BMT-də Laçın yolu ilə bağlı müzakirələr aparılıb və Qərb dövlətləri yenə də məsələyə birtərəfli yanaşaraq ikili standartlardan çıxış ediblər.
Təhlükəsizlik Şurasının iclasında Rusiya Federasiyasının təşkilatdakı daimi nümayəndəsinin müavini Anna Yevstiqneyeva da çıxış edib. A.Yevstiqneyevanın sözlərinə görə, Moskva Azərbaycan və Ermənistanı təmkin nümayiş etdirməyə və gərginliyin dərəcəsini artıra biləcək addımlardan çəkinməyə, habelə Rusiya, Azərbaycan və Ermənistan liderlərinin 10 noyabr 2020-ci il, 11 yanvar və 26 noyabr 2021-ci il, həmçinin 31 oktyabr 2022-ci il tarixli üçtərəfli bəyanatları çərçivəsində razılaşmalara əməl etməyə çağırır: “Biz əminik ki, bu bəyanatların müddəalarının tam yerinə yetirilməsi Bakı ilə İrəvan arasında münasibətlərin normallaşması üçün ən sabit düsturdur. Dörd sənədin hamısı mürəkkəbdir, ayrılmaz şəkildə bağlıdır və onların müddəaları bir-birindən irəli gəlir. Onların icrası Cənubi Qafqazda təkcə region dövlətlərinin deyil, həm də bütün qonşuların maraqlarına cavab verən davamlı sülhün formalaşması üçün şərait yaradacaq”.
Burada Rusiya nümayəndəsinin fikrində iki incə nüans var. O qeyd edir ki, Laçın dəhlizinin regionda mədənlərin istismarı üstündə tərəflər arasında yaranmış mübahisə nəticəsində bağlanması xəbərləri bizi narahat edir. Daha sonra qeyd edir ki, biz indi Azərbaycanın təbiət mühafizəçilərinin o mədənlərə gəlişini təmin etmək üçün yollar axtarırıq. Digər ölkələrə baxanda, BMT-də Rusiya nümayəndəsi nisbətən obyektiv mövqe sərgiləyib. Söhbət Fransa və digər dövlətlərlə müqayisədən gedir.
Rusiya nümayəndəsinin nisbətən ədalətli mövqe sərgiləməsi Ermənistan parlamentinin sədri Alen Simonyanı qıcıqlandırıb. Bu səbəbdən o, Rusiyanı tənqid edib: “Rusiya nümayəndəsinin BMT-dəki çıxışını mənfi dəyərləndirirəm. Çünki hesab edirəm ki, müttəfiq ölkə kimi Rusiya Ermənistanla sıx münasibətləri olmayan ölkələrin etdiyi kimi daha ünvanlı çıxış edə bilərdi. Düşünürəm ki, Rusiya ya bacarmır, ya istəmir, ya da nə bacarır, nə də istəyir. Son baş verən hadisələrdən sonra bu məni təəccübləndirmir”.
“Rusiyanın Qərblə münasibətləri gərgin olduğu üçün TŞ-nin toplantısında nümayəndəsi nisbətən obyektiv danışıb”
Məsələyə münasibət bildirən AMİP-in sədr müavini Afsəddin Nəbiyevin fikrincə, Ermənistandakı mövcud hakimiyyət Rusiyaya qarşıdır: “Əvvəla, bu məsələdə erməni hay-küyü hər zaman olduğu kimi tamamilə yalanlar üzərində qurulub. Ermənilər dünya ictimaiyyətini çaşdırmaq, belə bir uydurma xəbərlər yaymağa başlayıblar ki, guya Azərbaycan Laçın yolunu bağlayıb "artsaxı" blokadaya məruz qoyur. Belə xəbərlər tamamilə əsassız, yalançı, uydurma erməni təbliğatından başqa bir şey deyil. Birincisi, Azərbaycan istədiyi vaxt beynəlxalq hüquq tərəfindən tanınmış istənilən ərazisində təhlükəsizlik tədbirləri həyata keçirə bilər. Bu bölgədə yalnız ekofəallar Azərbaycanın ermənilər tərəfindən barbarcasına talan olunan mədənlərindəki vəziyyəti öz gözləri ilə görməyi tələb edirlər. Sülhməramlılar da bu dinc təşəbbüsə şərait yaratmalıdır. Ancaq biz bu məsələdə də sülhməramlıların xoş niyyətlərinin olmadığını görürük. Məntiqlə, "sülhməramlılar" bu xoş təşəbbüsləri anlayışla qarşılayıb dinc ekofəallara şərait yaratmalıdır. Ancaq onlar da yaxşı bilirlər ki, 44 günlük Vətən savaşından sonra ermənilər bu bölgəyə qanunsuz olaraq silah-sursat daşıyıblar. Məhz bu cinayətkar əməlləri ört-basdır etmək üçün belə xoşniyyətli təşəbbüsləri kölgə altına salaraq uydurma xəbərlər tirajlayırlar. Ermənistanın diplomatik korpusu belə bir mərhələdə konstruktivlik nümayiş etdirmək əvəzinə, bölgədə konfliktin yenidən yaranmasını körükləyir. Bu çox təhlükəli tendensiyadır. Burada Rusiyanı günahlandırmaq əvəzinə, Azərbaycanın haqlı tələblərini yerinə yetirməklə bölgədə sülhə nail olmaq olar. Azərbaycan dövləti bu bölgədə çox doğru addımlar atır. Yeri gəlmişkən, ekofəalların fəaliyyətini yüksək qiymətləndirərək onlara öz dəstəyimi ifadə edirəm. Biz də belə məsələlərdə hər zaman dövlətin yanında olmaqla öz siyasi dəstəyimizi əsirgəməyəcəyik. Rusiyanın Qərblə münasibətləri gərgin olduğu üçün Təhlükəsizlik Şurasının toplantısında nümayəndəsi nisbətən obyektiv danışıb. Əminəm ki, Ukrayna məsələsi olmasaydı, Rusiya da Fransanın mövqeyindən çıxış edərdi. Alen Simonyan Ermənistanda antirus ovqatını daha da gücləndirmək üçün tənqidi mövqedən çıxış edir. Nəzərə almaq lazımdır ki, Ermənistandakı rejim Rusiyanın maraqlarını yox, Qərbin maraqlarını təmsil edir”.
Vidadi ORDAHALLI
