Məlum olduğu kimi, Qətərlə bağlı qalmaqal böyüyür. Vəziyyət o həddə gəlib çatıb ki, Avropa Parlamenti Qətərlə müxtəlif səviyyələrdə təmasları dayandırmaq fikrindədir. Səbəb də odur ki, Avropa Parlamentinin bir qrup deputatının lobbi çalışmaları qarşılığında Qətərdən milyonlarla avro pul aldıqları aşkarlanıb. Buna görə həbs olunanlar da var. Onlardan biri də Avropa Parlamentinin üzvüdür.
Məsələ ondadır ki, Avropa Parlamenti rüşvət müqabilində lobbiçilik fəaliyyətini qanunsuz hesab etsə də, Avroparlamentin Azərbaycan əleyhinə qəbul etdiyi müxtəlif sənədlərin və bəyanatların arxasında erməni lobbisinin maliyyəsi dayanır. Bu da qarşılıqsız deyil. Çünki Avropa Parlamentinin bir sıra üzvləri Ermənistana və Qarabağ separatçılarına böyük pullar müqabilində dəstək verirlər. Böyük ehtimalla, rüşvətə görə həbs olunan Avropa Parlamentinin sədr müavini Eva Kayli Qətərlə yanaşı pul müqabilində Ermənistana və erməni separatçılarına da lobbiçilik edib.
Yaxşı, bəs Avropa Parlamenti pul müqabilində erməni lobbisinin maraqlarını ifadə edən deputatların fəaliyyətini niyə qanunsuz hesab etmir?
“Erməni lobbisindən bəslənən deputatlarla bağlı araşdırmanın aparılmaması əsasən xristian təəssübkeşliyi ilə bağlıdır”
Sözügedən məsələyə aydınlıq gətirən Böyük Azərbaycan Partiyasının sədri Elşad Musayev bunu bir sıra amillərlə əlaqələndirdi: “Bəlli olur ki, Avropa siyasi dairələrində, o cümlədən Avropa Parlamentində rüşvətlə, korrupsiya ilə məşğul olan adamlar var. Bunların siyasi yönləri təsadüfi deyil. Bu səbəbdən onların bəziləri barədə cinayət işi açılıb. Erməni lobbisindən bəslənən deputatlarla bağlı araşdırmanın aparılmaması əsasən xristian təəssübkeşliyi ilə bağlıdır. Ədalətli yanaşma olsaydı, ən azından bir-iki deputat ifşa olunardı. Bunu ona görə etmirlər ki, ermənilərin illərdir apardığı təbliğatın, qarayaxmaların yalan olması üzə çıxacaq. Nəticədə müəyyən dövlətlərin Ermənistandan alət kimi istifadə etməsi imkanları əldən çıxacaq. Avropa Parlamenti müəyyən mənada erməni parlamenti kimi fəaliyyət göstərir. Belə bir qurumdan ədalət gözləməyə dəyməz. Avropa Parlamentində təmsil olunan Fransa ilə yanaşı, digər ölkələrin təmsilçiləri də erməni maraqlarına işləyirlər. Orada təmsil olunan Fransa, İspaniya, Portuqaliya, Niderland tarix boyu müstəmləkəçiliklə məşğul olublar. Digər tərəfdən, bu ölkələr bir türk düşmənçiliyi siyasəti aparırlar. Azərbaycan da türkdilli dövlət olduğu üçün bizə belə ikili münasibət sərgilənir. Məsələnin digər tərəfi onunla bağlıdır ki, xaricdə işimizi qura bilmirik. Bizim Avropa ölkələrində fəaliyyət göstərən səfirliklərimiz bütün bunlarla yaxından işləməlidilər. Yəni Avropadakı ayrı-ayrı siyasi dairələrlə səfirliklərimiz yaxşı işləməlidir. Aydın olur ki, səfirliklərin bu yöndə fəaliyyəti çox aşağı səviyyədədir. Laçın yolu ilə bağlı dünya bizə təzyiq göstərir. Guya ki, biz dinc erməniləri yaşamaqdan məhrum edirik. Halbuki, məsələ tamamilə başqadır. Ona görə də biz məsələlərə kompleks yanaşmalıyıq və bütün imkanlarımızı səfərbər etməliyik”.
Belə olacağı halda, partiya sədri hesab edir ki, erməni yalanlarının təsirini minimuma endirmək olar.
Vidadi ORDAHALLI
