Mirkazım Seyidov: "Həm rəsmi Bakı, həm də rəsmi Moskva xarici oyunçuların regiona soxulmasına qarşı çıxacaqlar"
Rusiya Prezidenti Vladimir Putin avqustun 18-19-da Azərbaycana səfər edəcək. Bu barədə Kremlin mətbuat xidməti məlumat verib.
Məlumata görə, səfər zamanı Rusiya-Azərbaycan strateji tərəfdaşlıq və müttəfiqlik münasibətlərinin daha da inkişaf etdirilməsi məsələləri, habelə aktual beynəlxalq və regional problemlər müzakirə olunacaq.
Səfərin yekunları üzrə dövlət başçılarının Birgə Bəyanatının qəbul edilməsi, hökumətlərarası və digər sənədlərin imzalanması planlaşdırılır.
Qeyd edək ki, bir neçə gün öncə Rusiya Prezidenti Vladimir Putinin avqustun 19-da Bakıya səfər edəcəyi ilə bağlı məlumat yayılmışdı.
Bəllidir ki, hazırda Ermənistan açıq şəkildə anti-Rusiya mövqeyi tutur. Hətta ABŞ-a öz hərbçilərini ölkə ərazisində yerləşdirməsinə icazə verir. Belə olan təqdirdə Putinin Bakıya səfəri Azərbaycanla strateji müttəfiqlik münasibətlərini daha da dərinləşdirmək və qarşılıqlı hərbi yardım barədə yeni sazişlərin imzalanması ilə nəticələnə bilərmi?
Müstəqil siyasətçi Mirkazım Seyidov "Bakı-Xəbər"ə açıqlamasında bildirdi ki, Rusiya və Azərbaycan liderlərinin bu görüşündə iki ölkə arasında olan münasibətlərə kompleks baxış olacaq: "Rusiya Azərbaycana strateji tərəfdaş və etibarlı dost kimi baxır. Bu baxışın tarixi əsası və ənənəsi var. Ən nəhayət, 2022-ci ilin fevral ayında Rusiya ilə Azərbaycan arasında imzalanan müttəfiqlik haqqında saziş bunu zəruri edir. Yəni, demək istəyirəm ki, iki ölkə arasında belə bir saziş var. Bu, münasibətlərin yaxınlığını xarakterizə edən ən möhtəbər sənəddir.
Üstəlik, Vladimir Putinlə İlham Əliyevi bir-birini şəxsi dostluq münasibətləri bağlayır. Onların arasında sarsılmaz etibar var. Bəlkə də buna görə Rusiya ilə Azərbaycan arasında münasibətlər yüksək səviyyədədir. Ona görə də iki liderin görüşündə müzakirə ediləcək xeyli məsələ var. Xüsusilə regional məsələlər diqqət mərkəzində olacaq. Cənubi Qafqazda son zamanlar xeyli hadisələr yaşanıb. Həm rəsmi Bakı, həm də rəsmi Moskva xarici oyunçuların regiona soxulmasına, burada hərbi kontingent formalaşdırmalarına qarşı çıxacaqlar. Çünki ABŞ və Fransa kimi ölkələrin Cənubi Qafqazda hərbi mövcudluğu region üçün ciddi təhdidlər yaradır. Ona görə də hər iki ölkə lideri bu məsələyə laqeyd qalmayacaq və prinsipial mövqe nümayiş etdirəcəklər.
Azərbaycanla Rusiya arasında iqtisadi əlaqələrin şaxələndirilməsi də müzakirə olunacaq məsələlər sırasındadır. Hərbi-texniki sahədə mövcud olan əməkdaşlığın daha da genişlənməsi istiqamətində də yeni sənədlər imzalana bilər".
Məhəmmədəli QƏRİBLİ
