Ramil Məmmədli: "Bu modelə keçmək Azərbaycan üçün hələ tezdir"
Azərbaycan Ordusunda ödənişli hərbi xidmətin Türkiyə modelinə keçidlə bağlı yeni qanun layihəsi Milli Məclisə təqdim olunub. Layihə komitədə müzakirə edildikdən sonra parlamentdə müzakirəyə çıxarılacaq. Qanun qəbul olunarsa, Azərbaycan Respublikasının vətəndaşları ödənişli əsaslarla 1 il və ya 1 il 6 ay yox, daha qısa müddətə hərbi xidmət keçə biləcəklər.
Maraqlıdır, sözügedən modelə keçid nə dərəcədə faydalı olacaq? Nəzərə alsaq ki, Azərbaycanla Ermənistan arasında sülh sazişi hələ imzalanmayıb, dünyada geosiyasi qarşıduema səngiməyib, o zaman belə bir qanunun qəbuluna hazırlıq erkən deyilmi?
Sözügedən məsələ ilə bağlı fikirlərini baki-xeber.com-la bölüşən hərbi ekspert Ramil Məmmədli hesab edir ki, bu modelə keçmək Azərbaycan üçün hələ tezdir: "Məsələ ondadır ki, ordunun formalaşmasında, şəxsi heyətin komplektləşməsində bütün Azərbaycan vətəndaşları iştirak edirlər. Bu proses isə rotasiya qaydasında tənzimlənir. Bu, o deməkdir ki, sağlam Azərbaycan vətəndaşı ona qoyulan yaş və müddət əsasında zabit, gizir, çavuş və əsgər kimi xidmət edir. O ki qaldı ödənişli hərbi xidmətə keçid məsələsinə, birmənalı olaraq bizdə bu mərhələyə keçid zərərlidir. Niyə? Ona görə ki, bir sıra səbəblərə görə bu modelə keçmək hələ tezdir. Ən azından ona görə ki, yerləşdiyimiz region çox həssas bir bölgədir. Bir sıra böyük güclərin burada maraqları toqquşur. Ən başlıcası Azərbaycanla Ermənistan arasında sülh azişi imzalanmayıb. Əksinə, bəzi qərb dövlətləri Ermənistanı silahlandırırlar. Sülh müqaviləsini tezləşdirməkdən ötrü İrəvana təzyiq göstərmək əvəzinə, bu ölkəni silahlandırırlar. Ermənistanı yenidən ölkəmizə qarşı təhdid mənbəyinə çevirmək istəyirlər. Belə olan halda orduda ödənişli hərbi xidmətə keçid bizə lazımdırmı? Hesab edirəm ki, bu, hələ tezdir. Gələcəkdə buna keçmək olar. Həm də bu model Azərbaycan Ordusunun komplektləşməsinə mənfi təsir göstərə bilər. Bütün bunlardan çıxış edərək hesab edirəm ki, sözügedən məsələdə tələskənliyə yol vermək olmaz. Gələcəkdə təhdidlər ortadan qalxarsa, Ermənistanla sülh sazişi praktiki olaraq müsbət effekt verəcəksə, o zaman ödənişli hərbi xidmət modelini tətbiq etmək olar".
Vidadi ORDAHALLI
