Son günlər Fransanın təhriki ilə ölkəmizə qarşı bir çox təşkilatlar tərəfindən qərəzli qərarlar verilib. AŞPA, Beynəlxalq Ədalət Məhkəməsi, ondan 2- 3 gün qabaq Avropa Parlamenti, BMT İnsan Haqları Şurası, Avropa Parlamentində bu yöndə addımlar atılıb.
Sadaladığımız qurumların hamısı da deyir ki, güya Qarabağda “etnik təmizləmə” olub. Nə baş verir və bu qurumlar niyə bizə qarşı birləşiblər?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Avropa Parlamentinin təpədən-dırnağa kimi korrupsiyalaşmış, siyasi oyunbazlıqla məşğul olan üzvlərinin Azərbaycan əleyhinə qəbul etdiyi qətnamə bizim üçün heç bir dəyəri olmayan kağız parçasıdır: “Bu bədnam addım riyakarlığın, həyasızlığın və ədalətsizliyin ən böyük təzahürüdür. Azərbaycan nəyə görə sanksiyalara məruz qalmalıdır? Ona görə ki, öz suverenliyi və ərazi bütövlüyü uğrunda döyüşüb? Ona görə ki, bölgədə terrorçuluğa, separattizmə qarşı amansız tədbirlər həyata keçirib? Görünən odur ki, Azərbaycanın müstəqil addımları, terrora qarşı qətiyyətli addımlar atmağı Avropa dairələrini bərk narahat edir. Əks halda Azərbaycana qarşı bu cür hiddətli mövqe tutmazdılar. Avropalı siyasətçilər ölkəmizin haqq savaşına qarşı addımlar atmaqdansa, öz korrupsiya əməllərinə baxıb utansınlar. Onsuz da heç bir nüfuzu qalmayan əksər Avropa siyasətçiləri də daxil Avropa Parlamenti buraxılmalı və yenidən formalaşdırılmalıdır. Bunun vaxtı çoxdan çatıb. Fransa prezidenti Makron başda olmaqla, bəzi Avropa liderlərinin həyasızcasına Azərbaycanın haqq işinə mane olması, erməni separatizmini dəstəkləməsi dərin təəssüf hissi doğurur. Onlar bu mövqeləri ilə dünyada özlərini rüsvay edir, onsuz da olmayan nüfuzlarını yerlə bir edirlər. Avropanın dırnaqarası demokratiyasının, ədalətinin əsl üzü, əsl siması görünür. Əlbəttə ki, bu cür addımlar Azərbaycanı öz yolundan döndərə bilməz. Qətnamələr, əsassız bəyanatlar dövlətimizin qətiyyətli və milli maraqlara söykəninən siyasətini dəyişə bilməz. Azərbaycan öz yolu ilə sonadək gedəcək, ərazilərimizdəki terrorçuları son nəfərinədək zərərsizləşdirəcək və Cənubi Qafqazda dayanıqlı sülhə nail olacaq. Etnik təmizləməni 30 il əvvəl məhz Ermənistan azərbaycanlılara qarşı həyata keçirib. Ondan əvvəl isə bu siyasət əzəli Azərbaycan torpaqları olan və indi Ermənistan adlanan Qərbi Azərbaycan ərazisində həyata keçirilib. 200 minə yaxın insan əsrlər boyu yaşadıqları dədə-baba yurdlarından didərgin salınıb, hüquqları pozulub və yüzlərlə insan qətlə yetirilib. İndiyə qədər də bu pozulan hüquqlarla bağlı hər hansı bir qərar qəbul edilməyib. Qarabağdan köçmüş ermənilər üçün qayıdış hüququndan, hansısa beynəlxalq mexanizmdən dəm vuran Avropa Parlamenti, nədənsə, eyni tələbi Qərbi Azərbaycana qayıtmalı olan azərbaycanlı qaçqınlar üçün irəli sürmür”.
Azərbaycan Qarabağı işğaldan azad etməklə bütövlükdə regionu sülhə yaxınlaşdırıb. Azərbaycan və Ermənistan arasında sülh müqaviləsinin imzalanması üçün faktiki olaraq heç bir prinsipial maneə qalmayıb. Amma görünən odur ki, Qərb israrla buna qarşı çıxır. Təsadüfi deyil ki, sözügedən qətnamələrin heç bir yerində sülh çağırışı, və ya ölkələrin ərazi bütövlüyündən bəhs edilmir. Qəbul etdikləri qətnamələr anti-Azərbaycan məqsədi daşıyaraq ədalətə zidd, təşkilatın nüfuzuna xələl gətirən kağız parçası kimi qiymətləndirilməlidir. Avropa və onun strukturları anlamalıdırlar ki, belə şeylərlə Azərbaycanın iradəsinə və regiondakı proseslərə təsir edə bilməyəcəklər.
Məhəmmədəli QƏRİBLİ
