Həyat bumeranqdı deyirlər. Doğrudan da yaşadığımız illər boyu bəzi adamların timsalında, başına gələnlərin fonunda bu deyimin həqiqət olduğunun canlı şahidi oluruq. Bir neçə gündür ki, cəmiyyət özünü Naxçıvan “xanı” elan etmiş Vasif Talıbovun ətrafında baş verən hadisələri maraqla izləyir.
Vasif Talıbov nə az, nə çox, düz 27 il Naxçıvana rəhbərlik etdi. Az müddət deyil. Ola bilməz ki, bu illər ərzində onun müsbət bir fəaliyyəti olmasın. Ancaq ümumi qiymətləndirməni tərəziyə qoyanda bu qənaətə gəlirik ki, xalq sözün həqiqi mənasında ondan bezibmiş. Onun istefasına verilən sevincli reaksiyalardan bunu aydın sezirik. Zənnimcə, bundan dəqiq qiymətləndirmə meyarı ola bilməz.
Qayıdaq bumeranq məsələsinə. Nədənsə, hamı Vasif Talıbovun işlədiyi dönəmi, onun bundan sonrakı taleyinin necə olacağını müzakirə edir. Maraqlıdır, bəs Vasif Talıbov tutduğu bu vəzifəyə necə gəlmişdi?
Necə oldu ki, dünyagörüşü çox da geniş olmayan, savadı barədə lətifələr qoşulan bu adam belə yüksək posta yiyələnə bildi? Vasif Talıbov çox sadə ailədə böyüyüb. Onun atası Yusif Talıbov adi avtobus sürücüsü olub. İlk ali təhsilini Naxçıvanda alıb, deyilənə görə, hətta SSRİ dönəmində qəribə qarşılansa da, əsgəri xidmətini də Naxçıvanda başa vurub. Sonra alt trikotaj fabrikində ortabab bir vəzifədə çalışıb. Onun ulduzu Heydər Əliyevlə tanışlıqdan sonra parlayıb. Mərhum dövlət başçısı Naxçıvana qayıdanda, uzaq bir qohum kimi onun yanında görünməyə, dahi şəxsiyyətə qulluq etməyə başlayır. Onun köməkçisi, sonra isə Naxçıvan Baş Nazirinin xarici iqtisadi əlaqələr üzrə müavini olub. Çoxları elə bilir ki, Heydər Əliyev Naxçıvandan Bakıya dönən kimi Talıbov onun vəzifəsini tutub. Belə deyil.
Vasif Talıbovun vəzifəyə gəlişinin maraqlı tarixçəsi var. Bunu mənə həmin proseslərin birbaşa iştirakçısı olam adam danışıb. Heydər Əliyevdən sonra Ali Məclisə mərhum Namiq Həsənov rəhbərlik edib. Ancaq Heydər Əliyevlə olan şəxsi əlaqələrindən istifadə edən Vasif Talıbov öz sabotajları ilə kifayət qədər iş təcrübəsi olan Namiq Həsənovun işləməsinə imkan vermədi. Talıbovun tapşırığı ilə o vaxt Naxçıvan şəhər İcra Hakmiyyətinin başçısı olan Elman Abbasov, Baş prokuror İsa Nəcəfov, Daxili işlər naziri Mürsəl İsayev Namiq Həsənovu saymırdılar, onun qəbuluna getmirdilər, verdiyi tapşırıqları icra etmirdilər. Həmin rəhbər heyət bütün günü Talıbovun kabinetində otururdu. Bununla Namiq Həsənovun yalnız sözdə rəhbər olduğu, əsl idarəedici Talıbovun olduğuna dair rəy formalaşdırırdılar. Nəhayət bu vəziyyətə dözüm gətirə bilməyən Namiq Həsənov istefaya məcbur edildi. Həmin sesiyada iştirak edən şəxs deyir ki, Vasif Talıbov bu planın necə baş tutduğunu xüsusi bir sevinclə izləyirmiş...
Deyilənə görə, Namiq Həsənov da eynən Vasif Talıbov kimi istefaya göndəriləndə iclasda iştirak etməyib. Ancaq Talıbovdan fərqli olaraq, Heydər Əliyev Namiq Həsənovu Bakıda böyük bir vəzifəyə təyin etdi. Vasif müəllimin gələcək taleyi isə şübhə altındadır. Bu da sizə həyatın verdiyi bumeranq dərsi…
Məhəmmədəli QƏRİBLİ
