Akif Nağı: “AB komissarlarının bu “əliaçıqlığı”, “səxavəti” məqsədlidir, bununla çalışırlar ki...”
Avropa Birliyi (AB) 2026-cı il parlament seçkilərindən əvvəl Ermənistanın informasiya məkanının qorunmasını maliyyələşdirəcək. Bu barədə xarici media məlumat yayıb. Qeyd olunur ki, Avropa rəsmiləri xarici müdaxilə və dezinformasiya risqlərinə işarə edərək Moldovadakı "Rusiya izi" ilə paralellər aparırlar.
Artıq bu istiqamətdə Avropa Birliyi hərəkətə keçib. Belə ki, AB-nin Xarici İşlər üzrə Ali Nümayəndəsi Kaja Kallas 15 milyon avroluq yardım paketi elan edib. Bu vəsaitlər mina təmizləmədən tutmuş regionda etimadın artırılması tədbirlərinə qədər geniş təşəbbüslər üçün nəzərdə tutulub, lakin AB-nin bəzi səyləri kibertəhlükəsizliyə də yönələcək. Bundan əlavə, AB-nin Genişlənmə üzrə Komissarı Marta Kos 5 milyon avroluq yardım paketi elan edib. Kosun sözlərinə görə, bu tranş 2026-cı il seçkilərindən əvvəl dezinformasiyanın müəyyən edilməsində və qarşısının alınmasında əsas rol oynamalı olan vətəndaş cəmiyyəti və müstəqil medianı dəstəkləməyə yönəlib. Avropalı diplomat bu vəsaitləri Ermənistanın daxili sabitliyi və islahatların davam etdirilməsi üçün "vacib" adlandırıb. Kibertəhdidlərə və Aİ terminologiyasında FIMI kimi tanınan xarici informasiya manipulyasiyasına qarşı mübarizə aparmaq üçün ayrıca 12 milyon avroluq yardım paketi elan edilib.
Avropa komissarları İrəvana dalbadal pul ayırır, 15 milyon Kallas, 5 milyon Kos,12 milyon da başqası ayırıb.
“Bütün maraqlar seçkilərin ətrafında cəmləşib və prosesləri tam şəkildə idarə etməyə...”
Azad Vətən Partiyasının sədri Akif Nağı “Bakı-Xəbər”ə bildirdi ki, Qərbin Ermənistanda xüsusi maraqları var və ən azından Nikol Paşinyanın hakimiyyətdə qalmasında maraqlıdır. A.Nağı qeyd etdi ki, hələlik Qərbin alternativ namizədi olmadığı üçün bütün səylərini Paşinyanı dəstəkləməyə yönəldiblər. “Hazırda Ermənistanda gedən bütün proseslər 2026-cı ilin yayında keçiriləcək parlament seçkiləri ilə bağlıdır. Yəni Ermənistanda keçirilən parlament seçkiləri Qərb üçün də həlledicidir, Rusiya da nəyisə dəyişməyə ümid edir. Bu istiqamətdə Rusiya da fəallaşıb. Qərbin fəallığı daha nəzərəçarpacaq dərəcədədir, çünki onun maliyyə imkanları genişdir, amma Rusiyanın elə bir imkanları artıq qalmayıb. Ukrayna ilə müharibə Rusiyanın maliyyə imkanlarına da çox ağır zərbə vurub. Neftdən gələn gəlir xeyli azalıb, artıq ortaya çıxa, gələn gəlirləri başqa istiqamətə yönəldə bilmirlər. Sanksiyalar artıb, neftdən gələn gəlir azalıb, Rusiya nefti üçün artıq qiymət tavanı müəyyənləşib...Rusiyanın Ermənistanda prosesləri maliyyələşdirmək üçün ciddi imkanları yoxdur, amma Qərbin, Avropanın maliyyə imkanları genişdir. Ona görə də onlar bundan istifadə etməyə çalışırlar. Bütün maraqlar seçkilərin ətrafında cəmləşib və prosesləri tam şəkildə idarə etməyə çalışırlar. Bunların dediklərinə görə, bu maliyyə dəstəyi seçki öncəsi informasiya təhlükəsizliyinin qorunması ilə bağlıdır. Yəni Rusiya da bu istiqamətdə təxribatlar apara bilər. Bu gün dünyanı informasiya ilə, sosial şəbəkələrlə, müəyyən feyk məlumatları yaymaqla idarə edirlər. Bunu hər kəs bilir. Görünən tərəf odur ki, zərərli informasiya təhlükəsinin qarşısını almaq üçün bu maliyyə ayrılır. Amma məsələnin görsənməyən tərəfi var, ola bilsin, daha artıq həcmdə maliyyə ayrılıb və artıq Avropa mütəxəssisləri Ermənistanda oturub bu işlərlə məşğuldurlar. Ola bilsin ki, AB komissarlarının ayırdığı o böyük maliyyə vəsaitinin əhəmiyyətli hissəsi elə öz mütəxəssislərinə xərclənir. Onlar Ermənistanda Qərbin xəttini yeridirlər, orada informasiya təhlükəsizliyi ilə bağlı bir sistem, şəbəkə yaradırlar, onlara da yüksək maaş verilir.
