Azər Həsrət: “İran, Rusiya və Ermənistan Azərbaycana qarşı dezinformasiya savaşı aparıb, aparır...”
İran İslam Respublikası ilə İsrail Dövləti arasında baş verən 12 günlük qarşıdurma zamanı və ondan sonrakı dövrdə Azərbaycan Respublikası qonşu dövlətlərin ərazisində fəaliyyət göstərən məkrli qüvvələr tərəfindən qəsdən hədəf seçilərək, əlaqələndirilmiş dezinformasiya kampaniyasına məruz qalıb.
Bu barədə Milli Məclisin Xarici müdaxilələrə və hibrid təhdidlərə qarşı komissiyasının ölkəmizə qarşı aparılan dezinformasiya kampaniyasına dair açıqlamasında bildirilir.
Məlumatda deyilir: “Azərbaycan tərəfinin bütün səviyyələrdə verdiyi açıqlamalara baxmayaraq, Komissiyanın apardığı monitorinqlər zamanı qonşu və dost İran İslam Respublikasının ərazisində və ondan kənarda fəaliyyət göstərən qruplar tərəfindən “Telegram”, “TikTok”, “Facebook”, “X” və “YouTube” kimi platformalarda “münaqişədə Azərbaycanın rolu” ilə bağlı saxta xəbərlər və məlumatlar paylaşılaraq dövlətimizin təhlükəsizliyi və milli maraqları əleyhinə genişmiqyaslı dezinformasiya kampaniyalarının davam etdiyi müəyyən edilib.
Kampaniya zamanı İran cəmiyyətinin də hədəf auditoriyası olduğu təsbit edilmiş, ölkə daxilində anti-Azərbaycan sentimentin formalaşdırılması istiqamətində fəaliyyətin aparıldığı müşahidə edilmişdir.
İran İslam Respublikasının Ermənistan Respublikasındakı səfirinin səsləndirdiyi təxribat xarakterli iddialardan sonra isə İrandakı ermənipərəst dairələrin və şəxslərin, o cümlədən Ermənistana bağlı şəbəkələrin anti-Azərbaycan və qızışdırıcı ritorikasının daha da artdığı diqqətimizi cəlb etmişdir.
Eyni zamanda, İranda məskunlaşaraq Azərbaycan əleyhinə fəaliyyət göstərən Azərbaycan əsilli qruplaşma üzvlərinin sosial media platformaları vasitəsilə din pərdəsi altında manipulyativ fikirlərdən istifadə etməklə Azərbaycan vətəndaşlarını müxtəlif təxribatlar törətmələri üçün çağırışlar etdikləri aşkar edilmişdir.
Komissiyanın hesablamalarına görə, anti-Azərbaycan kampaniyası İrandan qaynaqlanan 270-dən çox profillə, əsasən, Azərbaycan, rus, fars, qismən də ingilis, türk və ərəb dillərində 600-ə yaxın hesabdan aparılır. Bundan əlavə, həmin qrupların yalnız “TikTok” platformasında 215-dən çox aktiv hesabı fəaliyyət göstərir.
Xarici müdaxilələrə və hibrid təhdidlərə qarşı komissiya aidiyyəti dövlət qurumları ilə birgə dövlətimizə qarşı aparılan bu fəaliyyətləri diqqətlə izləyir və müvafiq cavab tədbirləri görür”.
Qonşu ölkələr deyəndə kimlər nəzərdə tutulur?
“Konkret olaraq İranın “Səhər” televizya kanalı açıq efirdən Azərbaycana şər-böhtan atırdı, dezinformasiya yayırdı...”
Siyasi şərhçi Azər Həsrət “Bakı-Xəbər”ə bildirdi ki, qonşu ölkələr deyiləndə ilk ağla gələn ölkələr İran, Rusiya və Ermənistandır: “Ənənəvi olaraq İran, Rusiya və Ermənistan Azərbaycana qarşı dezinformasiya savaşı aparıb, aparır, yəqin ki, aparmaqda da davam edəcək. Biz nəzərə alsaq ki, indiki şəraitdə söhbət İran-İsrail müharibəsindən gedir, o zaman gözlər ilk növbədə İranın üzərinə dikilir. Milli Məclıis bəyan etməsə də, biz özümüz də heç bir araşdırma aparmadan bunu açıq şəkildə görə bilirdik. Yəni konkret olaraq İranın “Səhər” televiziya kanalı açıq efirdən Azərbaycana şər-böhtan atırdı, dezinformasiya yayırdı, İranın ayrı-ayrı ekspertləri antiazərbaycan paylaşımlar edirdilər, dezinformasiyalar tirajlayırdılar. Əlbəttə ki, onlarla bərabər erməni və Rusiya siqmentləri də boş durmayıb. Yəni bu üçlük əl-ələ verib birlikdə antiazərbaycan və dezinformasiya kampaniyası aparırdı və aparmada da davam edirlər. Bu proses dayanmayıb.
Ona görə də düşünürəm ki, Milli Məclis indiki şəraitdə dövlətlərarası münasibətlərin gərilməməsi baxımından ölkələrin adlarını açıqlamır, amma Azərbaycanda hər kəsin bildiyi bir gerçək var. Yəni bizə qarşı bu kimi dezinformasiyaları əsasən kimlər, hansı ölkələr aparır”.
A.Həsrət deyir ki, bu üç ölkə hər zaman bu kimi məsələlərdə Azərbaycana qarşı çox rahat şəkildə birləşir və birləşib “böyük” işlər görməyə cəhd göstərməyə çalışırlar. A.Həsrətin fikrincə, bu üç dövlət Azərbaycanın bir dövlət kimi mövcudluğunda maraqlı deyil. “Ümumiyyətlə, Azərbaycana şər atmaqla, gözdən salmaqla həm də özlərinin daxili auditoriyalarına əlavə qida vermiş olurlar. Üstəlik də Azərbaycan Respublikası ərazisində yaşayan, vətəndaşı olan və Rusiya, İran kimi dövlətlərə işləyən “5-ci kolon” nümayəndələrini də ayaqda tutmağa çalışırlar. Yəni “5-ci kolon” nümayəndələri- Rusiyaya və İrana bağlı kəsim bu kampaniyada çox fəal şəkildə iştirak edir. Bunu da hamımız görürük.
Ona görə də mən, özəlliklə də İran-İsrail müharibəsi günlərində çağırışlar edirdim ki, sosial mediada yaxşı bir monitorinq aparılmalıdır və dövlətin müvafiq qurumları dolayısı, ya birbaşa dezinformasiya ilə məşğul olan, diqqəti başqa yönlərə yönəltməyə çalışan adamların bir məlumat bazasını özü üçün formalaşdırmalıdır. Bunu təklif olaraq deyirəm. Amma bəlkə onu edirlər, hər halda etmiş olarlar. Çünki dövlətin təhlükəsizliyi bunu tələb edir”-deyə A. Həsrət qeyd etdi.
İradə SARIYEVA
