ABŞ-dakı erməni lobbisi və onların əlində kuklaya çevrilən bir qrup konqresmen Azərbaycana qarşı şər-böhtan kampaniyasını davam etdirir. Azərbaycan ekofəallarının, QHT təmsilçilərinin, vətənpərvər insanların Şuşa-Xankəndi yolunda keçirdiyi dinc aksiyaya çirkab bulayan ABŞ Konqresinin üzvləri heç bir əsası olmadan Azərbaycanı “Ermənistan və “Artsax”ı birləşdirən yeganə yolu bağlamaq”da ittiham edir.
Guya yolu Azərbaycan bağlayıb. Yolu sülhməramlıların bağladığını bilə-bilə Azərbaycana böhtan yağdırmaqda davam edirlər. Armenpress-in Amerika Erməni Assambleyasına istinadən yaydığı məlumata görə, ABŞ Konqresinin üzvləri “bu məsələni” gündəmə gətirməyə davam edirlər.
Erməni işləri üzrə komitənin sədr müavini Adam Şiff Bayden administrasiyasını “Artsaxa humanitar yardım göstərilməsi üçün” addımlar atmağa çağırıb. Erməni lobbisinin “əl quzusu” Konqresmen Sihiff iddia edib ki, guya Azərbaycan qəsdən humanitar “böhran” yaradır.
ABŞ Konqresinin muzdlu ermənipərəstləri ABŞ Senatının Xarici Əlaqələr Komitəsinin sədri Robert Menendez, konqresmen Anna Eşu, Rep Klark, konqresmen Şerman erməni ağzı ilə danışmaqda davam ediblər. Azərbaycanı və Türkiyəni ittiham etməkdən çəkinməyən lobbinin kuklaları verdikləri açıqlamalarla özlərini biabır ediblər. Beynəlxalq aləm Şuşa-Xankəndi yolunda nə baş verdiyini yaxşı bilir, əlbəttə, bir az obyektiv olsalar ABŞ-ın bu muzdlu konqresmenlərinin mənasız və əsassız çağırışlarına əhəmiyyət verməz, heç Bayden administrasiyası da onları eşitməz. Azərbaycanı “qəsdən humanitar böhran yaratmaqda” əsassız, faktsız ittiham edən ABŞ konqresmenlərinin həqiqətə göz yumması onların mahiyyətini ortaya qoyur.
“Həmin konqresmenlər Azərbaycan ekologiyasına qarşı həyata keçirilən vandalizm aktlarına səs çıxarsınlar”
Məsələyə münasibət bildirən siyasi ekspert Tural İsmayılov “Bakı-Xəbər”ə şərhində bildirdi ki, ABŞ konqresmenlərinin bəzilərinin bu yanlış yolu tutması təsadüfi deyil: “ABŞ-dakı konqresmenlərin bir çoxu erməni lobbisinin təsiri altındadır. Özəlliklə də Nensu Pelosi, Adam Şiff, Frenk Pallone kimi şəxslər daim Erməni Milli Komitəsi və onun rəhbəri olan Aram Hamparianın siyasi direktivlərini və tapşırıqlarını yerinə yetiriblər. Bu baxımdan bu bizim üçün yeni hal deyil. Ümumiyyətlə, ABŞ konqresmenləri 30 il ərzində Azərbaycan torpaqlarının işğal altında olması faktına göz yumublar, səssiz qalıblar. Bundan əlavə, uzun illər Ermənistanın işğal etdiyi torpaqlarda həyata keçirdiyi mədəni soyqırım aktlarına, Azərbaycan ekologiyasına qarşı törədilən vəhşiliklərə səslərini çıxarmayıblar”.
T.İsmayılovun sözlərinə görə, bunun nəticəsində də beynəlxalq ədalətsizlik daim ön planda olub. Bu baxımdan, ABŞ konqresmenlərinin son addımlarının yenilik olmadığını deyən siyasi ekspert bildirdi ki, biz bu tip davranışların çox şahidi olmuşuq. “ABŞ konqresmenlərinin nə deməsindən asılı olmayaraq, bu gün yüzlərlə fəal Azərbaycan ekologiyasının zədələnməsinə və çirklənməsinə qarşı mübarizə aparır. Bu baxımdan hesab edirəm ki, həmin konqresmenlər Azərbaycan ekologiyasına qarşı həyata keçirilən vandalizm aktlarına səs çıxarmalıdır”-deyə T.İsmayılov vurğuladı.
Leyla QARAXANLI
