Məlum olduğu kimi, Naxçıvan Muxtar Respublikası (MR) Ali Məclisinin sədri Vasif Talıbov istefa verib. Onun bununla bağlı müraciəti dekabrın 21-də Ali Məclisin iclasında açıqlanıb. Vasif Talıbov 1995-ci il dekabrın 16-dan Naxçıvan MR Ali Məclisinin sədri vəzifəsində çalışıb.
Bundan əvvəl son həftələr Naxçıvanda bir sıra vəzifəli şəxslərin həbsi və onların mənimsəmədə ittiham edilməsi orada ciddi korrupsiya probleminin olduğunu ortaya qoydu. Dekabrın 13-də Naxçıvanda Şəhərsalma və Arxitektura Komitəsinin sədri Hicran Rüstəmov həbs olundu. V.Talıbov düz 27 il Ali məclisin sədri olub. Onun idarəçiliyi ilə bağlı birmənalı münasibət olmayıb. Narazılıq həddən ziyadə böyük idi və zaman-zaman bu özünü müxtəlif formada göstərirdi.
Bütün bu deyilənlərin fonunda, V.Talıbovun özünün, şəxsi karyerasının acınacaqlı sonluğu və Naxçıvanda vəziyyət niyə bu həddə gəldi çıxdı?
Qabil Hüseynli: “Xüsusən də korrupsiya və mərkəzi büdcədən ayrılan vəsaitlərin talan olunması onun sonunu sürətləndirdi”
Məsələyə münasibət bildirən politoloq Qabil Hüseynlinin fikrincə, bir sıra neqativliklər V.Talıbovun belə biabırçı sonluğuna gətirib çıxardı: “Fikrimcə, dövlətə xəyanət, müxtəlif dövlətlərin agentura şəbəkələri ilə şübhəli əlaqələr, Naxçıvan əhalisinə tutulan divan, ağır sosial vəziyyətləri, onların sosial səbəblərə görə bölgəni tərk etməsi buna gətirib çıxardı. Xüsusən də korrupsiya və mərkəzi büdcədən ayrılan vəsaitlərin talan olunması onun sonunu sürətləndirdi. Çünki o, həmin vəsaitlərin çoxunu mənimsədi. Nəticədə Naxçıvanda insanların sosial durumu pisləşdi. V.Talıbov mərkəzi hakimiyyət orqanlarına tabe olmaq istəmirdi. Naxçıvanın yerli təbii sərbvətləri hamısı V.Talıbovun monopoliyasında idi. Duz mədənlərindən tutmuş mineral sulara qədər hamısı onun monopoliyasında idi. Faktiki olaraq Naxçıvanı talayırdı. Bütün bunlar isə milyardlarla manat pulla ölçülür. Belə halların hamısı çox ciddi cinayətlər yaradır. Çünki bütün bunlar Naxçıvanın ümumi inkişafına çox mənfi təsir göstərdi. Ona görə də hesab edirəm ki, bütün bunlara görə Talıbov və bu işdə iştirak edən əsas şəxslər məsuliyyətə cəlb olunmalıdır”.
Rəşad Bayramov: “27 il ərzində Talıbov tədricən sanki toxunulmaz şəxsə çevrildi”
Əslən Naxçıvandan olan AMİP-in Mərkəzi Şurasının sədri Rəşad Bayramovun sözlərinə görə, V.Talıbova 27 il ərzində sanki toxunulmazlıq hüququ verilmişdi: “Zaman-zaman Naxçıvanda baş verən neqativ hadisələrlə, korrupsiya hadisələri ilə bağlı, ordakı bəzi sərt idarəçiliklə bağlı çoxsaylı məlumatlar olsa da, mətbuatda dərc olunmurdu. Bəzi saytlarda dərc olunsa da, bir neçə saatdan sonra çıxarılırdı. Sanki gizli bir əl var idi və bütün bu məsələləri tənzimləyirdi. Nəticə etibari ilə 27 il ərzində V.Talıbov tədricən sanki toxunulmaz şəxsə çevrildi. İnsan hər hansı bir tənqid, danlaq eşitməyəndə özünü sanki bir büt hesab edir. Nəticədə istədiyini edir. Baş verənlərin başlıca səbəbi bununla bağlıdır. Naxçıvanda sərt idarəçilik və korrupsiya əsasən bu toxunulmazlıqdan irəli gəlirdi. Bu adam özünə o qədər arxayın idi ki, Naxçıvanda bir sıra sahələrdə yeyintilərə nəzarətsizlik hökm sürürdü. Ötən illər ərzində mərkəzi hökumət tərəfindən Naxçıvanda ayrı-ayrı dövlət müəssisələrində dəfələrlə audit yoxlamaları həyata keçirilib. Ancaq bugünə qədər həmin audit yoxlamaların nəticəsində yaranan problemlərin səbəbləri öz əksini tapmayıb. Niyə konkret tədbirlərin görülmədiyi araşdırılmalıdır. Bütün bu neqativ halların zaman-zaman toplanması buna gətirib çıxardı. Nəticə etibari ilə bu, V.Talıbovun istefası ilə nəticələndi. Ancaq təkcə Talıbovun istefası ilə problemlər həll olunmur. Əsas odur ki, bundan sonra hansı addımlar atılacaq. Bir sıra görüləsi işlər var”.
Aydın Hüseynov: “Talıbov bunu davam etdirə bilmədi”
Millət vəkili Aydın Hüseynovun Naxçıvanda baş verənlərə münasibəti belə oldu: “Son zamanlar Naxçıvanda maliyyə və gömrük sistemində gedən proseslər o qədər də ürəkaçan deyil. Hesab edirəm ki, orda seçiləcək məclis sədri özündən əvvəlki məclis sədrinin buraxdığı səhvləri tez bir zamanda düzəldəcək. Ulu Öndərimizin Naxçıvanda işlədiyi dövrdə necə böyük bir dövlətçilik əsası yaratdığını biz bilirik. Vasif Talıbov bunu davam etdirə bilmədi. Amma hesab edirəm ki, o vəzifəyə təyin ediləcək şəxs həmin ənənəni davam etdirəcək və Naxçıvan daha da yüksək inkişaf mərhələsinə qədəm qoyacaq”.
Vidadi ORDAHALLI
