdan da, PKK üzvləri arasında Türkiyəyə qarşı terror cinayətlərində əli olmayan adamları aşkarlamaq çox çətindir. Amma bütün hallarda, çətin də olsa, onları müəyyən etmək mümkün olacaq. Çünki hansı terror aktında, hansı cinayətdə hansı terror qrupunun hansı üzvlərinin iştirak etməsi, yaxud etməməsi istintaqın çox ağır və çox böyük səyləri nəticəsində üzə çıxa bilər.
Məqsəd silahını təhvil verib təslim olan insanların hamısının həbs edilməsi deyil. Elə bir məsələ də yoxdur. Barış o deməkdir ki, onlar silahı yerə qoyurlar və dinc həyata başlayırlar”.
E.Həsənov hesab edir ki, barış və sülhün əldə olunması üçün cinayət törədən və törətməyənlərə qarşı bütövlükdə amnistiya elan olunmalıdır, onlar dinc həyata qayıdıb Türkiyənin gələcəyi üçün çalışmalıdırlar. “Türkiyə ictimaiyyətini narahat edən məsələlər gündəmdədir. Bu hər yerdədir. Bu məsələ yalnız siyasi qərarın verilməsi ilə öz həllini tapa bilər. Əgər onların hamısına aministiya tətbiq olunmasa, kim cinayət törədib, kimin əli qana batıb, onların araşdırılmasına başlanılsa həmin terrorçular yenidən birləşib terror aktlarını davam etdirəcəklər, yenidən Türkiyənin daxilində ciddi təlatümlər yaradacaqlar. Ona görə də, fikrimcə, qəbul olunan ən düzgün qərar o olardı ki, Türkiyə hökuməti PKK terror təşkilatının tərkibində bu ölkəyə qarşı döyüşənlərin hamısını əfv etsin və onlar dinc həyata başlasınlar. Təbii ki, o adamları da nəzarətsiz buraxmaq olmaz. Əfv olunsalar da daim nəzarətdə olmalıdırlar, hərəkətləri müntəzəm surətdə izlənilməlidir ki, gələcəkdə belə hadisələr baş verməsin. Bu hadisənin başqa cür yozumu, izahı yoxdur. Fikrimcə, belə olarsa Türkiyədə barış əldə olunar və Türkiyə daha da inkişaf edər”-deyə E.Həsənov qeyd etdi.
İradə SARIYEVA
