Məlum olduğu kimi, Naxçıvan Muxtar Respublikası (MR) Ali Məclisinin sədri Vasif Talıbov istefa verdiyini açıqlayıb. Onun vəzifəsinə isə seçki keçirilməyib.
Vasif Talıbovun səlahiyyətlərini avtomatik olaraq Ali Məclis sədrinin birinci müavini Azər Zeynalov icra edəcək. Qeyd edək ki, Azər Yədulla oğlu Zeynalov 1970-ci ildə Şərur rayonunda müəllim ailəsində anadan olub.
O, 2005-cu ildən bəri Ali Məclisin deputatı, eyni zamanda sədr müavinidir.
2020-ci ilin parlament seçkilərində 10 saylı Şərur seçki dairəsindən namizədliyini irəli sürən A. Zeynalov Yeni Azərbaycan Partiyasının üzvüdür.
O, həmçinin, Ali Məclis sədrinin birinci müavini vəzifəsini icra edir. Azər Zeynalov, eyni zamanda, Naxçıvan Ali Məclisinin İqtisadi siyasət komitəsinin sədridir. Ali Məclisə seçilməzdən öncə isə A.Zeynalov Naxçıvan Dəmir Yolu İdarəsinin rəis müavini olub. Qeyd edək ki, Azər Zeynalovun adı heç də müsbət mənada hallanmır. Onun Naxçıvanda olan bütün korrupsiya mexanizminə nəzarət edən adam olduğu deyilir. Barəsində kifayət qədər araşdırma materialları işıq üzü görüb. Yerli əhali bu fikirdədir ki, Naxçıvanda ciddi korrupsiya faktları aşkarlanıbsa, həmin bölgəyə rüşvətdən, korrupsiyadan uzaq olan təmiz bir adam rəhbərlik etməlidir.
Lakin hələ ki, Naxçıvanın faktiki rəhbəri bu adamdır. Onun idarəçiliyi Naxçıvanı qane edə bilərmi?
Əslən Naxçıvandan olan siyasətçi, Naxçıvan Ali Məclisinin deputatı olmuş Bünyamin Qəmbərli “Bakı-Xəbər”ə açıqlamasında bildirdi ki, Naxçıvanın deputatı olan Siyavuş Novruzov internet kanallardan birində çıxışı zamanı bildirib ki, Azərbaycanda bir nəfərin iradəsi var, o da Prezidentdir: “Maraqlıdır ki, Siyavuş Novruzov bu fikri Vasif Talıbovun istefasına münasibət bildirərkən dedi. Halbuki, Konstitusiyaya görə, Prezidentin Vasif Talıbovu istefaya göndərmək səlahiyyəti yoxdur. Çünki Naxçıvan Ali Məclisi seçkili orqandı. Ona rəhbərliyi deputatlardan biri edir. Azər Zeynalov da sədrin birinci müavinidir. Onu yeni sədr kimi seçməyiblər, sadəcə, qanunvericiliyin tələbinə görə idarəçilik ona keçib. Razılaşıram ki, hazırda vəzifədə olanların çoxu barədə tənqidi fikirlər səslənir. Azər Zeynalovla bağlı da belə məlumatlar çox yayılıb. Bu yaxınlarda internet kanallarından birinə müsahibə verərkən mənə Vasif Talıbovun 5-ci kalon nümayəndəsi olması, İrana işləməsi ilə bağlı sual verdilər. Mənə elə gəlir ki, fərdlərin üstünə çox fokuslanmaq olmaz. Azərbaycanda bir sistem xətası var. Mən cavab verdim ki, belə iddialarla bağlı DTX və Baş Prokurorluq mütləq mənada araşdırmalar aparmalıydı. İddia doğrudursa, Talıbov, yalandırsa həmin iddianı ortaya atanlar məsuliyyətə cəlb edilməliydi. Azər Zeynalovla bağlı da belə araşdırmalara start verilməliydi. Təəssüflər olsun ki, Azərbaycanda bu cür mövzularda cəzasızlıq baş alıb gedir. Naxçıvanda ali idarəetməni parlament həyata keçirir. Həm Azərbaycan Milli Məclisinə, həm də Naxçıvan Ali Məclisinə keçirilən son seçkilərin şəffaf olmadığına dair geniş fikirlər var. İctimai rəy bu cürdür. Saxta yolla seçilən adamların əlavə vəzifələrə seçilməsinin özü bir anormallıqdır. Düşünürəm ki, həm Milli Məclis, həm də Naxçıvan Ali Məclisi buraxılmalı, proporsional seçki sisteminə uyğun qaydada seçki keçirilməlidir. Azərbaycan cəmiyyətinin qəbul edəcəyi sağlam rəqabətli seçki baş tutarsa, ondan sonra Naxçıvandakı idarəçiliyi kimə tapşırmaqla bağlı da ciddi qərarlar qəbul etmək olar. Azər Zeynalov reputasiyasında olan adamın MR-i idarə etməsinin özü anormallıqdı. Bunun üçün də mütləq yeni seçkilər olmalıdır”.
Məhəmmədəli QƏRİBLİ