Digər tərəfdən, Ermənistana dalbadal maliyyə ayırmaqla Rusiyanı da məcbur edirlər ki, nə qədər çətinlik olsa da Rusiya da ona qarşı dayanmaq üçün maliyyə yardımı ayırsın. Vaxtilə SSRİ-ni dağıdan da Qərb daxildəki müəyyən prosesləri təşkil edirdi və SSRİ-ni müəyyən maliyyə xərclərinə getməyə məcbur edirdi, əlavə xərclər də SSRİ-nin çökməsinə səbəb oldu. Təxminən eyni ssenari üzrə işi Rusiya ilə də aparırlar. Rusiyanı da maliyyə ayırma yarışına qoşmaq istəyirlər ki, Rusiyanın vəziyyəti daha da ağırlaşsın. Məsələ təxminən belədir.
Qərbin, AB komissarlarının bu “əliaçıqlığı”, “səxavəti” məqsədlidir, bununla çalışırlar ki, Paşinyan hakimiyyəti devrilməsin, əlini gücləndirsin, seçkidə qalib olsun. Bu ona yönəlib”.
A.Nağının sözlərinə görə, biz bu məsələlərə Azərbaycan dövlətinin maraqları ilə yanaşırıq, doğrudan da seçki prosesində Qərb indiki Ermənistan hakimiyyətini dəstəkləmək istəyirsə, bu onların öz işidir. Partiya sədrinin fikrincə, amma onlar heç bir halda bunu o səviyyəyə çatdırmamalıdırlar ki, rəsmi İrəvan Azərbaycana qarşı hansısa iddialarla çıxış etsin. “Bilirsiz ki, Ermənistanla Avropa Birliyi arasında imzalanan əməkdaşlıq sənədində Azərbaycanın əleyhinə olan və etiraz etdiyimiz müəyyən ifadələr işlədilib. Bu sənəddə Azərbaycana qarşı yanlış və saxtakar bir mövqe sərgilənib. Buna da Azərbaycanın Xarici İşlər Nazirliyi sərt reaksiya verdi. Əgər Qərbdə Azərbaycana qarşı belə qondarma iddialarla çıxış edirlərsə, bu mövqeni Ermənistanda hakimiyyətin siyasətinə çevirmək istəyirlərsə, bunu Azərbaycan mənfi qarşılayır və qarşılamalıdır da. Ermənistanı bu məqsədlə maliyyələşdirirlərsə və onların üzərinə bu öhdəliyi qoyurlarsa, onda bu, Azərbaycana qarşı planlaşdırılmış bir addım, xətt ola bilər”.
A.Nağı qeyd etdi ki, N.Paşinyan son açıqlamalarında Qarabağdan köçüb getmiş ermənilərin geri qayıtmasını zərərli və sülh prosesinə mane ola biləcək bir məsələ kimi qiymətləndirib, bunun mümkün olmadığını deyib. “Paşinyan öz mövqeyini açıqlayıb ki, ermənilərin Qarabağa qayıtması mümkünsüzdür, bu ziyanlı məsələdir. Amma Qərb hələ də bu mövqedən əl çəkmir. Çünki ondan Azərbaycana qarşı bir təzyiq vasitəsi kimi istifadə etməyə çalışır. Ona görə də onu Ermənistan hakimiyyətinin gündəminə gətirmək istəyirlər. Onların İrəvana maliyyə yardımının bir şərti də ondan ibarətdir ki, Ermənistan hakimiyyəti bu məsələni Qərbin istəyi ilə gündəmə gətirsin. Bu baxımdan da onların maliyyə yardımını Azərbaycana qarşı yönəlmiş qərəzli bir addım kimi dəyərləndirmək lazımdır. Hesab edirəm ki, Azərbaycan rəhbərliyi bunları bilir və nəzərdə saxlayır, müəyyən çərçivələr daxilində hələ ki, bunların bu açıqlamalarına tolerant yanaşır. Etirazını da bildirir. Azərbaycan öz uğurları ilə göstərir ki, bu cür cəhdlərin heç bir mənası yoxdur, Azərbaycan bütün beynəlxalq öhdəliklərə əməl edərək özünün suveren hüquqlarını bütün ərazilərində bərpa edib”-deyə A.Nağı qeyd etdi.
İradə SARIYEVA
