Azərbaycan BMT-ni Qarabağda ələ keçirilən hərbi vasitələrin sənədləşdirilməsinə dəvət edib. Azərbaycan xarici işlər nazirinin müavini Elnur Məmmədov Beynəlxalq Ədalət Məhkəməsində Ermənistanın Azərbaycana qarşı müraciəti üzrə dinləmələrdə çıxış edərkən bildirib ki, Ermənistan qüvvələrinin Qarabağda törətdiyi təhlükəsizlik təhdidlərinin ən bariz göstəricisi əməliyyat zamanı məhv edilmiş və ya ələ keçirilmiş, həmçinin Qarabağ boyunca tapılmış silahların həcmi və qabaqcıl texnologiyalı hərbi vasitələrdi.
Nədənsə, beynəlxalq təşkilatlar erməniləri ifşa edə biləcək monitorinqlərə elə də meyl etmirlər. Niyə?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, dünya birliyinin Qarabağ probleminin həllində tutduğu mövqe bizi qane edə bilməz: “Çünki Birləşmiş Millətlər Təşkilatının bu barədə qəbul etdiyi qətnamələr, eyni zamanda bir sıra dövlət başçılarının, öndə də Fransa prezidentinin bu məsələyə münasibəti Qarabağ probleminin həllinə deyil, problemi yenidən gündəmə gətirməyə yönəlib. Vəziyyət o yerdədir ki, Azərbaycanda zaman - zaman torpaqlarımızı işğal edən, Xocalı faciəsini törədən adamları Avropa Şurasında, yaxud digər beynəlxalq tribunalarda erməni siyasi xadimləri kimi dəyərləndirirlər. Belə bir vəziyyətdə deməyə söz tapmırıq. Əlbəttə, ordakı silahlar yüksək texnologiya ilə hazırlanmış silahlardır. Bu silahların Azərbaycanın işğal olunmuş ərazilərində, konkret Qarabağ iqtisadi rayonunda olmasını Azərbaycanın bütövlüyünə, süverenliyinə, Azərbaycan insanının həyatının təhlükəsizliyinə yönəlmiş təhdid kimi dəyərləndiririk. Bu beynəlxalq təşkilatların qeyd olunan monitorinqlərdə iştirak etməməsi onların əsas məqsədini, iç üzünü açıb göstərir. Bu bizim üçün qəribə deyil. Biz bu münasibətlə ilk dəfə deyil ki, rastlaşırıq. Ona görə də, Azərbaycanın bu məsələdəki inadı, beynəlxalq hüquq tərəfindən qorunan mövqeyi bizim üçün əsas amildir. Bu cür silahların orda olmasının günahkarları indi onların monitorinqlərini necə aparsınlar? Fransa Ermənistana nə məqsədlə silah verir? Məqsəd odur ki, erməniləri yenidən azərbaycanlılara qarşı qaldırsınlar. Ona görə də, Azərbaycan Prezidenti öz çıxışında konkret şəkildə bildirdi ki, əgər bölgədə yenidən vəziyyət gərginləşərsə, bu məsuliyyət Ermənistana silah verən dövlətlərin üzərinə düşəcək. Birmənalı şəkildə beynəlxalq təşkilatların monitorinqlərdə iştirakdan imtina etməsi Azərbaycanın yaratdığı yeni geosiyasi reallıqlarla barışmaması anlamına gəlir. Yəni onlar istəmirlər ki, Qarabağ problemi tam həll olunsun. Baxmayaraq, Azərbaycan dövləti buna artıq keçmişdə qalmış bir problem kimi baxır. Bu problemin həlli istiqamətində yarana biləcək hər hansı bir narazılığın həllində Azərbaycan başqa dövlətlərin köməyinə ehtiyac duymur. Qarabağ məsələsi birmənalı şəkildə Azərbaycanın daxili işidir. Azərbaycan bu sırada digər xarici dövlətlərin iştirakını məqbul saymır. Çünki biz artıq bu dövlətlərin Azərbaycana münasibətini görmüşük. Ona görə də, cənab Prezident də çıxışında dedi ki, əgər onlar bu məsələdəjdə sülhə xidmət etmək, Azərbaycanın ərazi bütövlüyünə hörmətlə yanaşmaq məqsədi ilə iştirak etmək istəyirlərsə, buyursunlar. Əks halda Azərbaycan üçün heç bir dövlətin bu məsələdə iştirakına ehtiyac yoxdur. Gürcüstan səfərində də Azərbaycan Prezidenti xüsusi vurğuladı ki, biz Ermənistanla hər zaman sülh danışıqlarına hazırıq. Əgər Gürcüstan bu danışıqlarda vasitəçi qismində çıxış edərsə, buna ancaq sevinə bilərik. Ona görə də, cənab Prezident Ermənistan siyasi rəhbərliyini danışıqlarda Gürcüstana dəvət etdi. Azərbaycan müstəqil, öz sözünü deyən bir dövlətdir. Azərbaycan ciddi bir dövlət kimi Ermənistanı masa arxasına dəvət edir və sülh danışıqlarından boyun qaçırmır. Eyni zamanda, Azərbaycanın erməni birləşmələrinə məxsus qanunsuz silahların monitorinqində iştirak etmək məqsədi ilə beynəlxalq təşkilatlarına səslənişi də çox böyük üstünlükdür. Onların imtinası isə onlar üçün bir problem, onların əsl simasını görmək üçün əsas amildir. Azərbaycan öz tərəfindən bütün bunları açıq şəkildə deyir. Gəlmək istəmirlərsə, özləri bilər. Bu da dünya birliyinin Azərbaycana qarşı 30 ildən çox bəslədiyi ikiüzlü siyasətin bir parçası olsun”.
Məhəmmədəli QƏRİBLİ
